بموت من القهر ساعدوني :(

السلام عليكم
بنات انا رفيجة صاحبة اللنك مو هذا موضوعنا
المهم انا كنت احب واحد من جم سنه والحمدلله ربي جمعنا واحنا الحين مخطوبين والملجه اهيا نفسهاا العرس وبتكون بعد العيد
المهم خطيبي متغير وايد ماصار يدق مثل اول , اول كنا 24 مع بعض وكله ماله خلق لما اكلمه انا قلت يمكن مل من المكالمات لان بينا سنين واكيد لما انتزوج بتتغير حياتنا
المهم اليوم المغرب دق علي وقالي ان بيروح السوق مع اخوه الصغير عمره 15 المهم قلت اوكي بس توصل دق علي وصل ولا دق دقيت عليه الساعه 7 وشي مارد علي دزيتله مسج عسا ماشر ماترد رد علي بعد نص ساعه مسج يقول كيفي !

دقيت عليه مرتين بعد المسج مارد ودزلي مسج قاعد اتعشى دقيت بعد ساعه ولايرد علي اخوه !!!!! انا انصدمت حدي قتله وين فلان وبعدها وخر السماعه يبين انهم قاعدين يتكلمين قالي قاعد يتعشى قتله عطني اياه بكلمه وهم وخر السماعه ولا ينسد الخط بويهي !!!! انا اهني بغيت اموت من القهر رديت دقيت ولا سكر جهازه :"( امبيه انا شسويت ؟؟؟؟
امانه بنات قولولي شسوي ؟ انا فكرت اني ازعل واقوله ماتراضيني الا لما تتأسفلي جدام اخوك
يعني فوق ما اهوا متغير علي وكله امعصب وماله خلق هم يقهرني زياده بحركاته
تكفون بنات شورو علي شسوي احس بركااان بقلبي قاعده استغفر والله كريم

بسج حنه ورنه علي الريال طفشتيه مو لدرجه هذي كل شوي داقه عليه اهو مو ياهل خايفه يضيع ولا ينحاش
مالومه طفش اثقلي شوي

هههههههههههههههه من تعليقج هههههههههههههه نوال مت من تعليقج اهني ومن سالفه الباكستاني خخخخخخخخخ
هذا رايي بموضوعج حبيبتي
هههههههههههههههههههه حبيبتي شكوووووو يتأسف جدام اخوه؟؟
بعدين ليش اذا يوصل المجمع يدق عليج؟؟؟
خلاص اهو قالج طالع مع اخوه بعد ليش يدق اذا وصل؟؟
انتي فجي شوي مو كله مكالمات وكله تبين تعرفين متى يرجع وكل ساعه تلفون؟؟
بعدين يحس ان اهو مقيد وملتزم بشي
واهو مو بطريج سفر تقولين له اذا وصلت دق علي
انا اقول تخففين مكالمات بيشتاقلج اكثر
لاتقطين نفسج قطه جذي عليج
وكلميه بهداوه فهمي منه ونطري ليمن اهو يدق عليج

شكرا على الرد

بنات خفو من تعليقاتكم عالبنت
واللي ماتقدر تساعدها خل تدعيلها وبس
حبيبتي انتي لا تدقين عليه لين اهو يدق عليج
وبكل هدوء سئليه عن اللي صار
يمكن في شي صاير وانتي ماتدرين عنه يمكن الريال صارتله مشكله ومتضايق ومايبي يكلم احد
احسني النيه
الله يوفقج

مشكوره حبيبتي
وان شاء الله بخفف مكالمات
بس السالفه اهيا موحلوه بحقي يخلي اخوه يكلمني وبعدها يتسكر الخط بويهي !! حسسني اني ماعندي قيمه عنده

ولله احس انج فاهمتني عدل
مشكوره ياقلبي وهذا الي بسويه ماراح ادق

حياتي لا تدقين ولا تدزين مسج نطري عليه اهو يبادر بهالشي ووقتهاا بتعرفين شنو فيه يا قلبي ..

حبوبه
خفي عليه
ثقلي اشوي
مو لازم اتحسسينه انج المحقق كونان

مادق خلاص لاتدقين
نطريه
خلج عاديه مو حنانه

على الفكره الرياييل يكرهون المره الحنانه

نطريه واهو بيدق
وبينيله انج متضايقه من تصرفه
بس طبعا بدلع
مو نفس خايسه

لايقب منج

اي بس لا تدخلين طرف معاج وخلي السالفه بينج وبينه مالج شغل بخوه بعدين احس مو حلوه تقولين خل اخوك يعتذر اتوقع اهو ماراح يرضى ان اخوه ريال يقولج اسف
بس انتي اذا قالج انا بطلع مره ثانيه لا تقولين دق علي اذا وصلت خلاص انتي عارفه اهو وين راح ومتى بيرد
بس قوليله دير بالك على نفسك حبيبي لا تحسسينه بالتقيييد
احنا البنات تطق جبدنا لما احد يقولنا وين رايحين وين رادين شنو سويتو فمابالج ريال مو متعود احد يقوله
والله يوفقج حبوبه

حبيبتي لا تدقين عليه كلش كلش من عقب حركته لو صج يحبج وشاريج مرده بدق يعني الحين كلش لا تدقين ولا تدزين مسج الا اذا اهو دزلج مسج ردي عليه بمسج او دق ردي عليه وفهميه عاد انج زعلانه من حركته ومو حلوه بحقج ابصراحه لو انا منج اشيله من بالي لان انتي مثل ماقلتي ماسويتي شي واهو علي حركته هذي يا انه مايبيج او انه كان متضايق منج بشغله والله اعلم

مشكوره يابعد قلبي وان شاء الله ماراح ادق ولا ادز شي بشوف شنو اخرتها معاه

مشكوره حبيبتي على الرد وان شاء الله بسوي الي قلتيه

تسلمين يابعد قلبي كلامج عين العقل

مشكوره ياقلبي على الرد
من ناحية انه مايبيني لاولله والنعم فيه ادري انه يحبني بس مادري ليش سوى حركته هذي البايخه انا قلت يمكن مل من المكالمات ومن ناحية متضايق ابد ماضايقته بشي بس اهوا مزاجه متعكر هليومين
مشكوره ياقلبي مره ثانيه