|
|
السلام عليكم
أنا عضوة قديمة بالمنتدى بس حبيت أطرح موضوع مهم جدا بدون ما أتطرق لأصحابه بالاسم عشان جذيه سجلت باسم آخر
الموضوع : الى متى هذه الفوضى في بعض مدارسنا وأنا أقصد منطقة الأحمدي التعليمية طبعا المرحلة الابتدائيه
تقوم مديرة المدرسة بتخصيص وقت طويل من طابور الصباح عشان بنتها تكرم معلماتها وتلتقط صور تذكارية !!!
ما حست بحرارة الجو والوقت غير المناسب !!!
ما فكرت شنو ذنب البنات المساكين اللي واقفين بالحر عشان يشوفون مشهد التكريم !!!
أقسم بالله ان احدى تلميذات الصف الأول رجعت من التعب بالطابور .
غير ذلك تحويل حصة اللغة العربية الى حفلة عيد ميلاد لبنت المديرة وبحضور المديرة وحاشيتها وبناتهم من الصفوف الأخرى ومازال المنهج لم ينتهي .
الى متى التفرقة في المعامله بين المعلمات !! وشنو الأساس اللي ترتكز عليه !!
والى متى القانون والنظام يطبق على ناس وناس ؟؟؟!!
الى متى يكون الشكر لناس معينة على أقل عمل تقدمه وتجاهل فئه كادحة طوال العام وحرمانها من أبسط ثناء !!!
لمايوصل للمدرسة قرار بتدريس رئيسات الأقسام صف واحد من صفوف المدرسة يطبق على ناس وناس وترسل معلومات وهمية للمراقبه أن بعض رئيسات الأقسام وهم المقربات للمديرة لديهم صف يدرس وبالاساس هالصف تدرسه احدى معلمات القسم !!
الى متي خروج البعض من المدرسة بشكل مستمر بحجة التكليف !!
الى متى تكافأ الحاشية بالغياب مقابل أي عمل ينجز ويحسب لهم حضور !!
الى متى تخصص أرباح اليوم المفتوح لفعالية تقدمها رئيسة قسم مادة فنية والزام جميع الاقسام بالعمل بهذا اليوم ليوم دراسي كامل
ثم تشكر رئيسة القسم على انجازها !!
مو قصدي والله أضر بأحد ولا ذكرت الأسماء بس ودي هالرسالة توصل لمراقبة الأحمدي التعليمية عشان ما تتكرر أحداث مدرسة أبو عبيدة مرة أخرى وتوجه هالتعليمات لمديراتها بالالتزام بالقوانين والأنظمة وتطبيق مبدأ العدالة على الجميع .
ماعندج سالفة صراحة
اذكري الاسم وصعدي الموضوع لفوق
وياليت بعد ينتشر بتوتر وخصوصا ل اكاونت شبكة المعلم
وحزتها تلتفت لكم المراقبة المحترمة اللي معروفة اغلب مدارسها واقصد الابتدائي بالتعسف الاداري
او وصلي الموضوع لمدير المنطقة مباشرة
الحين ملزومين المراقبين ومديري المراقب باستقبال المراجعين
اظن مدير المنطقة كل يوم أحد س١١
واذا ماتبين تدخلين نفسج بالمشاكل مثل ماقلت لج
سوي لج أكاونت بتوتر واذكري هالنقاط لشبكة المعلم
ويوصلونها للوزير بعد
لي متى نسكت على التسيب والظلم
واحنا بدولة حرية وديمقراطية ودولة مؤسسات
يجون هالنسرات يتحكمون ويظلمون ومحد يحاسبهم
انا احمل كل وحدة تسكت على الظلم كامل المسؤولية
وأعتبرها مشاركة معاهم بالظلم
والله تعبنا حييل
حالنا كل ماله بالنازل
قهر مادي ومعنوي ونفسي وصحي
لييش عاد
كلنا وخصوصا المعلمات بنات ناس ومتفوقات دراسيا
ومعززات مكرمات ودخلنا جامعات وحصلنا احسن تعليم
ونهايتنا خدم بل ادنى من الخدم في المعاملة
ومن ناس للاسف ماتسواال شي
ناس تعودوا ع القمع وجايين وجايين يمارسونه علينا
يمارسون احقادهم ونقص شخصياتهم علينا
سوري حبيبتي طلعت عن الموضوع
وهذذذرت بس والله من حررتي
السالفةابردت
عزيزتي q8yat الامور اللي ذكرتها كلها متتابعة طول العام وحفلة عيد الميلاد والتكريم كانت أمس أقصد المهزله اللي صارت وأتوقع الفترة الياية راح نوصل لمرحلة خطيييرة اذا ما انحط حد للموضوع .*
هلأشكال بكل مدرسه تحصلينها
حسبي الله ونعم الوكيل
اسال الله العظيم رب العرش العظيم ينتزع من كل ظالمه كرسي النظاره بكل ذل
الظلم يحر يذبح اسئليني عن الظلم والله ان تجرعته كاسات كثيره
ودي التقي فيه شخصياً ووجه له هالرساله .
تدرون وين تروح وجبات التلميذات كل يوم وبالذات المشروبات وبكراتينها ما انفتحت ؟
بسيارة المديرة وحاشيتها !!!
للأسف سرقة واضحة للمال العام ومن قبل من يفترض ان تكون القدوة*لنا !!
لا حسيب ولا رقيب .
انا عندي فلسفة في الحياة مريحتني و مريحه غيري الا و هي التطنيش
يا جماعه الي مايعجبكم صكوا عينكم و اذنكم عنه
مو عشان شي لا بس عشان ترتاحين انتي نفسيا
و خلي عندج ثقه في ربج ان ربج ماينسا عباده و لا يقبل في الظلم و هو الي راح ينصفج
لا مراقب و لا بطيخ لو ان المديره عندها واسطاتها حبيبتي مايشيلها الا ربج
و ديرتنه ماشيه بالواسطات هذي قضيه مافيها روح تعال
نصيحيتي لج التطنيش و اشتري راحتج
و على قولت المثل الكويتي من راغب الناس مات هما
وانتي اذا بتقعدين تشوفين العيوب و القرارات الفاشلة ترى راح تتعبين و بنفس الوقت ماراح تقدرين تعدلين شي
الا في حالة وحده و هي التكاتف و توحد الكلمه و هذا الشي مستحيل يكون موجود في مجتمع الحريم
و اشكرج على حرصج على نقل الموضوع بطريقة حلوه و عدم ذكر الاسامي لانج لو ذكرتي الاسامي راح ينحذف الموضوع فبتالي ماراح يوصل صوتج و لا راح تقدرين توصلين رسالتج فشاكرتلج عزيزتي
عندي شغله وحده بس احب اشير لها
بالنسبه لقضية التكليف
يا جماعه احنه مانعلم الغيب يجوز انهم فعلن لتكليف لعمل معين او اذن عمل اي ما كان
ترى الي يطلع بره المدرسه و يشتغل بره المدرسه يتعب اكثر من الي قاعد بس اللهم يمسك حصصه
فمافي فرق بين الي يشتغل بره او داخل خاصه اذا كان قاعد يخدم المدرسه بشكل ام بآخر
فانا برايي سوء الظن هو الي يعفسنه في بعض الاحيان
و انا اتكلم عن هذا الموضوع بذات لان اليوم حاشني طشار حجي في هلاطار ان انا كل طالعه و ما اقعد بالقسم و انا يعلم الله اني اشتغل شغل مو طبيعي يتني ايام اداوم لي 7 المغرب لاني كنت منظمه و كنت مستمعه في شغلي لاني انا احب شغلي و ماتذمرت من هشي بالعكس سعيده فيه
لاكن بدال ما تشكرين من زميلاتج تكتشفين انهم سايئين الظن فيج و يعتقدون انج مضبطه نفسج مع الاداره و هذا الشي بعيد كل البعد عن الصحه
عيبنه ان احنه مجتمع نسيء الظن لو بس نصفي النيه احنه بخير و نرتاح و نريح
اتمنى يكون ردي يريح البعض ولو نفسيا
و اذا اختلفت معاكم في الراي فسمحولي و عذروني
و ممكن اكون انا قاعده اشوف الموضوع من زاويا غير عن وجهة النظر الاخرى
لاكن تبقى بالنهاية وجهة نظر و عساكم علقوه و ربي يوفقكم يارب و ترتاحون في اماكن عملكم
و شاكرتلج ياصاحبة الموضوع على الرقي في طرح الموضوع
الضرر هذا ما يخصني بروحي عشان أطنش
هذا ضرر عام على الكل من معلمات واداريات وتلميذات وووو
وفوق هذا ضرر كبير على بلدنا
لو كل وحده تشوف الخطأ وما تحاول توصله وتكشفه راح يصير تمادي في الخطأ
لو المسؤول لفت انتباه هالشريحة المخله بالنظم وعرفوا ان فيه ناس راح تحاسبهم راح يكفون
ومثل ما شفتي أنا تحدثت عن واقع احدى مدارس الابتدائي بالأحمدي بدون ما اذكر الاسم بقصد ان المسؤول يلفت انتباه بعض المديرات لسؤ ادارتهم وسرقة المال العام !!
مدرسينا وصل فيها الوضع لمستوى سيئ بدأ من العام الماضي واستمر لنهاية هذا العام الدراسي بعد أن كانت مدرسة متميزة وتحت ادارة مديرات قياديات .
أتمنى أن وزارة التربية تفتح المجال لتلقي الشكاوي وفضح الفساد الاداري اللي صاير في بعض المدارس بهدف الرقي بهذا الوطن أما أن نسكت ونطنش فهذا مهناه برأيي الشخصي تدمير للمسيرة التعليمية اللي تدفع لها الدوله ميزانيات هائلة لتصل الى بها الى الرقي .
كلي ثقة بأن المراقبة لو وصلت لها هاذي المعلومات عن احدى مدارسها راح تتصرف .