بنات بجهز جنطة المستشفى و بسألكم سؤال

اشلونكم بنات انا موعدي انشالله اول 3 و بجهز جنطة المستشفى باجر انشالله بس بغيت اسألكم ملابس البيبي اليدد اللي شريناهم نغسلهم في صابون بيبي قبل لا انحطهم بالجنطه والا مو لازم و عادي انحط فيهم كومفورت والا مو زين للبيبي؟ و جم غيار احط للبيبي؟ و مادري احد شتوي والا صيفي ؟ نيوبورن والا 0-3؟ و مشكوووووووووورين والله يهون على كل حامل يارب و نولد بالسلامه

حبيبتي لازم تغسلين ملابس البيبي بصابون البيبي الوردي الي ينباع بالجمعيات وفي ملطف ماركة داوني بس حق اليهال بس مو شرط انا كنت اغسل من غيره وضربيهم اووتي وحطيهم بالجنطه

حطي شتوي لان الياهل متعود على الدفا في بطنج وحطي نيو بورن

حطي 4 غيارات احسنلج يزيد ولا ينقص وحطي شي حلو لان احتمال يصورونه

الله يهون عليج ان شاء الله وتولدين بالسلامه
بخصوص الصابون صح مثل ماقالت nm 3li في صابون حق اليهال وانا كنت استخدم صابون لونه وردي عليه صورة ياهل وحطيله شتوي احسن واربع غيارات كافي
الله يقومج بسلامه

حبوبه غسلي ملابس البيبي بصابون ( فلليتي ) لونه وردي بالجمعيه موجود و مالداعي كومفرت كلش اول الاشهر عشان ما تحسس بشرة البيبي و نبو بورن احسن من 0-3 بالذات حق اول اسبوع و تقريبا حطي طقمين حق كل يوم بتقعدين فيه ( الطقم فنيله داخليه و اوفراول و سدريه و مهاد و حطي لحاف و كنبل ضروري )
و انشالله تفرحين بشوفته أمين

وااي الله يهون عليج انا اخر موعد 18 يعني عقب 5 ايام وزهبت اعراض البيبي بس ماغسلت ملابسه تصدقين

حطيتهم جذي مادري لازم يتغسلون

بس ماحطيت حفاضات ولاشي لانه كل المستشفى راح يلبسونه الحفاظات حتى المميات ماحطيت

انا بعد ماغسلت لازم نغسلهم؟

والله انا غسلتهم وقسمتهم بجياس نايلون وايد ارتب
حطيت داخلي وافرول و دسوس ومهاد وكبوس
حطيت ارع اطقم احتياط نيوبورن طبعا

غسليهم بصابون يهال نتفه مو وايد
ونقعيهم عقب بنتفة كومفورت وبعدين نشفيهم واكويهم
الكميه تعتمد على مدة قعدتج (عدد الاطقم ضعف عدد ايامج بالمستشفى)
يعني 4 اطقم للطبيعي و8 للقيصري الله يبعده عننا وعنج
وحطي مميه وحده صغيره تحتاجينها اذا بتشربينه ماي
ولاتنسين الفوط الصغيره تحطينهم تحت خده اذا منسدح علشان اذا استفرغ ما يوصخ عمره والسرير
والمقاس نيوبورن

حبيبتي ملابس البيبي لازم تنغسل في صابون بيبي بس من غير كو مفورت او اي شي ثاني و حق المستشفى اخذي نيو بورن

حبيبتي لااازم تغسلين الملابس بصابون فيلتي و تقدرين تحطين داوني الخاص بملابس البيبي، بس الاهم انج تقسمينهم في اكياس نايلون نفس ملوت الساندويش مكتوب عليهم 2غالون زيبر باغز،،، انا كنت احط 10 اكياس لانه كل مرة اييبنه لي اعطيهم كيس لانه مع الرضاعة يوصخ الهدوم ،،،و حطي في كل كيس مهاد + بجامه + فانيلة + كبوس + صدرية + فوطة صغيرة كبر كف اليد ( تلقينهم بمذركير 10 فوط بيض اطرافهم ملونة) و بالجنطة تحطين 3 كنابل للبيبي و يفضل البجامة للبيبي خامتها فوطة مو المخمل الشتوي لانه حار عالبيبي ويمكن يحمر جسمه و حطيلج بدلتين حلويين للتصوير و لاتنسين الكيسة للبيبي عشان لما تطلعين من المستشفى تشيلينه فيها ويكون ادفى له.
و لا تنسين نفسج ،،، روحي صيدلية الغانم و اخذي منه سراويل شاش ماركة مولي بانتس و هذي صورة العلبة و السروال
اهمه استخدام مرة وحدة يعني كل مرة تدخلين الحمام تغيرين ، و الصراحة وايد مريحين و لا تحسين فيهم و لا يضكون البطن او الارداف.

بعد قلبي بنات الله لا يحرمني منكم و يهون على كل حامل ياااااااا رب

هلا والله اختي والله يسهل عليج..

مثل ما قالوا الخوات انا اغسل ثياب البيبي بفلتي (صابون الاطفال الوردي)ولاتحطيم كمفورت انا قريت دراسة بالانترنت مسويينها في امريكا ان حساسية الصدر عند المواليد والاطفال من الكمفورت والمواد اللي فيه..

وحطي حق البيبي شتوي لان لازم يتدفى وهو طالع من البطن معروف ان الرحم دافي عليه..

وحطي غيارات ع حسب كم يوم بتقعدين في المستشفى ولكل يوم حطي غيارين احتياط لانه البيبي يرجع وبعض الاحيان مع تغيير الحفاظ(الله يعزكم)الثياب تتوسخ..

وثياب البيبي 0-3 واحتياط واحد او اثنين 3-6 اذا البيبي كبير..

وكثري من الفوط الصغيرة عشان تحطينها تحت راسه حق الترجيع..

والله يسهل عليج وعلي وع كل حامل

مو لازم انغسل ملابس البيبي انا بصراحه اول مره اسمع والملابس بتكون نظيفه ويديده ماله داعي تتغسل

انا حطيت من كل شيء 3 حقي وحق البيبي

انزين بنات سؤال ثاني من وين تشترون دوا النفااس (اللهوم) ماكو جاهز مخلوط؟

في عطار(حواج) يم مجمع منيرة اللي بالسالمية اللي فيه فشن مل..يبيع العلبه بدينار ونص جاهزة