بموووت من التفكير ودي اصرخ عشان حد يسمعني وينصحني

مرحبا بناااات

ابي حد يساعدني اويخفف عني اشوي
انا مخطوبه على واحد معاشه على قده
وانا متعوده عالصرف الزايد
بس الحين احاول اتأقلم مع الوضع غصبن عني وراضيه بالوضع والحمدلله
بس اعصب من داخلي واموووت ميه مره لاني احسه دايما يشتري الشي الرخيص وهالشي يقهرني بس اسكت
حتى المطاعم يفكر اذا مطعم قريب يعني رخيص واذا بعيد غالي
جم مره تناقرت معاه عشان مايرضى يوديني مطعم بعيد اشوي اقوله مب غالي واهو يقولي مابي اروح مشاوير بعيده اويقولي ويش ضمنك اكلهم حلال لوحرام
مع الرغم انو دايم انا معاه نطلع مسافات ابعد من المطاعم اللي مايبيها
اهو مسكين يحاول قد مايقدر يسعدني وحتى لومايابلي هديه غاليه ييب لي هديه بسيطه ورخيصه , صج اني انقهر وانبط من داخلي بس اقول يزاته يابلي لوواحد غيره ماياب
والشي اللي يقهرني زود اذا قلتله اخوي شراله سياره وسافر خمس دول مشالله في شهر واحد
يقوم يقولي المفروض مايسافر خليه ييمع فلوس احسن ويبنيله بيت زي ماانا بسوي
اقوله اشلون بتيمع لبيت وراتبنا 200 اشلون بنعيش يسكت ويقولي لا موالحين ادا تعدلت احوالنا واهو في قلبه يشيل من 200 عشان بيت المستقبل
يعني احس حتى لواتوظف زي الناس راح يبخل علي ولاراح يعطيني وبيمع للبيت
واللي قاهرني اكثر انا الحين بسكن في بيت ابوي لحد ماتخلص شقتنا اللي مدري متى بتخلص عشان الفلوس
ويقولي شنو تخيلووو !! يقولي الحين راتبي 200 دينار بس اذا احتجنا شي لشقتنا الجديده اللي بنبنيها بناخد من ال 200 دينار
تخيلوووو يعنييييييييي اشلون بنعيش ابي افهم اشلون بنعيش , بعدين قلتله شنو هالكلام قام قالي عالاقل ناخد 20 او10 دنانير نيمع من 200 دينار يقهر يقهررر
لدرجه اني قلتله مدام راتبك جديه بنأجل سالفه الحمل لين مايتعدل حالنا
قام قالي الولد ييب رزقه معاه وحسيت كسرت خاطره مسكين وصار حزين
والحين افكر اقول ادا تزوجت اشلون بعيش وبصبر , من اشوي قريت لبنت في المنتدى تقول مي صابره راتب ريلها 500 دينار
وبعدها تدكرت مآساتي عيل شنو تقول عني راتب ريلي 200 دينار بس !!!
الله يصبرني ويرزق خطيبي بوظيفه سنعه زي الناس
انا صحيح ندمت اني وافقت عليه بس خلاص حبيته وده نصيبي وماحد ياخد غير رزقه وراضيه بهالشي
بس التفكير دابحنيييييييي وماانام الليل افكر اقول اشلون بعيش , اشلون ادا يبت عيال اشلون بنصرف عليهم
خايفه وافكر واحاتي حييييييييل بمستقبلي وفي نفس الوقت مابي افكررر وهروموناتي منعفسه دورتي ملخبطه حيل حيل ماتجيني بالشهور
التفكير دبحني وابي اشكي همييي يمكن القى نصيحه اوكلام يصبرني ويخليني قويه
ادعو لخطيبي يوظغونه بوظيفه زي الناس عشان يستقر حالنا لاني جد جد تعبت خاصه لما اشوف صديقاتي وخواتي وكل وحده تقول :
ريلي عطاني وريلي وداني وانا اموت من داخلي بس اسكت ومابي حد يحس اني ضعيفه
نصحوني واشلون اشيل هالتفكير والوسواس من راسي لاني تعبت موقادره اتحمل بمووووووووووووووت

الله يهون عليج حبيبتي الصبر مفتاح الفرج

انتي بروحج قلتي انج حبيتيه وهذا نصيبج يعني مقتنعه فييه وبالوضع

اشتغلي انتي بعد واهو خل يدورله مكان ثاني احسن اذا مالقه خل يشتغل صبح وعصر والشغل مو عييب بتتعبون اول شي بس بعدين بترتاحون
الله يهون عليكم

من راقب الناس مات هما مالج شغل بالناس يمكن الله معطيهم مادة بس ناقصة عندهم اشياء ثانية بس انتي الله عطاج واحد يعزج ويحبج والفلوس اتيي مع الأيام بإذن الله

انتي تقولين رضيتي فيه .. انتي لو تحبينه راح تقولين راضية اعيش معاك حتى لو في خيمة

حبيبتي امبين على ابوج انسان طيب ماراح يقصر معاج

والله يسهل امورج .. وخطيبج مسكين ترى لأن معاشه على قده يفكر بهالتفكير وييبلج اشياء رخيصة .. يامعودة زين يذكرج ابشي اللحين اغلب الرياييل إللي عندهم فلوس مايفكرون بحريمهم بس يفكرون بنفسهم

صبري معا الريال ودايما قوليلة حبيبي الله يرزقك وادري فيك نبيل وشهم لو عندك جان ماتخلي علي قاصر وادلعني
كبري نفسج في عينه ..

ترى صح تفكيره 10 على 10 بيمع مبلغ شتسوين هذا رزقة والله يزيدة

كوني متفائلة وايجابية معاه عشان تفتحيله باب خير..

وانتي اذا تشتغلين ساعديه واذا ماتشتغيلن حاولي ادوريلج وظيفة

وصح كلامة الياهل ايي رزقه معاه

وابوج يدري ابمعاشة وساكت وراضي هذا دليل ان ماراح يقصر .. وانتي عاد صيري شاطرة اذا ابوج ساعدج

واستغفري وايد والله يفتح عليكم رزقه

تسلمين ياقلبي عالدعوه الحلوووه مشكووره ماتقصري وربي يثبت حملج يارب
ربي يسمع منج بس شسوي مالقيت ولاوظيفه جان اساعده اشوي
واهو لقاله من فتره شغله ثانيه تمشي حالها الراتب 150 دينار بس يومين قعد فيها وبعدها تهاوش ايا المدير وطلع
شفتو الحظ كيف

ريلج بدون يعني ولاشنو؟؟

حبيبتي كل واحد يمد ريوله على قد لحافه

مسكينه رفيجتي انا بدون ماخذه واحد معاشه 150 شفتي 150 مو 100

قولي شلون هذول بيعيشوون

انتوا وين بتسكنون؟؟

ولازم تفكرين انتي تشتغلين حتى لو معاشج 120 اهم شي تشتغلين تساعدين ريلج

وعلى ماتحصليلج وظيفه اتفقي معاه يعطيج مثلا 20 او 30 تخشينها عندج لي اخر الشهر تصرفين عليكم

مثل ماجلة البيت وهالسوالف عرفتي

الماجله روحي الشويخ وايد اسعارهم رخيصه

ومثلا بالنسبه للهدوم عندج وايد اسوقه اسعارهم حلوه مثل السالميه ستي سنتر كل شي رخيص

اهم شي لاتتكيسلين اشتغلي لاااااااااازم تشتغلين حتى لو اشغال يدويه

اي شي الشغل موعيب لاتقعدين ريل على ريل وريلج يصرف
ترى الفقر يقتل الحب

وديري بالج تبينين له انه موقادر يصرف بالعكس قوليله الله يهونها

واني مو مخلي علي قاصر ابد من هالحجي

وبالنسبه للطلعات ياحلات مطاعم المجمعات مايطلع حسابكم انتي معاه 6 دنانير مثل مطاعم الفاست فود فهمتيني
وطلعوا تمشوا ومن هالسوالف

حبيبتي بس لاتنسي 200 دينار ويش تييب في هالزمن ؟؟ واهو يبي يشيل منهم 20 او10 دنانير
مومعقوله يعني
شسوي بعد لاني لاقيه وظيفه ولاشي
وابوي حاس بوضعنا لدرجه انه بيدفع شغلات وااايد عن خطيبي وكدا شغله انا مخليه الامور لي مع ان المفروض خطيبي اللي يدفعهم
وانشالله تفرج ويفتحها ربي علينا يارب

دوريلج وظيفة ايد وحده ما تصفق ! حتى لو ما لقيت حاولي و حاولي و حاولي ..
وبعدين انتي قلتي انا متعودة ع الصرف يعني حالتج المادية او حالة اهلج المادية زينة المفروض يساندونج لما يتسنع الوضع ..
و اهوه خل يشتغل الصبح و بارت تايم العصر مثلا عند خدمة العملاء في زين او الوطنية ..
و خل يكون الصرف على الاشياء الضرورية فقط لحد ما يتحسن الحال ..
و ما بعد العسر الا اليسر ان شا الله

حبيبتي يعني شنو بدون ؟؟ مافهمت تراني موكويتيه
اوقات مااقدر اضبط نفسي واحسسه انه مقصر معاي بعدين يكسر خاطري واقوله انت مومقصر بس احس اني مضغوطه اشوي مابي ازعله بس اقولها مو من قلبي طبعا
ولوتشوفيني خايفه حيل حيل ودايما اقوله انت مومقصر علي بشي يعني بس عطيني مصروفي الخاص ولابي منك شي ثاني
خايفه يقطع عني المصروف لان الريايل ماليهم امان , اليوم عشاني مخطوبه بيعطيني باجر لين عرسنا بيقولي مافيه مصروف معين ومره يعطيني ومره لا , اذا يبي ياخد 10 دنانير من الراتب ويش بقى !!!!!!!!!!!!
هالشي خايفه منه حييييييييييييييل

الله يعينج

عوديه يعطيج مصروف من البدايه

ولاتفكرين بالمظاهر والخرابيط ولاتفكرين تحسسينه انه مقصر معاج

انتي سعوديه ولاشنو

توظفي وساعديه
وبيمشي حالكم

لو كنتي من الاساس حالتج الماديه ضعيفه جان قلت لج عايدي وصبري
بس طالما انتي متعوده على الصرف فبيت اهلج صدقيني صعب راح تتأقلمين على انج تعيشين بمستوى اقل واقل بوايد بعد
الزواج لازم يكون متكافىء من كل النواحي
من ناحية النسب والمذاهب والمستوى المعيشي
هذي اساسيات يعني ولو ماصارت يكون في بين الزوجين حب كبير وعميق ممكن يخليهم يتخطونها
وانا ماشوفج بلغتي هالمره من الحب مع خطيبج والدليل انج متذمره وايد ومومرتاحه وهذا شي طبيعي انا لو مكانج بحاتي وبفكر نفسج
شوفي حبيبتي
انا نصيحتي لج….
ابوي دايما يقول لنا كلمه وانا اشوفه صاج فيها
دايما يقول بين الزوجين اذا دخل الفقر من الباب طلع الحب من الشباك

وانا اشوف عالكلام مو مجرد مثل او تعبير
انا اشوفه واقعي 100% لان الزوج وقت مايكون لاهي بشلون يوفر ويقتصد ولا ياله ظرف طارىء واضطر يصرف عليه تلاقينه بيتكدر وحالته النفسيه بتتعب وهالشي بيأثر عليج انتي طبعا يالزوجه وبتنعكس هالنفسيه على البيت كله
غير طبعا اذا احتجتي شي ضروري ولا صار عندج عرس ولا عزيمه ولا التزام وماقدر يعطيج لان ماعنده وشوفي عاد شراح يترتب على هذا كله من احراج وزعل وشعور بالنقص والحرمان خاصة ان كل اللي دار مدارج من اهل و خوات وصديقات عايشين برهاة و رخا

والله يا اختي اللي يقولج الماده مو ضروريه غلطان
الماده شي وايد مهم في حياتنا خصوصا بهالوقت اللي احنا فيه.. انصحج تفكرين زين حبيبتي وانتي اوزنيها بمخج شوفي اذا بتجاملين فبداية زواجج عشان ماتحرجينه على قولتج ماراح اتمين تجاملين طول عمرج
وحطي بابلج ان هذا وضعه اللي بتمين عليه انتي يعني ماراح تصير معجزه فجأه ويصير غني وعنده فلوس لا هذي حالته ولازم تأقلمين نفسج عليها شوفي بتقدرين ولا لا

وعسى الله يوفقج

عليج بالاستغفآر
قال تعالى في كتآبه العزيز
" فقلت استغفروا ربكم انه كان غفارا يرسل السماء عليكم مدرارا و يرزقكم باموال ٍ وبنين ويجعل لكم جنات ٍ ويجعل لكم انهارا "
صدقيني عودي نفسج وريلج على الاستغفار يوميا ً
وشوفي شلون حالج بيتبدل بقدرة قادر !

ربي يوفقج ان شاء الله
وايسر اموركم

هذار ردي عليج وتمقلي عدل بالحجي وهذا كلام افضل الخلق مو كلامي
قال صلى الله عليه وسلم { خذوهم فقراء يغنيهم الله من فضله } ..!!

يا اختي تصبري واكسبي الاجر من ورى عشرتج للريال وباجر باذن الله ربج يرزقج كل خير اعطيج مثال صغير انا في بداية زواجي كون ريلي يدرس شوي كانت حالتنا لج عليها بس مع مرور السنين تخرج واشتغل شغله لا اله الا الله ومركزه صار زين ووفرلي البيت الكبير وسفرات وطلعات ولا امخلي علي قاصر ولله الحمد تصبري يا اختي واحتسبي الاجر والله يوفقكم