اهم النصائح للمعلمات الجدد للمتوسط وثانويه

عزيزاتي بما انا معلمة جديدة اتمنى من معلمات الى سبقونا يعطونا اهم النصائح بنسبة للادراة والزميلات معلمات

والطالبات والكل يستفيد من تجارب الاخرين والنصائح

وكيف المعلمة الجديدة تثبت وجودها وتكون مميزة

اتمنى الكل يشارك

نصيحة أولا عليج بالنية الصافية ولاتفسرين اي كلام ينقال لج بسوء نية لان ياما معلمات طاحوا بمشاكل والسبب سوء النية
الابتسامة لان تبسمك في وجه أخيك صدقة بس مو عاد على طول على طول لا يقولون عليج هبله هاهاها
اشتركي بالفعاليات مسابقات اثبتي وجودك بالمدرسة اذا تحبين التميز بس مو تكونين انانية لان العمل الجماعي أحسن
اذا قعدت مع مجموعةتحب الحش والقرض بالناس فهم مثل مايتكلمون بغيرج راح يتكلمون فيج .
فالبعد عنهم غنيمه واذا تبين الاجر حاولي انج تردين غيبة اللي مو موجودة
رئيسة القسم احترميها وراح تحترمج والوكيلات والناظرة اذا مروا من عندج اوالصبح شفتيهم سلمي لان للسلام فضل كبير فلقد قال رسول الله صلى الله عليه وسلم بما معناها انه اذا انتشر السلام بينكم انتشرت المحبة
ومو سالفة انج تمصلحين بس حق عليج انج تسلمين
والطالبات احترميهم يحترمونك وبيني ثقتك بنفسك لان الواثق من نفسه ومعلوماته وشغله كل الناس تحب تقرب منهم
والله يذكره دكتوري معدي العجمي بالخير قال لنا اذا سألوج الطالبات عن سؤال ماتعرفينة عطيهم بحث فية فانت تستفيدين واهو بعد
وعليج بالانترنت فية موقع التربية والتعليم كل اللي تبية المعلمة فية كل شئ مطويات دروس وسائل بوبوينت كل شئ
واتمنى اكون أفدتك
ودمتم سالمين

عجبني كلام شعاع 1

والله يوفقج

ماقصرتي شعاع 1 الله يحميك كلامك ميه ميه عجبني

ضحاوي شكرا غاليتى على المرور

يلا وين الباقي

جزاك الله خير
أهم شي المعلمة الجديدة تطلع على المناهج الي راح تدرسها للطالبات تقراهم وتفهمهموتتططلع على خطط المنهج وتوزيع الدرجات وتسأل الزميلات بالقسم عن أي نقطة مو واضحة وتهتم باعداد وتحضير الدروس مع استخدام التقنيات المبسطة والغير مكلفة وتسأل عن كييفية تقييم الطالبات والدرجات واعداد الاختبارات ولازم تتعرف على تقرير الكفاءة وتتطلع على بنود التقييم علشان تعرف اشلها واشعليها ولا تشتت نفسها بالأنشطة تركز أول شي على الأساسيات .

ازيد على كلام خواتي وما عليهم زود
ان بصراحة لا تبينين انج شاطرة بكل شي ولا تطقين الصدر على كل شي
لأن راح ياكلونج وراح تتعبين
سئليني
انا شاطرة بشغل الكومبيوتر مثلا
بينت لهم هالشغلة وكليتها صار كل شي على راسي طباعة وبوربوينت وامتحانات كله على راسي انا
مع ان زميلاتي يعرفون بس لأنهم ذوو خبرة ما بينوا هالشي فمحد طلب منهم
يمكن اتقولين بالعكس خل افيدهم
اوكي بس بالحد المعقول لأن بيوم راح تتعبين من كثر ما يطلب منج شي فوق طاقتج

والا شرايكم خواتي؟؟

امة 2024 يعنى مااينعطوا وجه في اشغال الكمبيوتر

الله المعين

صاجة ام خالد وامه2006
بس سوي شغلج بنفسج واذا احد اسألج بيني انها طريقة متعبة وهي صج متعبة عقدت الكمبيوتر
والشغلة اللي قالت عنها ام خالد انه ركزي على الاساسيات اتوقع انه صحيحة من ناحية اذا كنت تخصص وعينوج تخصص ثاني مثلي انا تربية علم نفس وتعينت رياض اطفال السنتين الاوليات كانوا مصخرة واما الباقي الحمد لله فرق السما عن القاع
وبخصوص الدرجات والجدول المواصفات والمناهج اتوقع اخذتيهم بالجامعة والتربية العملية يعني الاساسيات اوكية عندج
ولو لاحظتوا انه درجات تقرير الكفاءة مو بس على المادة العلمية ولكن على كل شئ من مظهر المعلمة الائق واظهار مدى ثقتها بنفسها ومواكبتها للتطور ودورات وكل هذولي اذا اغفلتيهم ينزلون درجتك وفي وحدة من البنات منزلة تقرير الكفاءة واقرية واي استفسار عند وجك وادعي لي يقبولون تحويلي للمتوسط وهمتكم بالدعاء
ودمتم سالمين

تصحيح بدلية عند وجهك

مشكورة عزيزتى مااقصرتي شعاع 1

ويارب يقبلون تحويلك

صح صاجه انا مريت بنفس اللي مريتي فيه

بس شلوووووووووون اتهرب منهم بطريقه ذربه من غير مايزعلون؟

عاشقه نواف
انا بصراحه بحاجه الى وجهه نظر طالبه مثلج علشان أعرف اشلون اتعامل مع بنات في سن المراهقه
ادري هالسن وايد صعب لأني مريت فيه
وأكره ما عندي انه الأبله تهزأني جدام البنات
انزين انتي بأي مرحله
ومشكوووره على النصيحه الحلوه

رحلة امل اول شي مبروك عليج الوظيفه وينفع اقولج ان شالله يعطيج خيرها ويكافيج شرها
ترى كونج مدرسة بحد ذاته فخر لج ورفعة راس لان على ايدج تتربى وتتعلم اجيال والاهم من هذا تذكري ان انتي صاحبة رساله فتميها على احسن وجه لان اولا واخيرا الي يهمج ارضاء ربج قبل ارضاء ادارتج او زميلاتج
وحطي في بالج انج قدوة لطالباتج فك وني كفؤ لهذي المكانه يالغاليه
اولا :منهجج خليج واثقه من مادتج ومعلوماتج الي تحتاج انج تطورينها وتسترجعينها كأنج راده تدرسين من جد وجديد وتذكري اسوأ معلم اهو الي يشعرون طلابه بضعف مادته ولاتستهينين بالطلبه ترى في منهم الذكي والشاطر الي يكتشف ضعفج بالماده.
ثانيا:خلي علاقتج بمديرتج علاقة احترام وطاعه والمديره تحب المعلمه النشيطه سواء بمادتها او انشطه ثانيه تسويها بالمدرسة.
ثالثا:رئيسة قسمج:اتبعي توجيهاتها وتحملي انتقاداتها وكل ماتقبلتي النقد طورتي من نفسج وعدلتي اخطاءج وبالتالي ارتقى مستواج المهني.
زميلاتج:احرصي على روح الاحترام والزماله الي ممكن تولد صداقات وتعلمي تعاملين كل وحده وشخصيتها وسنها وحرصي تستفيدين من المعلمات الي معاج خصوصا ذوات الخبره لانهم الى جانب رئيسة قسمج بيكون لهم فضل عليج بالتعلم الصحيح.
الموجه:بيده تقييمج الى جانب المديرة ورئيسة القسم فاحرصي تطلعين جدامه بصورة مثاليه من حيث المنهج واسلوب التدريس ودايما سأليه عن كيفية تطويرج كمعلمه في كل زياره وحاولي تستفيدين منه.

طالباتج:اهم محور عملج فكوني حريصه عليهم وعامليهم بعداله واياج والظلم ولايضيق صدرج اثناء الشرح وتذكري ان الطالبات من مستويات مختلفه فلازم تراعين كل وحده وتركزين على الكل ولاتبخلين عليهم بالنصيحه لانج شخص مهم بحياتهم.

هذي ملاحظاتي من قلبي لج ولغيرج من المعلمات الجدد واتمنى انج تستفيدين ووتوفقين وتحبين وظيفتج

مشكورة مااقصرتى عزيزتى انى من نوع الى احب اهتم في ادق التفاصيل وانشاء الله نصائح بعمل بها بدقة وتصميم وتطوير

وشكرا للجميع