الموظفات وين تخلون عيالكم الصبح

انا على وجه ولادة ان شالله بس قاعده احاتي يمكن تو الناس بس فعلا احس الموضوع شاغلني

انا ببيت حمولة وخدامتي سالفتها سالفة مادري مابي اظلمها بس احسها ماتحب الجهال حتى اول ماجتني وسألتها قالت انه عندها بنت وحده ماتفكر تجيب غيرها وانها اصلا كانت متفقه مع زوجها مايبون عيال انا انصدمت

المهم لما تبدا الدوامات يكون عمر البيبي شهرين شنو اسوي قلبي متقطع وادور حلول اقلبها مني ومني لا تقولون وديه بيت اهلج بيت اهلي مافيه احد الصبح وبيت حمولتي الصبح كلهم نايمين حتى الخدم هم جذي طبعهم خدامة البيت بس تقوم الساعة 8 وزوجي ماراح يرضا اوديه حضانة فكرت احط كامرة وخفت اشوف شي ريعورني قلبي وفكرت اخلي الخدامة تاخذ الجاهل وتنزل فيه تحت واقفل شقتي عشان ماتقعد فيها بروحها معه بس نفس الشي تحت ماكو احد يمكن خالتي تقوم بال 10 او بعدها بعد

الامهات الموظفات شنو طريقتكم وشنو الحل واذا رجعت بكون تعبانه وسهرانه مع الجاهل بالليل بعد اخليها تمسكه الظهر لما ارتاح مادري شلون انظم وقتي

خليها تنزل تحت عشان تخاف شوي وان صار شي سبحان الله بجى الجاهل او شي فيه ناس يسمعونه ينتبهوون

انا بصراحه اخليهم بشقتي واودعهم الله

السلام عليكم ، اذا أنت موظفه أخذي أمومة ليما يصير عمر الصغير ٦ شهور ، وعقب عادي نزليه مع الخدامة تحت ، حتى لو كانوا نايمين على الاقل ساعتين وبيقومون والرايح والجاي عينهم عليه والله يسهل.

وعلى سالفه تنظيم الوقت ، خليه خدامتج لاتنومه عقب ما يقوم ، ولما تجين تاخذينه وتنومينه ونامي ،لا تحاتين سهاله أحنا في نعمه.

اختي موظفه ودوامها من ٧الصبح لين٥ العصر وعندها بنتين الكبيرة تظل مع أهلها وأبوها وال صغيره تجيبها عندامي وأختي من الصباح لين صلاه المغرب والوضع ماشي بس قولي لا سافرواهلي شالحل

انا اخليه عند ام زوجي الله يحفظها يارب

خليها تنزل فيه تحت عشان تخاف

اودعيه الرحمن وربج مايضيعه

والله أنا طلعت من دوامي من هالسالفه بس الحمدلله على كل حال

مـــــعـــــاهــــــا كـــلامـــــهــا ســـلــيـــم

خليها تنزل تحت فيه دام خالتج تقعد عشر زين ولاتقعد بشقه تحت تهتم فيه اكثر لان الاجوااء مفتوحه وتخاف واولا واخيرا الله الحافظ استودعيه الله ولاتحاتين

مثل ماقالو البنات نزليه تحت ع الاقل تخاف احد يطل عليها باي لحظه
بس ليش تخافين من الكاميرا انا حاطه في بيتي واشوف عيالي لانه امي تكون عند اخواني يدرسون برى واخواتي موظفات وام زوجي بعد موظفه الكاميرا او حظانه كانو انسب الحلول بالنسبه لي

وبالنسبه للخدم والكاميرا ينقسمون نصين حد يخاف وحد ينحاش من البيت

بس بالنسبه لي والله نعمه هالكاميرا مااعرف اطلع بدون مااشوف عيالي منها مستحيل اداوم اصلا وانا معاهم بالتلفون كل ساعه اتصل واسوي نفسي ماعرف عنهم شي واسىلهم شيسون اليهال والخ الخ

الله يحفظهم لج وعمر ولدج مناسب انه ينحط بحظانه اطلعينهم كلهم وياج الصبح وتردين تاخذينه ع الاقل اضمن من انه ينحط بيد اثيوبيه

زين واذا ماعندج خادمة..
في حضانات يستقبلون هالعمر الصغير ؟

اذا تقدرين تاخذين امومه ٦شهور زين لانه يكون ولدج شوي شايل نفسه وسهل تبديله ورضعته وياكل ويقعد

لانه ابو شهرين صغييير حراااام ينحط بروحه يخوف

وثاني شي اول ماتروحين خلي الخدامه تجهز جنطة البيبي وتنزل تحت مع البيبي وفراشه وتقعد بالصاله وتكونين مبلغه ام زوجج انه ولدج تحت علشان تحس فيه لانه بيت الحموله حركه وام زوجج لاصار شي بتحس

وترا اغلب الموظفات عيالهم بشقتهم مع الخدامه ويستودعونهم الله لانه موبيدهم شي

ولابغيتي تحطين كامره حطي وقولي للخداامه علشان اشوف عيالي وانا بالدوام

خليه تحت حتى لو نايمين عالاقل لو نوت تسوي شي تخاف لان الناس يسمعونها