|
|
يا حيالله بنات المنتدى ………..
الله يسلمكم اليوم ودي اقصلكم قصتي مع السمنة من اولها لاخرها …طبعا انا علاقتي بدت مع المتن منذ الازل يعني بالاضافة الى انها وراثة يعني البيت كله من اخوان وخوات وامي وابوي ماشالله كلنا من الاحجام الكبيرة غير العوامل المساعدة مثل نفس الماما العجيب بالطبخ وكل ما شافت الصحن بيخلص تقول عطوني انشب لكم انتوا يواعا ويايين من المدرسة تعبانين وخذ على هالحال ليمن ماشالله تعدينا ال 100 اتوقع كل اللي بالبيت لدرجه ان الخدامة يتنا عصلة من ديرتها والحين ما تدش من الباب ما علينا المهم طبعا لما تخرجت من الثانوية ودخلت الجامعة واشوف هالاجسام الحلوة واللبس الكوووول عالبنات قلت لا اهم مو احسن مني وبدى مشواري مع الريجيمات بمختلف انواعها واكثر فترة كنت اسوي فيها ريجيم اسبوعين واشتاق للاكل واقول حرام الله معطينا كل هالاكل اللذيذ احرم نفسي منه ما يصير يالله مو لازم كل البنات حلوين ولا كل البنات رشيقات وظليت على هالحال لمن اخر كورس لي بالكلية وطبعا ياني فارس الاحلام بموتره الازرق وماشالله عليه جسم رياضي ورشاقة اللي من ما خذته صارلي 6 سنين عنده موعد النادي مقدس لو شنو يصير ما يطوفه حتى لمن نسافلر اول مانوصل الفندق يروح يدور النادي وين مكانه وتخيلوا بالخطبة يوم قعد معاي شنو كان شرطه ما يبيله اكيد ابيج تضعفين وتدشين نادي وانا اضحك واقول انشالله اصلا انا ناوية ادخل من غير ماتقول وقرب موعد العرس وانا اضغط على روحي طبعا حرمت نفسي من كل شي هالشهرين في سبيل لوك العروس اللي المفروض يكون واو والحمدالله كان شكلي يومها حلو ومرتب ماذكر شكثر نزلت بس شكلي تغير وظليت على هالحال ليمن ولادتي الاولى وصج يوم طلعت من الاربعين ضعفت وكل اللي كان يشوفني يقوللي شحلاتج مع الضعف وبيني وبينكم هذا اقل وزن وصلت له بحياتي ولكن يا فرحة ما تمت عقبها ب 6 اشهر زدت تدرون جم 20 كيلو وبس الميزان علق وقام ياخذ بالزيادة وحملت وولدت مرتين عقبها وانا افكر ياربي ريلي اسم الله عليه شزينه وشزين جسمه واحس شكلي غلط لما امشي معاه والا اقعد يمه انا شمتني واهو مختفي يمي والمشكلة ان عيالي كلهم ناعمين وضعاف على ريلي وكل ما اروح مكان معاهم لازم اسمع الجملة المشهورة يقولون لهم ليش انتوا ضعاف جذيه مساكين اكيد امكم تاكل الاكل كله وما تعطيكم والسالفة اللي صج مليت منها اكثر سالفة ماشالله انتي حامل متى ولادتج واذا بغيت اسافر والله فشلة المضيفات بس ادخل الطيارة يسالوني يايبة ورقة من الطبيب انج تقدرين تسافرين وانتي حامل لدرجة اني قمت اقول حق ريلي يبا اللي يسالك مرتك حامل قول اي وفكنا ادري طولت عليكم والحين ببلش بالمهم
قمت ادخل المنتدى على قسم العمليات الجراحية واشوف تجارب البنات بالتكميم وتحويل المسار والحلقة قلت عملية يالله كلها يومين وعادي لاني اصلا بولاداتي كلها كنت قيصرية فاكيد هالعمليات ماراح يكون عوارها اكثر من القيصرية بما انهم يسوونها بالمنظار واول شي سويته اني قمت ادخل عالنت واقرى اكثر عن كل عملية وشنو محاسنها ومساوئها وطريقة العملية شلون وشنو اللي ينشال وشنو ينحط ومن هالسوالف وبلشت عاد ادور عن الدكاترة السنعين طبعا هذا ليلحين انا مادري جم سعر العملية بس اللي اعرفه اني ابي تكميم لانها تحافظ عالجهاز الهضمي يعني صج يقصون المعدة بس 20% منها يكون موجود يعني العوض ولا القطيعة وقمت ادقدق عالدكاترة وانصدمت بالسعر شدعوة من 2500 -3000 قات لا يبا من وين اييب الفلوس ومو لازم خلاص وفي يوم من الايام قلت ليش ماروح مبارك يسوون هالعمليات للي نفس حالتي المهم رحت ودخلت عالدكتور وشافني وقرر ان يسوي تحويل مسار وقاللي ان شالله يحوشج الدور بعد سنتين قلت الله شدعوة انزين واذا بواسطة ضحك وقاللي مو انتوا الكويتيين كلكم عندكم واسطة وهذا بالواسطة ان شالله بعد سنة ونص وطبعا ضاق خلقي وطخيت ونسيت السالفة وعقب فترة حماتي شيشتني ماشالله اشوفها تدخل عملية وتطلع من عملية واهي مو متينة بس تشفط من مكان وتشد من مكان وتعبي بمكان اسم الله عليها ماخلت شي عاد بيوم بغت تروح تراجع قلت لها بيي معاج الدكتور يشوفني طبعا دكتور جراحة عامة بس غيرت رايي قلت ليش اسوي عملية معدة وانطر سنة وبعدين اشد اروح اسوي شفط وشد ويطلع نفس السعر تقريبا وشافني الدكتور وقالي عادي اشيل بطنج واذا تبين يا فخوذج يا زنودج اختاري وقات خلني افكر وعقبها بيومين رحت دكتور تجميل قلت اخذ راي ثاني وطبعا حسيت شوي المادة ذابحته مع ان البنات وايد يمدحونه قالي اسوي لج العملية على ملرحلتين اشفط واشد واكبر صدرج واعبي المؤخرة ومادري شنو المهم كله يكلف 8000 دينار وقلت هم خليني افكر ………قلت حق نفسي انزين هذول التجميل قالوا جذي خنشوف المناظير شيقولون ورحت عند د.هيثم الخياط بدار الشفا صج من دخلت وايد ارتحت له واهو وايد محترم وحبوب وقام عاد يسالني شنو نظام اكلج وشنو تحبين ومن هالحجي واخر شي قاللي شنو تبين قلت ابي تكميم قاللي اوكي بس سوي سونار وشوية تحاليل وبعدين تعالي وصج رحت حطيت موعد للسونار وثاني يوم طرت المستوصف اسوي التحاليل واللي كان موهقني شي واحد اني مقدمة اوراق بنتي للعلاج بالخارج والموافقة طالعة بس ناطرين الموعد ما يندرى بعد اسبوع شهر شهرين طبعا هالكلام كان بتاريخ 10-7 وظليت معلقة لين يوم الجمعة اللي طاف يعني شهر دقيت على لندن وقالولي موعد بنتي 14-9 تكفى ادعوا لها الله يشافيها ويعافيها ويقومها بالسلامة حبيبتي ..قلت الحين عرفت الموعد السبت خذيت تحاليلي وسوناري ورحت عند د.هيثم قالي متى تبين العملية قلت له عقب باجر قالي افطرج برمضان قلت مع موعد الدورة مايخالف وطبعا العملية قاللي تكلف 2800 والاقامة 3 ليالي بالمستشفى واول ما رديت دقيت على ابوي قلت له ابي سلف الف وساحلت خالتي ام ريلي تسلفت منها الف وانا عندي هم الف وماقلت حق احد اني بدش المستشفى بس ريلي اكيد وخالتي لان عيالي عندها وبنت عمي حيل قريبة مني وقلت اهي توديني المستشفى وبس ………… بعدين اكمل لاني من زمان قاعدة اكتب وجرحي قام يحرني بقوم اتمشى شوي ولنا لقاء ان شالله
وألف الحمدالله على سلامتج ، وعلى اتخاذج القرار السليم انج تسوين عملية التكميم قبل العمليات التجميليه
وزنج راح ينزل انشالله والعملية راح تكون عامل مساعد كبير في سهولة نزوله ، بس ابيج تهتمين بالفيتامينات عقب شهر من
العملية وممارسة الرياضه او حتى المشي نص ساعه باليوم علشان تشدين جسمج وتصكين على زوجج
ويفرح قلبج فيها وتشوفينها عروس
إنشالله تسافرين مع بنتج و تردين إهي متعافيه إنشالله و انتي ظعفانه ومسويه نيولوك
قلبي معاج يا أخيتي
الله يحقق مرادج
بس لاااااااااااااا تهملين الرياضه
عشان ماتدخلين بمتاهات الشد
من يبى الدح مايقوول الاح خيتي
الحمد الله على السلامه
و ماتشوفون شر و الله يقوم بنيتج بالسلامه ان شاء الله
منتظرين البقيه
و ماتشوفون شر و الله يقوم بنيتج بالسلامه ان شاء الله
منتظرين البقيه
مبروك الرشاقه حبيبتى