|
|
السلام عليكم ورحمة الله وبركاته
قطعت عن المنتدى فتره طويله لأني كنت مشغوله حيل حيل مشغوله.
بس صارلي موقف مع وحده وييت اكتب هالموضوع لكم علشان تستفيدون منه.
بنات انا مثل ما اتعرفون ان شاء الله داشه السنه الثامنه من الزواج والحمدلله ولما اتذكر اني وصلت للسنه الثامنه اقول ماشاء الله السنين مرت ابسرعه ابغمضة عين والزمن يركض واحنا مو حاسين فيه واحس جني امس متزوجه ولي اليوم ماشاء الله احس اني عروس لأني ما يبت اعيال 
اقولكم السالفه اللي صارلتي اهي : قبل كم يوم صادفت وحده بالطبيب وقعدت اتسولف معاي واعيونها غرقانه بالدموع واتقولي آنا صارلي 8 اشهور متزوجه وما حملت وتعبانه مادري شسوي وحده قالتلي استغفر واقول هالدعاء ( ربي لا تذرني فردا وانت خير الوارثين ) قلتلها يحلوج توج عروس امس متزوجه وقالبه حياتج تفكير وهم وغم من اول شي ليش؟ ليش متشائمه ان شاء الله بتحملين من غير علاج و عادي في ناس اتحمل بعد سنه من الزواج كملي سنه بعدين راجعي للعلاج.
سئلتني وقالت ليش انتي من متى متزوجه؟ قلتلها آنا منزمان منزمان. قالت جم سنه؟ قلتلها 8 سنوات قالت :ماشاء الله الله يرزقج ان شاء الله قلت: ويرزقج.
هالبنت أثرت علي و على نفسي مع اني والله العظيم يا بنات كنت مستانسه ومتفائله وراضيه بقضاء الله وقدره بس شكلها واهي شايله اهموم الدنيا على راسها واعيونها مليانه دموع خلتني ارجع البيت واقعد افكر وافكر وافكر واقول يا ترى منو الغلط فينا آنا والا اهي لأني انا ولله الحمد ناسيه الموضوع تماما ولا مهتمه له أبد وموكله امري لله ومؤمنه ان كل شيء قاعد يصيرلي ماهو الا خير ما يعلمه الا الله سبحانه. بس تذكرت اني في البدايه ماكنت هالشكل وكنت مثل هالبنت كنت خايفه خايفه اني اكون عقيم خايفه اني يمر علي سنه وما احمل وكنت افكر ليل نهار وشايله اهموم الدنيا على راسي بس الحين ولله الحمد عرفت اشلون اتغلب على المشكله وبقولكم اشلون علشان تستفيدون من تجربتي.
ابي منكم انكم اتحطون في بالكم ان كل اللي قاعد يصيرلنا ما هو الا خير لنا ما يعلمه الا الله سبحانه وتعالي و وكلو امركم لله و شوفو اشلون راح ترتاحون.
سئلو نفسكم ( هل حياتي ماشيه على ما يرام؟ ) اكيد كل وحده منا راح اتجاوب(لأ) اهني حددي الأشياء اللي اتحسين انها امعرقله حياتج ، طبعا راح اتقولين ( حياتي ماشيه على مايرام لولا تأخر الانجاب ) تخيلي انج شلتي من حياتج هالمشكله وحطيتيها على جنب وتخيلي حياتج اشلون راح اتكون اهني راح اتحسين انج كنتي غلطانه انج كنتي عايشه بالطريقه اللي كنت عايشه فيها. ما يصير يا بنات انحمل انفسنا فوق طاقتها من التفكير والهم بل بالعكس خلو افكاركم إيجابيه شوفو نعم الله عليكم لا تعد ولا تحصى استمتعو فيها وعيشو حياتكم واستغلو وقتكم بالأشياء النافعه.
انا دايما اقول لنفسي انا بعدي الله ما رزقني اعيال بس الحمدلله انا عايشه احسن عيشه مو ناقصني شي و هل راح اموت لأني ما عندي اعيال؟ هل الدنيا بتوقف ؟ طبعا لأ وبالعكس انا مرتاحه وعندي وقت فاضي اقدر اسوي فيه كل شي اطلع اروح ايي اتعلم هوايه جديده استغل وقت فراغي بكل ماهو نافع ومفيد قبل لا ايوني اعيال وبعدين يشغلوني ولا اقدر اسوي شي والحمدلله اولا وآخرا على النعمة اللي احنا فيها.
في النهاية ما اقول الا الله يرزقني ويرزقكم بالذرية الصالحة اللي تؤنسنا بحياتنا وتعيننا عند الكبر وتدعو لنا بعد الممات اللهم آمين.
وانا كنت وحده منهم للعم انا متزوجه صارلي 6 شهور بس سبحان الله بعدين شلت هالساالفه من باالي وشغلت نفسي بالشي اللي احبه
وهالشهر هذا احس بزياده شايله هالفكره من بالي
لانه عندي يقين وامل بان اللي الله كاتبه راح يصير وانا لي بس الدعاء
واقول حق البنات اللي يببجووون ويتحبطون شيلو هالفكره من بالكم وريحوو نفسكم وحمدو ربكم على كل شي وانشاءالله الله مو ناسينااا وراح يرزقنا
ويعطيج العافيه ياقلبي
وربي يرزق كل محرووومه ياااارب
كويتيه مذهله 87 حبيبتي مشكوره والله يستجيب لج ولنا ويرزق الجميع اللهم آمين.
الله يرزقج يا رب بالذريه الصالحه المعافاة يا رحيم و يرزقني معاج و يرزق كل اللي تتمنى الضنى ياااا رب
والله انتو تهبلون بنات كويتيات حبيباتي تعلمت منكم وايد اشياء اثرت فيني بشكل ايجابي على شخصيتي و
نفسيتي الله يفرح قلوبنا كلنا ان شاء الله
ربي يرزقج ويرزق كل المسلمات
الله يوفقج يارب
غسل قلبي
وريحني
عسا الله يريحج
ويفرح قلبج بالبيبي يارب
ويفرحنا معاج
وكل وحدة يصير عندها بيبات واااااااااااااااااايد
امين يارب
.
.
.
وعليكم بالاستغفاااااااااااااااااااااااااااااار