|
|
السلام عليكم …
الموضوع هذا بصياغتي واسلوبي ونابع من الافكار اللي تعلمتها من الفكر الاسلامي … الموضوع على هيئة رسالة كل وحده تتجه حق الرسالة اللي تخصها وتقراها …
رسالة الى من تأخرت في سن الزواج
الكل يقول الزواج قسمه ونصيب .. وفعلا الكلام صحيح .. قد تكونين تأخرتي في الزواج لسبب ما يعلمه الله سبحانه وتعالى .. الله سبحانه يعلم الغيب ويعرف المستقبل .. اما الانسان معارفه على نطاق ضيق فما يشوف الامور بشكل واضح وبشكل كامل ..
((و عسى ان تكرهوا شيئا و هو خير لكم و عسى ان تحبوا شيئا و هو شر لكم))
قد تكون البنية الفلانية تأخرت بالزواج لانها حاليا ماتصلح لتحمل مسؤولية زوج وبيت وعيال حتى لو اهي في بالها تقول انا مافيني شي واعقل من وايد بنات واحلى من وايد بنات وووو .. بس ممكن بعد جم سنه تكون صالحة لهذا الامر فتلاقينها تتزوج وتلقى نصيبها … يعني العبره مو انا تزوجت مبجر ولا تزوجت متأخر.. العبره انج انتي متى ما الزواج خير لج راح تتزوجين .. وطبعا هذي افتراضات بس عشان افهمكم الموضوع ما اقصد انه كل وحده ماتزوجت يعني اهي ماتصلح حق زواج
هذا مجرد فرض قد ينطبق على وحده وماينطبق على عشر ..
في وحده ماتزوجت لين وصلت الاربعين من عمرها .. وسبحان الله تزوجت واحد غني وميسور الحال وعوضها عن كل هالسنين اللي طافت وونسها وتشوفين الحين الفرحة بعيونها .. مع انه غيرها من اللي مثلا تزوجوا قبلها لدرجة ممكن يغبطونها على حالها ..
فحطوا في بالكم انه كل شي من الله خير .. ومتى ما الانسان اقتنع بهالشي راح يرتاح نفسيا ..لانه هذا الواقع هذا اللي صار وهذا الخير ان شاءالله …
في ناس ماتزوجوا وتلاقينهم مرتاحين اكثر لو انهم تزوجوا ..ماتعلمين انتي وين الخير لج وين الصالح .. عشان جذي لاتغشلون نفسكم بهالموضوع متى مايا النصيب راح يصيبج صدقيني مايضيعج نصيبج ..
لكل وضع مميزاته و عيوبه والواحد لازم يقول الحمدلله على كل حال وما يقعد يتحسر وياكل بنفسه سواء المتزوجه او المومتزوجه وتشوف الجانب الايجابي بحياتها وتعيش حياتها وتستانس
تأكدي يا اختي انه كل اللي يصيرحق الانسان هذي امور مكتوبة له وهذا القدر ..
يمكن تقولين ليش انا تطلقت من بد خواتي او من بد بنات خالتي او او … دايما قارني نفسج بناس اقل منج .. طبعا اقصد في المصائب لانه اللي يشوف مصيبة غيره تهون عليه مصيبته … يمكن انتي مطلقه صح وفي وحده متزوجة ريلها حاكرها بالبيت ويصبحها بطراق ويمسيها بتكفخ … تعتقدين من حالته احسن !
بلا شك الطلاق شي مو زين .. بس متى ماتعذرت الحياة بين شخصين وهالشخصين حاولووووو بكل السبل انهم ينجحون العلاقه بس ماصار .. هذا المقدر والمكتوب ربما الانفصال احسن من الاستمرار بالعلاقه ..خاصه انه ثبت استحالة المعيشه مع بعض تحت سقف واحد …
بس ربما هالشي يعلمج درس معين في الحياة .. تقربي من الله سبحانه وتعالى بالدعاء والعبادة
((ومن يتقي الله يجعل له مخرجا ويرزقه من حيث لا يحتسب))
تفكري في هذه الآية الكريمه .. صدقيني اذا اتقيتي الله سبحانه راح يجعل لج مخرج من اللي انتي .. شلون ماندري طبعا .. بس لازم نكون على يقين انه في مخرج ورزق ومابعد العسر الا اليسر ان شاءالله ..
اصبروا وصابروا … الصبر مفتاحه الفرج
ياما ناس تطلقوا وردوا تزوجوا اذا كان لهم نصيب في الزواج .. لاتقولون لااا اللي يتطلقون ماراح يتزوجون لانه البنات وايد والرياييل يفضل بنية .. لا يا اخواتي هذا حجي دارج … بس لما انتي تكون عندج قناااااااااااعة انه انا حاولت وحاولت بس مانجحت العلاقه ويمكن هذا خير لي .. مادري شراح يصير بالمستقبل لو استمريت بهالعلاقة .. وانه لو الزواج خير لي فأنا راح اتزوج واذا الزواج ماينفع لي او محد يستاهلني حق زواج فماراح اتزوج…
انا اعرف وحده بنت جيراننا .. تزوجت وريلها كان يكفخها وعندها من بنيه ووصبي وصبرت معاه وبعدين طلقها … قعدت ابيت اهلها تشتغل وتربي عيالها وصابره ولا خلت للحزن والشيطان انه يوسوس لها ويضيق خلقها .. وكاهي عقب ماعليها تقريبا صارو بالمتوسط جان تتزوج ريال .. وهالريال مو متزوج من قبل ! تخيلوا ..
ماشاءالله الله يهنيهااا …
ومشكوره على الموضوع ياورق عنب ولو اطووولج آكلج
الحياة الزوجيه مثل ما انه فيها وناسه لابد فيها شقاء … مسؤوليه وعيال مجابل ريل وشغل بيت وتفكير بطباخ باجر والطلعه بالحسره وين اودي عيالي ابي اروح مني ابي اسوي جذي .. انا ماعندي خدامه انا ابي اطلع بشقه لانه شقتي ضيجه .. اهل ريلي ميننيني خالتي قشرة خواته تركتهم وفعلتهم ريلي يسهر برااااا ريلي يسافر ومايسفرني وياه وووو ريلي يطقني ريلي تزوج علي ريلي يسبني.. طبعا عدي وخربط يمن مشاكل الزواج سواء الجايده ولا العاديه
الطلاق مثل الدواء الخطير اللي اعراضه الجانبية خطيرة على صحة الانسان اكثر مما تفيده … بس ممكن الانسان ياخذ جرعه منو لوووو حالته ميؤوس منها الى ابعد الحدود … وممكن الانسان العاقل يقول مابي اخذ الدواء هذا لو شنوووو دام اعراضه الجانبيه وبلاويه اكثر من فايدته ..
عشان جذي بكل المشاكل اللي تعانون منها لاتحطون الطلاق حل للمشاكل ..
اللي يتشكون انهم يبون مكان زين او قاصرتهم فلوس او او او ..
((وفي السماء رزقكم وما توعدون ))
سبحان الله .. الرزق كله بيد الله سبحانه وتعالى .. ممكن السنة اللي فاتت حاشتج ازمة ماليا وهالسنة تلاشن هالازمه وصرتي مبحبحه .. الشهر الفلاني طار معاشي والشهر اللي وراه يتني فلوس !
كل هذي ارزاق … في ناس يفكرون يقولون ليش فلان الفلاني غني ومرهي .. هالشي مو شغلنا ! مثل ماقلت الله سبحانه وتعالى هو أعلم فينا ويرزقنا متى ماشاء سبحانه ..
يمكن في وحده يتها فلوس واايد وكانت على وشك تزوج ولدها او بنتها فتصرف هالفلوس عليهم .. وعقب ماتخلص مهتمها ومصاريف العرس تلقين فلوسها طارت !
كل شي فيه حكمة سبحان الله …
يمكن هالانسان ماينفع انه تكون عنده ثروة ربما لو صارت عنده ثروة راح يفسد هالانسان حتى لو كان هالانسان زين وخوش شخص … ويمكن انسام ثاني ينفع انه يكون عنده ثروة حتى لو تشوفونه مبذر وووو .. يمكن اللي انتوا تشوفونه ماتنفع تكون بيده فلوس وانتوا اولى .. يكون فعلا اهو الافضل انه تكون بيده الثروة وانتوا لا .. هذي مجرد فروض مو شرط تكون صحيحه بس اللي ابي اوصله انه الله اعلم بنفوسنا واعلم بمستقبلنا …عشان جذي الانسان لازم يقول الحمدالله على كل حال ..
والفكرة الثانيه حق اللي يحسون انهم في ضائقة ماليا ..
انه كل مصيبة او عسر صدقووووووووووني معاه يسر وفرج وخير ان شاءالله
((فإن مع العسر يسرا *إن مع العسر يسرا ))
سبحان الله تفكروا في الآية .. ان مع العسر يسرا .. مع العسر لازم فيه يسر وتكررت مرتين ورا بعض ..
فاصبري يااختي وشوفي حالة غيرج وحمدي ربج
في وايد حريم اصبروا وقعدوا بملحق سنين وبنين .. وتلاقينها الحين قاعده بفيلا ثلاث طوابق .. ووقتها كانت تقول انا قاعده بملحق وفلانه قاعده بدور ولا شقه راهيه ..
العبرة في النهاية .. عشان جذي صبروووووووووووا ..
واعرف وحده اول ماتزوجت ريلها مسويها يا دهينه لاتنكتين والحين طق وسب .. الله يعينها ويصبرها واهي صابره ومحتسبة الاجر ان شاءالله …
اعرف وحده شافت الضيم والظلايم في بدايه زواجها والحين مريشه ومرتاحه الله يتمم عليها ..
واللي ريلها يعاملها معاملة سيئة…
ترا ممكن يتغير … اصبري وادعي له بالهداية … ترا وارد الانسان يتغير هذي طبيعة البشر … ويقول المثل نار راجل ولا ظل حيطه اسمج ابيت ريلج وبين عيالج والفرج قريب ان شاءالله ..
يمكن حالج اللي انتي فيه بخيره وبشره يكون افضل لج حاليا .. ولاتنسين انه الله سبحانه اذا حب شخص يبتليه ..
اعرف شخص منتف ومتزوج وعنده ولد … يقول مرت علي ايام افكر شلون اوكل ولدي .. واييني شخص مسلفة فلوس ويعطيني فلوس وانا ماذكر اني مسلفه وامشي فيهم اموري …
واذا اتقيتي الله سبحانه وتعالى يجعل لج مخرج ويزرقج … اتقوا الله بكل شي
يا خواتي ترا اللي خلقكم ماينساكم ..
وبهالطريقة ترتاحون نفسيا ولا تهمكم مشاكل الحياة وشقاءها .. لانه بالتقوى تنفرج الامور وتتيسر ان شاءالله .. وانه في امور لو كان ظاهرها تشوفينه شر ممكن يكون خير لج وانتي ماتدرين … وانه مع العسر يسر … كل هذي الامور تهدي وتطمن الانسان اذا اقتنع وتفكر فيها …
|
المشاركة الأصلية كتبت بواسطة حبنا الله عليه
 و الخيرة فيما اختاره الله
ومشكوره على الموضوع ياورق عنب ولو اطووولج آكلج |
لوووووووووووووووول ضحكتيني والله …
يقول المثل كل تأخيره وفيها خيره … يمكن في الوقت الحالي ماينفع تنجبين لسبب الانسان بعقله وجسده مايقدر يستوعب السبب هذا .. ومثل ماقلت الله سبحانه اعلم بنفوسنا اكثر منا …ومو شرط انتي يمكن زوجج في الوقت الحالي مو مؤهل انه يتحمل مسؤوليه الأبوه .. في ناس احملوا واهمه بالاربعينا بالخمسينات في ناس اقعدوا فترة يعالجون بعدين حملوا .. في ناس ماحملو والاطباء قالوا مستحيل وبعدين حملوا !!!
اعرف وحده كان عندها مشكله بالمبايض ولازم تقز ابر تنشيط .. وحملت ويابت بنيه وبعدين ماحملت فترة تقريبا 10 سنين وبعدين فجأه اكتشفت انها حامل !
لاتضيقون خلقكم … الله سبحانه اعلم بالخير لكم وكل شي يصير لكم خير خير باذن الله وعسى الله يرزقكم الذرية الصالحة …
وترا الاستغفاااار وكثرة الصدقات زين .. وايد ناس كانوا مايحملون ولما اتقوا الله سبحانه واكثروا من الاستغفار والصدقات وصفوا النيه مع الناس تلاقينهم حملوا ماشاءالله …
طبعا ماقصد انه الانسان يتقاعس ويقول متى ماصرت اصلح للانجاب احمل وبس ..طبعا انا قلت هالكلام كفرض ممكنينطبق عليج وماينطبق على غيرج
بس الانسان لازم يحااااول يحاول ويسعى … التواكل مايصير لازم الانسان يسوي اللي عليه ويتوكل على الله سبحانه .. بس اللي اقصده انه الانسان لازم يقتنع بالنتايج ويحمد الله على كل حال ..
وكل الرسايل اللي كتبتهم اقول لهم انه مو معناته الانسان يتقاعس .. لااااااا يجد ويجتهد يحاول يدعي يطور من نفسه يتطلع الى الافضل مع الرضى التام والحمد والشكر لله العزيز الكريم
واعظم نعمة ترا نعمة الاسلام ونعمة الصحة والعافيه .. تاكلين تشربين تمشي تشوفين ترا والله انها نعم عظيمة تستوجب الحمد والشكر …
|
المشاركة الأصلية كتبت بواسطة مرمر
كل ما جيت احاول اني اقرا موضوعك احس بتعب فضيع وضيقة وتعز على نفسي واتذكر ماضي التعيس الحمدلله على كل حال
|
هلا مرمر … شوفي صعب تلقين انسان راضي عن حاله او تلاقينه سعيد ..
يعني انا صج اني كتبت هالكلام والحمدالله مقتنعه فيه .. بس هم تييني اوقات اتضايق مثلا واقول ابي شقه ابي جذي بسوي جذي واي ماعندي .. والاسبوع اللي طاف قاعده ابجي خخخ واتحلطم .. استغفرالله
بس لما اتذكر هالكلام اللي كتبته لكم اتحسن واكلم نفسي واحاول اني ابعد عني وساوس الشيطان .. لانه ترا ابليس اهو اييب الهم بيقولج شوفي بنت عمج مستانسه مسافره شهر العسل وانتي ماسفرتي كلش .. بنت عمج شرت سياره وانتي ريلج ماعنده يحط لج وووو ..
مثلا انا للحين من تزوجت ما أثثت لي غرفة نوم سنعه .. ولا رحت تغديت بفندق نفس باجي البنات ايام الملجة خخخخخخخخخخخ واقص عليكم لو قلتلكم اني ما اتضايق امبلى اتضايق واكتئب ومرات الاكتئاب يستمر ايام ولا لي خلق احد… بس لااااازم لاااازم هالكلام يكون في بالنا ونقتنع فيه لانه اهو الشي الوحيد اللي بيخليج عقب هالتفاكير تتطمنين وتهدين لو شوي ..
الله كريم الحمدالله دانسغ كوين .. استانس لما تشاركين بمواضيعي خخخخخخخخخ ولا هانوا باجي البنات حبايبي
واذا الله كتب وماصار لي نصيب انا راضيه الحمدالله عندي شهادتين وعندي امي وابوي الله يخليهم لي ولايحرمني منهم….
مشكوره حبيبتي على الموضوع…لان وايد بنات بس اتصك العشرين تقعد اتحاتي على الفاضي