ام عبدالعزيز تقول لكم

استئذنتها اكتب قصتها مع تغيير الاسماء

ام عبدالعزيز اسمها (فطوما) كويتيه حلوه عمرها الحين بال 45تشبه الممثله المعتزله رجاء محمد

وهي صغيره حبت سعودي بعطله الصيف بلبنان كان عمرها 18 وعمره 20

وبعد شهور من الحب خطبها واهلها فورا رفضوا لانه سعودي ويفضلون بنتهم تتزوج كويتي ولا تروح بعيد خاصه انه طالب بجامعه الرياض وهي بسنه اولى جامعه الكويت

وبعد واسطات مني ومناك وافقوا الاهل خاصه انه اهله من العوايل الغنيه والمعروفه هناك

*********************************

تزوجت وكملت دراستها بالمملكه وتخرجوا مع بعض وراحوا امريكا

هو درس ماستر ودكتوراه وهي تفرغت للحمل والولاده

جابت ولدين وبنتين توام

الاولاد حاليا …..الاول مدرس- والثاني طالب بالجامعه -وتوام البنات بثالثه ثانوي

**********************************************
استقروا بالرياض وعندهم فيلا حلوه وخدم وسايق ويعتبرون من الاسر المثاليه

وهي تتردد بين فتره والثانيه لزياره اهلها بالكويت

************************************************** *****

تم تعيين زوجها كدكتور بالجامعه في الرياض ……والكل يشكر ويمدح باخلاقه ووسامته

وتعينت معه بنت معيده حلوه وصغيره مواليد 1984 اسمها ( وفاء)

هو أعجب كثرا ب وفاء ……

وتقدم لها بصيف 2024 وخطبها …..واشترطت عليه موافقه زوجته وحضورها للخطبه

************************************

الزوج (بو عبدالعزيز ) طلع مع فطوما(ام عبدالعزيز) لمطعم بمجمع الفيصليه

وفتح معها موضوع نيته لخطبه المعيده وفاء وشرط وفاء للحضور لخطبتها

************************************************** *************

(ام عبدالعزيز) تقول كان يوم سبت وحر والعشا كان بالليل متأخر ولما فتح معاي الموضوع كنا متعشين ونشرب قهوه ونتذكر ايام الغربه بامريكا وسوالف اليهال وهم صغار

تقول لما كلمني بموضوع الزواج حسيت

بتنميل يرتفع من قدمي الى راسي

ودموعي ما تنزل من عيني انما تقفز بطريقه عجيبه كانها النافوره الراقصه

ودقات قلبي احس كل اللي بالمطعم يسمعونها

وتمت عيني بعينه دقايق نطالع بعض بدون ولا كلمه

على طول دفع فاتوره المطعم وطلعنا وهو ماسك يدي بالسياره ويقولي

يا الغاليه انتي حبيبتي وانتي ام عيالي وانتي تاج راسي وانتي مستحيل استغنى وافرط فيج

وانا مستحيل اتغير عليج

البيت بالرياض لج وللعيال وما تدخل اي بنت فيه
والمصرف رح يزيد ما ينقص
وسفرات الصيف مارح تنقطع

وانا بخير وصحه واقدر افتح بيت ثاني

تقول كل هالكلام وانا دموع توقعت مارح اشوف الصبح من الصدمه والقهر

************************************************** **********

الصبح راح هو للجامعه وهي اتصلت باهلها

ونصحوها تتركه وترجع الكويت

اتصلت فيني وضغطت عليها تقعد بالبيت ولا تطلع منه

********************************************
رجع البيت وهو جايب كنافه بالقشطه لانه ام (عبدالعزيز) تموت عليها

وقال لها شقلتي عن الموضوع

لان الاسبوع الجاي في مؤتمر انا معها مشتركين فيه وفرصه تحضرين تشوفينها وتخطبينها

************************************************** ***

تقول رفعت راسي وهو بيده الشوكه يحاول يحط الكنافه بحجلي

وقلت له موافقه بس اروح العمره قبل

وافق على طول وحط الشوكه بالصحن ونسى حلجي واخذ الموبايل وطلع

************************************************** ****

تجهزت للعمره وراحوا بالسياره تقول من الرياض الى مكه ما تكلمنا

انا بوادي وهو بوادي

هو فرحان ومبسوط ان الزواج بتم بموافقتي
وانا اموت ببطيء على تعبي وغربتي وسهري وحبي الكبير له وين راااح اشلون نساه بسرعه
اشلون يهون عليه يضم بنت غيري
اشلون يقدر ينام جنب بنت غيري

تقول وصلنا مكه وانا بالحرم

ادعي ربي وانا على يقين ان ربي بيوقف معي
ان الله يحميني من كل نيه سيئه او ضرر او عين او *** او زوجي يروح مني خاصه انني مو مقصره فيه بشي

وخلصنا العمره ورجعنا ووصلنا الجامعه بيوم ثاني

ودخلت قاعه المؤتمرات

وحطني بالسطر الاول

وذاعوا اسمها تقول كلمتها

تقول دخلت بنت ايه بالجمال ولابسه عباة مع ملفع بطريقه حلوه

مو حاطه مكياج سوى كحل فيها شامه حلوه بخدها تشبه سميره توفيق بعزها

وبوقت البريك جا زوجي وقال تفضلي
(ام عبدالعزيز) روحي الدور الاول

تلقين استراحه للنساء

طلبي أ. وفاء مافي غيرها وكلميها وخطبيها

************************************************** ******
تقول ركبت المصعد وضغطت الدور الاول ودخلت الصاله وطلبت الاستاذه وفاء

وقالت لي لبييييييه بنعومه

قلت لها انا( ام عبدالعزيز) حرم( د بوعبدالعزيز)

رحبت وهلت ودخلتني مكتب ثاني بالدور الثالث

وقعدت معها اسولف (وبوعبدالعزيز) يحوس بالممر ينتظرني

تقول البنت فيها جاذبيه وفيها دين وتتمتع بثقافه عليه

شرحت لها قصه حبي ببيروت وعيشتي بالرياض وغربتي بامريكا

وانه من حبي له ما قدرت اقوله لا ………لانه طول عمره يدور وناستي وفرحتي

*****************************************

تقول ان أ .وفاء قالت جدامي ماشاء الله يا
(ام عبدالعزيز) انتي ام مثاليه وامراه جميله مكافحه وكلامكم يا الكويتين يهبل كله دلع واستغرب من (بوعبدالعزيز) عنده هالدره ويخطبني
لا بالله يا( ام عبدالعزيز) لو الرياض فيها بس
(د بو عبدالعزيز) ما اخذته
والله يهنيكم ببعض ويديم عليكم نعمه الاستقرار

تقول طلعت من مكتبها وهو على ناااار ينتظر

ودخل عليها وانا طلعت ونزلت تحت وبعد نص ساعه هو نزل

ركبنا السياره وهو يطالعني ويقول

(فطوما) احبج ………..تصدقين اشوفج الحين احلى من قبل الله يخليج لي

وموضوع الاستاذه انسيه هي رفضتني وانا هوّنت

****************************

تقول سبحان الله بالروحه من الرياض الى مكه ومن مكه للرياض ماتكلمنا

وبعد الدعاء

ربي غيّر الاحداث والنوايا والنفوس

وصار زوجي يطالعني بنظره احلى

وبهالمناسبه السعيده

(هي وبوعيدالعزيز) حاليا بزياره للكويت

شفتوا يابنات لا تيأسون من رحمه الله
لكل مشكله حل وحتى لو تقفلت كل الابواب يبقى بابه عز وجل يقول
ادعوني استجب لكم

فوفو

حرر ب 5-8-2012 اتمنى الاداره تنزله قبل 2024

قصه رائعه وواقعه جميله
تسلم ايدج فوفو
سبحان الله اللي الهم ام عبد العزيز وصبرها ونولها وان شاءالله يرجع لها ابو عبدالعزيز احسن من اول

وشفتي الاداره نزلته قبل 2024 ترا عادي انا روحي رياضيه

ما شاااااء الله
الله يخليهم لبعض ويبعد عنهم السوووء
فعلاً الدعاء يرد القضاء
مشكورة حبيبتي القصة تهببببل

فوفو
أنا اعرف نفس هال قصه بالضبط عن وحده ماشالله سنعه وحلوه
نفس نفس القصه
وريلها ضغط عليها وماقدرت أتقوله لاء والمره شارطه ان زوجته توافق ويوا البيت وشافوا الزوجه وكانت طبيعيه وتهلي وترحب

تقولي اتصدقين شدون ماحسيت انهم يايين عشان ياخذون ريلي ويطمنون عل موافقتي حسيت انهم ضيوف ولازم اوجبهم كان الله مسح على قلبها

وكانو مندهشين منها انها على طبيعتها وشكوا في الامر قالوا هذي صغيره وطيبه ليش بيزوج عليها !!!!

عقب طلعوا من بيتها قالوا حق ريلها لا والله ما تأخذ بنتنا مرتك اذهبه وطيبه نخاف حوبتها وتقول قعدوا يبينون محاسنها جدام ريلها

يعني الله مع اللي قلبه صافي دوم معاه ويحفظه من كل شر

اسفه فوفو قرقرت وايد

مواضيعج مميزه مثلج

فعلا مواضيعج مميزة يا الغاليه فوفو

وقصة روووووعه

حفظتها عندي للمستقبل حتى استفيد منها وافيد

واللي تبي تعيش مستانسه في حياتها لازم تصبر وتتحمل

وفعلا الدعاء يرد القضاء

تسلم يمناج حبيبتي

ومنكم نستفيد

اهوا صج ماتزوجها

بس. راح يظل القلب منكسر ان اشلون فكر ابغيري

ويمكن بعد فتره بيشوف وحدة ثانيه ويبيها

عالعموم الله يوفقهم

كادت ان تنزل دمعه من عيني!
هذي وفاء ادمية بنت ناس واخلاق
من حظ ام عبدالعزيز
صج بيولوجية الرجل غريبة وفسيولوجيته بعد
اللهم وفق ازواجنا وازواج بناتنا بعد
بالدوامات الغير مختلطة
يااارب(:

مشكورة على هلقصة

وجودج الاروع

فوفو

العفوووو حياتي

فوفو

قرقتج عسل على قلبي
واسعدت بمشاركتج

فوفو

حي الله نهى نورتي موضوعي

فوفو

لا ما اعتقد …. توبه من بعد دي النوبه…

فوفو

اسم الله علي عيونج
والله يحفظنا اجمعين

فوفو

ربي يحفظهم من العين و لا يغير عليهم و يبعد عنهم كل نفس حاسدة

دائما متميزة بالطرح اخت فوفو