اللي ولدت قيصرية تقولنا شنو سالفتها هني (:

قوة أمهات ..

أنا كالعادة حابة أطرح موضوع يديد عشان نفيد و نستفيد ..

درر درر يا دطوة هههه

كل وحده ولدت قيصرية ياريت تقولنا سالفتها .. و شنو أسباب العملية ؟ و هل حاولت دكتورتج تولدج طبيعي ؟ ياريت تقولولنا عشان ادري ان في وايد بنات يخافون من القيصرية وودهم يتجنبونها كثر ما يقدروون ..
يالله فيدونا و لكم الأجر انشالله ,,, ناطرينكم

انااحس حطيتي الموضوع خايفه من العمليه توكلي على الله ومايصير الا الخير انشالله
انا ولادتي كانت عمليه والسبب كان من الدكتوره دخلتني من غير لايكون في طلق وحطتلي طلق صناعي ومارضى يفتح الرحم وتعب البيبي وصاااارت والحين حامل وهم خايفه من العمليه بس انتي لاتحاتين دام انج ماجربتيها وانشالله ماتجربينها بس بغيت اقولج قصتي عشان ماتكرر مع غيري ولاتدشين وانتي مافيج شي

انا ماجربت قيصرية
يبت اربع عيال اسم الله عليهم كله طبيعي وبمستشفى حكومي
بس الحين حامل بخامس ياهل وولادتي خلال ايام بإذن الله ورحت مستشفى خاص بولد فيها سيده قالتلي قيصري ومن وقتها وانا متلخبطة حدي تقول انه كملت 38 اسبوع وماشيه بال39 اسبوع وللحين راس الياهل فوق مانزل عشان جذيه احتاج قيصري
بصراحه انا طنشت خاصة عقب ما صليت استخارة وكل ما ابي اروح المستشفى القى الدكتورة توها طالعه او مو زامها يعني تسكرت بويههي
ومارحت عقبها

بشنو تنصحوني بنات والله يجازيكم خير يارب

انا نفس حالتج البيبي راسه فوق وقالت عمليه وهالاسبوع موعدي راح اشوف شتقولي بس احتمال ادش اسوي العمليه اذا قالت ماراح يلف بس بس الله يكون بالعون انا بجر الله يستر
وانا الحين قاعده احبي كثر ما اقدر وانشالله يارب يلف حاولي تحبين وانشالله يلف ماتحتاجين عمليه

انا يب البيبي الاول طبيعي والثاني والثالث يبتهم قيصريه ولاني يبت طبيعي ويبت قيصريه فاعرف انه الطبيعي على العوار اللي فيه الا انه احسن من القيصريه بوايد يعني اللي تولد طبيعي من اتخلص ولاده خلاص ايروح العوار بس القيصريه لا يبدي العوار من بعد العمليه وتبين احد ايقومج ويساعدج على القومه والقعده وانا ولدت قيصريه لانه ولدي كان راسه فوق وكان الماي المحيط بالياهل اشويه يعني حتى مايقدرون ايفرونه فقالولي اذا مافتر مع الطلق راح انسوي قيصريه وفعلا سوولي قيصريه والثاني كنت كل مااراجع اسال ها وين راس الياهل ايقولون تحت قلت خلاص عيل راح اولد طبيعي بس وقت الولاده البيبي مارضى ينزل بالحوض مع اني انفتحت 9 سم يعني المفروض خلاص يطلع فقالي الاستشاري انتي عندج جرح قيصريه والبيبي حجمه كبير مو راضي ينزل لازم قيصريه قبل لايتعب البيبي وسوولي قيصريه وصار الحين خلاص كل ولاداتي قيصريه يعني ماكو امل للطبيعي خلاص بس الحمدالله على كل حال

السلام عليكم

شوفي دطوه
كان يا مكان في قديم الزمااان لوووووول شخباري

لا صج صج
انا تاريخ 17/4 اخلص شهري يعني اخر موعد حاطته لي للولاده
وييني عوار بس خفيف ويوم 23/4 راجعت دكتورتي لان قاعد ينزل مني سائل بس مادري انه ماي البيبي صارله جم يوم عبالي افرازات
فقلت خن اروح اشوف ولا تاخذ عينه منه وتحلله ويطلع ماي الياهل
وفحصتني ولا سانتي ونص وقالت انتي عدا على موعدج اسبوع تقريبا فسويت شيك ان
وعطتني تحميله تحمي الطلق عال3 الفير صارت 6 الصبح ولا بلش العوار يهل
عاد قلت ابي الكمام وينه قالوا تحت بغرفة الولاده قلتلهم ودوني دلوني عليه خن اشفط فيه لوول
وطبعا دخلت غرفة الولادة وشفطت بالكمام ودخت وبعد جم ساعه حمى الطلق فعطوني مهدئ ابره خلتني اغيب انام
ووعيت عالساعه 10 الصبح ومن العوار قلت ابي ابره ثانيه تقولي النيرس مايصير بس وحده واشوف الدكاتره تتخطرف كل شوي دكتور
ماظل دكتور ودكتوره بدار الشفا ما فحصوني وكل ما يفحصون 3 سانتي قالت الدكتوره خن ننطر وطايحيله تحاميل طلق صناعي والساعه 12 الظهر يت فحصتني بين ال3ونص و4 ومو راضي رحمي يفتح جان تقولي قيصريه ويابتلي اوراق اوقع عالعمليه
وانا مغيبه من الكمام جان اقولها قوووو تو ماي هاسبند يعني روحي حق ريلي اهو يوقع الصراحه خفت اوقع عى شي
ويوم قالوا حق ريلي سفل بالمستشفى انتوا و انتوا بعد عمري خايف علي جان يقول ماني موقع
قاله الدكتور اذا ما وقعت على مسؤليتك اذا صار بالبيبي ومرتك شي يقول الدكتور حق ريلي في ناس تيي اهي تطلب قيصريه واهم يقدرون طبيعي يعني ماعليها خطر ورضخ ريلي حبيبي ووقع لا حول ولا قوه
دخلوني غرفه معقمه اعتقد للعمليات شكلها يخرع وربطوا ايدي جني مينونه لوووول شوي ولا يحط شي بالدرب وثواني ولا انا نايمه
وعالساعه 1 ونص خلصت العمليه وماصحيت الا وانا بغرفتي حواليني اهلي وخالتي ام ريلي حبيبتي تمسح على ايدي وراسي واشوفها تبجي
بس وانا خدرانه مغيبه يعني اشوف الناس دقايق وانام ما صحصحت الا اليوم الثاني وقلت ابي اشوف ولدي حبيبي
قالولي انه بالشيشه شارب ماي ومايقدرون ييبونه لي الين تتحسن حالته وعورني قلبي الا ابي اشوفه ورحت وغصبت نفسي عالعوار ورحت صوب البيبيات وشفت وهابي حبيبي واهو يتنطق بحلجه حبيبي ما يصير يعطونه حليب بس دربات
وبعد ال4 ايام طبعا اخر يوم سويت استقبال ورحت البيت بس ولدي ظل عندهم يومين وبعدها طلع بالسلامه الحمدلله

وتوته توته خلصت الحدوته

وانا الحين حامل والله يستر شنو القصه بتصير ودي دام ولادتي ببجري قيصري اسوي الثاني قيصري ولا اعاني هالمعاناة ووبيبيي يتعب ولا شرايكم يعني اانا مشقوقه مشقوقه ليش انشق من الصوبين يعني قيصري وطبيعي
حدي محتارة ساعدوني

وشكرا وسامحوني عالطواله …

مممم.. بنات .. أنا ملاحظة كلكم نفس الموضوع .. يعني الرحم مايفتح رغم الطلق الصناعي !
أنا بصراحة خايفة لأن للحين ماياني الطلق .. و سمعت أن مع الطلق الصناعي تزيد فرصة القيصرية لأن البيبي يتعب و نبضه يقل !
هم حددي خايفة من القيصرية وودي أسوي أي شي عشان أولد طبيعي ..

و بعدين بنات شلون على مكان فتح البطن .. صج في طريقة الجرح يصير مخفي و مايبين ؟ مالي خلق شق بالبطن من هني لي هناااااااااك ): الله لا يقوله

بالضبط نفس السالفه

وخايفه الحين يااارب طبيعي ادعولي

شلونكم بنات
ترى انا والده 4 ولادات قيصريه والسبه ان حوضي صغير ما يتوسع واذا حاولت اولد طبيعي راح يصير معاي انفجار بالرحم والحمدلله ولاداتي كلها سهله ومن ثاني يوم ولاده امشي واقعد وثالث يوم يخف العوار وعقبها يغدي شري ولا يخوفونكم يقولون لكم عوار عقب الولاده بالعكس كل يوم يمر يخف العوار وكافي انه جرح مخفي
والحمدلله على الصحه والعافيه

وااي ياربي الله يعينكم..آنا قالي الدكتور احتمال الياهل راسه يكون فوق بس آنا متفائلة إن الله سبحانه وتعالى بيسر لي

السلام عليكم

حاولوا فيني طبيعي تقريبا يوم كامل وكان فيني طلق حار … بس اخرتها قيصري وعطتني الدكتوره سبـبـين ..مره تقولي الياهل اعترض .. ومره قالتلي حوضج صغير … شرايكم ؟؟؟

مافي اجابه شافيه

واللحين حامل واايد خايفه تتكرر الماساه وتعب ودي اعرف من بدايتها في امل طبيعي ولا سيده قيصري اختصار …

اختي بغيت اسئلج شلون اعرفوا ان حوضج صغير وقت الولاده ؟؟؟ ولا من قبل الولاده قايلين لج

والله يعينا

أنا من زمان ودي أجرب الطلق الصناعي .. بس شكلي بنطر الطلق ايي بروحه . أخاف لا سمح الله ما يفتح الرحم و اضطر أسوي قيصرية ):

العمليه الاولى كانت ولاده مبكره بالثامن والراس فوق والطلق حامي ونبض البيبي صار ضعيف فعلى طول عمليه ما حاولوا طبيعي بالعمليه الثانيه راس البيبي تحت وطلق حامي والرحم فتح 3 سم ووقف وحاولوا فيني 12 ساعه اني اوولد طبيعي بس بدون فايده طلع عندي سماكه بعنق الرحم ما يفتح اكثر من 3سم

هلا والله اختي البخت الضايع
بالولاده الاولى ماكانوا يدرون ان حوضي صغير بس بولادتي الثانية من السونار بين معاهم وقالولي

الحمدالله انا جربت القيصيريه صج تعب باول اياام بس الحمدالله مع المشي تصيرين زينه
انا سالفتي انه البيبي راسه كان شوي كبير وبالتاسع فحصني وكنت مفتوحه 2 سانتي ومعاي طلق خفيف والدكتور قبلها قايلي انه احتمال كبير قيصيريه بس لمه فحصني قالي اعطيج مجال جم يوم بس عقبها بيوم زاد شوي الطلق علي رحت طواري دار الشفا كان في دكتوره هنديه فحصتني وقالتلي 2 سانتي وقالت نفس كلام دكتوري محيط الراس كبير راح تولد طبيعي بس راح تتعب واحتمال كبير نشفط راس البيبي اهني انا خفت ودقيت علا دكتوري وقتله ابي قيصيريه ماني ناطره يزيد الطلق واطلق واتعب وبالاخير البيبي يتعب او تسويلي قيصيريه ويصير التعب تعبين قالي اوكي وانا بعد اقول جذيتعالي بنفس اليوم بليل ساعه 10 علشان اسويلج العمليه الحمدالله رب العالمين سوالي ياها صج تعب اول اسبوع بس بعدين عادي عاد الياهل الثاني طبيعي ولا قيصيريه هذا بييد الله بس انا لحين اقول اهم شي انا والبيبي نطلع بسلامه هذا اهم شي سواء كان طبيعي او قيصيريه