السلام عليكم ورحمة الله وبركاته ..
_ بنات اسألكم في الله تشيرون علي وتثبتون نفسي لقرار تقر عليه
نفسي وعيني ..
أنا من خلقني ربي ما ألبس ألا عباية كتف والأكيد تكون واسعة ولله الحمد ؛
ومن طلعت موضة عباية القراشة والبشت وأنا مرتاحة وما ألبس غيرهم لأني أحس
نفسي بخيمة ومستورة 
لكن أدري أنه مهما كان وسعها فهي حرام دام تنحط على الكتوف ؛ ويعلم الله أني
لي فوق السنة تخيلوا بين شد ورخى على نفسي في أني ألتزم باللبس الشرعي ولا لا !!
ولما أشوف بنات الشريعة عندنا بالجامعة يفرك قلبي من الغيرة والقهر والود ودي ألبس مثلهم
تماما وما ينكشف مني شيء ..
غير هذا أنا أكحل عيوني لأني ما أدانيها بيضا من غير كحل ويشهد علي ربي مالي نية
في التكحل غير انه لنفسي وقدام رفيقاتي وبس !!
ودوم ألوم وأعتب على نفسي لأني أدري فتنة وحرام 
المهم ألي أبيه شيروا علي وثبتوي على قرار ؛ لأنه كل ما أقول لأحد في نيتي يقولون
صغيرة وشلون لو مستقبلا تسافرين وغيره من الأعذار السخــــــيفة ..
أنا بإذن الله ناوية نية خالصة لوجه ربي ألتزم باللبس الشرعي ؛ بس يصح أن الواحد
يقول شلون أفعل كذا وكذا من عمل صالح وأنا بالمقابل أفعل كذا وكذا ؟!
يعني أقصد يصح أقول كيف ألتزم باللبس الشرعي وأنا عندي من الذنوب ماعندي ؟!
ويقوم الشخص بالمقايسة في أعماله ؟!
أتمنى المعنى وصل لكم ..
ريحوني الله يريحكم وجاوبوني
وليوفقك الله فيما يرضى,,
في ميزان حسناتكم إن شاءالله (:
|
المشاركة الأصلية كتبت بواسطة غرور المطيري
 يعني أقصد يصح أقول كيف ألتزم باللبس الشرعي وأنا عندي من الذنوب ماعندي ؟! ويقوم الشخص بالمقايسة في أعماله ؟! |
والله هالكلمة بالذات من اقوى مداخل الشيطان يالغاليه
غرور
امشي ع مبدأ
اللي اقدر عليه بسويه
وصدقيني
لي لبستي عباية الراس بتحسين بسعاده غامره وبتقولين بلبس دسوس
اخلصي النية واجزم لج بأن الله بيهوّن عليج كل اللي تجسبينه صعب …
تذكري يالغاليه
ان الحياه في سبيل الله اصعب مليوووون مرة من الموت في سبيله
..
اما قول البعض توك صغيره وبكرة بتسافرين !!
ف والله انها اعذار واهيه وان قالها لي شخص بيطيح من عيني مع احترامي للي قالوها لك ..
بس صدقيني مانطقهاا الا فم شخص غرته الدنيا متاع الغرور
..
اخيراً
[ الدنيا والآخره ضرتان .. بقدر ماترضين احداهما … تسخط الأخرى ]
..
دعوه
[ اللهم اني أسألك بإسمك العظيم ان تنعم عليهااا بالتقرب لك وحب كل مايقرب لك ]
..
اختك
أم عمر
وعلى فكره انتي تسألين وتجاوبين على نفسج…يعني انتي عارفه بداخلج وين الصح خلاص ماعليج من أحد سوي اللي يرضي الله ….خاصة بسالفة الكحل … تقولين انج تكحلين لنفسج ولرفيجاتج!!!مااظن راح ينفعج أحد لاواجهتي الله سبحانه وتعالى يوم الحساب…
وتذكري آيات الله
سورة عبس (يَوْمَ يَفِرُّ الْمَرْءُ مِنْ أَخِيهِ {34} وَأُمِّهِ وَأَبِيهِ {35} وَصَاحِبَتِهِ وَبَنِيهِ {36})
و سورة المعارج (يُبَصَّرُونَهُمْ يَوَدُّ الْمُجْرِمُ لَوْ يَفْتَدِي مِنْ عَذَابِ يَوْمِئِذٍ بِبَنِيهِ {11} وَصَاحِبَتِهِ وَأَخِيهِ {12} وَفَصِيلَتِهِ الَّتِي تُؤْويهِ {13} وَمَن فِي الْأَرْضِ جَمِيعاً ثُمَّ يُنجِيهِ {14})…
الانسان يسوي الأشياء اللي ترضي ربه قد مايقدر…ما يفكر انا مذنب بالشغله الفلانيه خلاص ماله داعي التزم بالباس الشرعي ..يعني انا ماأصلي خلاص ماأصوم مثلا!!!
أنصحج أولا بالتوبه النصوحه ثانيا البعد عن المآثم والذنوب والبدء فورا باللباس الشرعي …ياأختي الواحد مايضمن عمره…ويارب الله يتمم عليج وتبشرينا بقرارج … ولازم كل قول أو فعل تسوينه بهالدنيا تشوفين أولا هل يرضي الله سبحانه وتعالى …وراح تلقين أمورج ميسره باذن الله
موضوعي طق الشهر يمكن ؛ بس قلت لازم أكتب هالرد ..
صار لي أسبوع ولله الحمد والمنة ملتزمة باللبس الشرعي
على حقيقته ؛ ويعلم الله توني أحس بمعنى الستر الحقيقي
وبقيمة العفة ..
فــ جزاكن الله خير يا بنات جميعا (: