انا صاحبة موضوع تعالو شوفو خالتي اشسوت معاي بالطبيب

هاي بنات.
كل اللي ردو علي مواضيعي القدم مشكورين وايد عالردود ولو ان في بعضهم ماكان مصدقني عموما انا راح اقول اخر سالفة صارت بينا
كنا مقررين انا وزوجي نراجع الطبيب عشان صارلي فترة متزوجة وماحملت المهم حجزنا موعد لبسنا واحنا طالعين والا خالتي توها طالعة من المطبخ ولاتقول لريلي وين رايحين منتو متغدين جان يقولها ريلي لا يما احنا بنتغدي برا ونروح نتمشي ونرجع جان تقول خلاص يما اروح معاكم والغدا نتعشي فيه جان يقولها ريلي يما خليها يوم ثاني احنا عندنا مشوار جان تقوله خير وشنو هالمشوار اللي خاشه علي جان اقولها انا خالتي بنروح طبيب النسا في شي ثاني جان يخزني ريلي ان اسكت جان تقولي انتي اشفيج تتكلمين جذي معاي قتلها مادري يعني معاريس وبنطلع مالهداعي تحقيق بالروحة والردة جان يقولي ريلي انتي اشفيج تكلمي عدل قتله اذا خلصت المحضر مالك انا بالسيارة وطلعت وانا طالعة والا اسمع خالتي تقوله سمعت اشلون تتكلم مرتك نطرت بالسيارة لين يه ريلي وركب معصصصصب جان يقولي انتي صارلج فترة مو مضبوطة انتي لو تستحين ماتتكلمين مع امي بهالطريقة بس انا اراويج وحرك السيارة وطبعا انا انربط لساني من الخووووف المهم طول الطريج ساااكت ومنفس انا ماتكلمت قلت بعدي الموضوع علي خير
المهم وصلنا الطبيب ودشينا اهوا قعد ولا كلمة جان اقول حق الدكتورة السالفة المهم الدكتورة شافت تحاليلي جان تقولي تحاليلج ممتازة ومافي شي يعرقل حملج شافت ريلي مجسسسم جان تقوله ممكن انت تسوي تحاليل جان يقولها ليش انا بحمل جان ترد عليه الدكتورة قالتله انت body builder واكيد تاخذ هرمونات وابي اتاكد يمكن تاخير الحمل منك اهوا انحرج جان يقولها دكتورة انا طبيعي اسوي مع مرتي كل شي واهيا عمرها ماشكت مني قالته لازم تحاليل المهم نزلنا المختبر سوينا التحاليل وطلعنا وحنا بالسيارة جان يقولي يوعان بروح اكل وين بتروحين قتله كيفك المهم وصلنا المطعم وبما ان الجو حلو قعدنا برا بطلت تلفوني جيكت عالمنتدي وعلي موضوعي قمت اقرا بنات كاتبيلي واجهيه وقوليله قلت هذي فرصة ان بروحنا وبمكان برا لان ريلي اذا عصب يختنق عالاقل مكان مهوا المهم بطلت وياه الموضوع جان يقولي انتي ليش نكد صكري الموضوع طولت صوتي شوي قتله لين متي اسكت مت من القهر انت واحد تصلي اشلون ترضا علي نفسك ليش خالتي تقصد تاذيني وطلعت اللي بقلبي اهوا يطالعني مستغرب من كلامي لما بجيت ماتحملت جان يتلفت اذا في احد قاعد يطالعنا جان يقوم يقعد يمي ويلمني حيييل ويقولي اشششششش خلاص حبيبي خلاص باباتي انا مادري ان الموضوع جذي مضايقج بعدين مسك راسي وصار ويهي بويهه وسمعوا الكلام اللي قالي اياه بالتفصيل :

سمعي بابا امي كان محرومة مني 10 سنين من كان عمري 7 سنين خذاني ابوي ورحنا برا الكويت وبعدها لما ابوي تزوج ردني لامي يعني لاكنت اعرف امي ولا كنت عايش عندها واهيا نفس الشي اهيا حتي زواج مارضت تتزوج عشاني كانت تبي تعوض الايام اللي ماكنت بحضنها فيهم ترا امي من قبل الزواج جذي وانا اخذ الموضوع انها امي بس يمكن لاني تزوجت لازم اوقف كل هذا بس حبيبتي لاتفهمين امي غلط ترا اهيا موقصدها تنكد عليج انتي شي وامي شي وانا انصدمت انج كل هالفترة خاشة بقلبج قولي بابا شنو تبيني اسوي امي هذي ابي افهمها بس ماجرحها انا محتاجج يمي لاتخليني والله يا بنات حسيييييته يااااهل هالوقت ومو عارف يتصرف المهم قتله خلاص حبيبي خل نروح ندور شقة ولما نبعد نتفادي حركات امك حتي لو كانت مو مقصودة ولما تبوسك مرة ثانية لف ويهك عشان تضطر تبوسك بخدك واذا قربت يم رقبتك قولها يما انا الحين ريال ماني ياهل لاتسويلي جذي وحاول تصدها بادب قالي حاضر اللي تشوفينه.

بس يا بنات ياكل بالمطعم ساهي بالسيارة لين ردينا البيت ساهي المهم وصلنا بيت خالتي ولا سيارتها مو موجودة طالعة. دشينا دارنا نام وقالي تعبان والحين نومته وقاعدة اكتب ومادري شنو ردة فعل خالتي لما تشوفني انا ماراح انزل الا لما ريلي يقوم وريلي مادري شنو كان يفكر فيه ومادري ليش انصدم لما بجيت وقتله الموضوع من بابا ثاني مو من باب الغيرة والعصبية
انا مرتاحة انه تفهم وماعصب بس تفكيره وسرحانه مخوفني *

والله يا دلوعة شكله ريلج توووه استوعب حركات امه والا اهوا كان علي نياته ةمافيها شي خليه يسوي تحليل انا ريلي معضل وصح كان اهوا السبب وتعالجنا ورزقنا بابنين والبنات الله يرزقكم ويهديكم

^^^^مي تووو معاهااا ^^^^

الحمدالله ان استوعب الموضوع يمكن يوم سرح يتذكر امه شنو كانت تسويله بعدين يطلب منج الجماع ف يمكن حس بتانيب الضمير

انتي خليج معاه دلعيه طلعو مره انتي عزميه مره انتو روحو البحر قعدو بليل الجو براد حلو وفضفضو حق بعد لا تخشين الي بقلبج

لان اذا خشيتي يوم من الايام راح تنفجرين ويمكن يزعل ف كلميه اول باول

تقبلي مروري

كلميه احسن

الله يعينك

الحمد لله إنك قلتي له اللي بخاطرك

إن شاء الله يقول حق امه

إن هاذي الحركات مو حلوه وهو صار رجال ماعاد صغير

موفقه يارب

يمكن ريلج شاغل باله كلام الدكتوره والتحليل اللي سواه

عموما .. مدام ريلج تفهم الموضوع انتي خلاص لاتضغطين عليه .. وحالو تطلعون بشقه بأقرب وقت علشان تتفادون المشاكل

والله يسخره لج ويرزقكم بالذريه الصالحه

الحمدالله انج قلتي له ويااارب يسخره لج
ويرزقج على قد نيتج يااارب

وايه فديتج بصراحه انا جريت موضوعج
الله يعينج ع ام زوجك
انا اجول في هذي الفتره اكسبيه دلعيه وحاولي تخلين كل وقته معاج

انا وايد مرتاحة يا بنات بس ردودكم حتي لو كانت قاسية بس وااااايد ريحتني.
واهوا قعد من النوم وراح النادي وامه ليلحين هايتة انا بروح بيت ابوي علي مايرد ريلي لان ابي نرد بنفس الوقت عشان اشوف اذا رد ريلي بتبوسه وشنو راح تكون ردة فعله
الله يرزقكم كل وحدة علي نيتها

انتى زين سويتى انج قلتيلة والباجى علية

استغفر الله العظيم
انا قبل لا ارد عالموضوع قلت بشوف الموضوع الي قبله يمكن اكون فاهمه غلط
بس جد استغربت
شلون جذي صار تفكير البنات؟
شلون ريال طول بعرض على قولتج يسكتلج وانتي تكلمين امه بهالطريقة؟
وشلون تقدرين تكتبين عن خالتج ام زوجج كلام مثل الي كتبتيه بالمواضيع الثانيه!!
وخليتي البنات يردون على موضوعج الي تقول زبالة والي تقول شذوذ والي تقول تبي ريال
تعتقدين في ريال بيخليج على ذمته لو يدري انج حاطه موضوع وقايلين عن امه هالكلام!!

هذا رد على الي تقول خالتج شذوذ وتبي ريل ومن هالحجي..
ترى كانت المرا مطلقه من عمر ولدها خمس سنين وظلت مومتزوجه ناطرته ولما رد ماتزوجت تبي تعوضه حنان,,
في حريم تطلقوا قطوا عيالهم على رياييلهم وتزوجوا على طول
لوالمرا فيها عيب شي جان تزوجت عقب طلاقها على طول مو تنطر سبع سنين مادري عشر سنين.. طبعا ماعرفت احسب لان مره قلتي لين صار عمره خمستعش سنه ومره قلتي من كان عمره سبع سنين لين عقب عشر سنين, وجذي يصير عمره سبعتعش مو خمستعش

طبعا انتي ماخذه ريلج عن حب من عمرج 16 سنه مثل ماكتبتي وظليتي معاه 3 سنين وعقبها تزوجتيه والحين عمرج 22 سنه يعني انتي مع ريلج من ست سنين واهو عارفج اكثر من اي احد ثاني وقالج تفكيرج وصخ
باجر اذا ياج ياهل وربيتيه وكبر وزوجته تكتب عنج بالمنتديات بكلام لا يرضي الله ولا رسوله بتذكرين هالسالفه
ويمكن ما الله رزقج بياهل ليلحين عشان هذا تفكيرج
فصفي نيتج حبيبتي واستغفري ربج وادعي يرزقج بالذريه الصالحه

انا قلت حق ولدي ماراح ازوجك لما تكبرغشمره
بس عقب هالمواضيع الي اقراها.. خل ينسى موضوع الزواج موليه بخليه يعنس:d:d

الحمد لله يا بنت الحلال والله اني احاتيج اشوه الي تفهم ريلج المشكله وعرف شالي مضايقج , بس خلاص الحين على قولتهم الكره في ملعبه خليه اهو يتصرف وانتي صيري طبيعيه لا تشدين بالكلام مع الام عشان ما يصير اي شي ضدج وحاولو تدورون على سكن بعيد عنها وتيون لها بالزواره ,لانها شكلها اهي بعد عندها حياة اجتماعيه يعني مو وحيدة , وربي يسهل عليج حبيبتي.