الكويتيين والمدارس الخاصه .ليش يبا شالسالفه؟

السلام عليكم
مادري اذا تم طرح هالموضوع من قبل أو لأ
بس صراحه الموضوع يبط الجبد وينرفز ويخلي الواحد يحس انه عايش وسط مجتمع سطحي ومايفكر الا بالمظاهر

الموضوع عن المدارس الخاصه
طبعا انا اتفق مع الأغلبيه ان تدريسهم أفضل ما اختلفنا(والا ليش مسوينهم!)
واهتمامهم أفضل (طبعا مو بفلوس؟)
ومدارسهم انظف وارتب واسنع (ايييييي مو بلاااااااااااااش يعني غصبن عليهم مو بكيفهم والا محد بييهم)

لكن خل نكون واقعيين
الدراسه بمدارس خاصه مكلفه
اللي عنده عليه بالف عافيه واصلا شيبي بالمدارس الحكوميه؟
واللي ماعنده أو عنده بس مو زود ليش يضك نفسه؟؟
عشان تعليم عياله؟
ليش مو كلهم اذا اجتهدوا انشالله بيكون لهم نفس المستقبل؟
اللي يشد حيله بيقدر يدرس بجامعة الكويت أو بره الكويت
والجامعات الخاصه كل مالها وتزيد بالديره يعني حتى لو مايدش جامعة الكويت في بدائل

بس اللي اشوفه الحين ان في حريم يلزمون أزواجهم بمصاريف تقص ظهورهم بس عشان انا عيالي مدارس خاصه
واذا قالها الريل ماعندنا والا مانقدر سوت سوالف ومشاكل
واللي تخلي ريلها ياخذ قروض
وتلقين حالتهم الماديه مايعلم فيها الا رب العالمين
من قروض
وديون
وبلاوي ومصايب
واخر الشهر ماعندهم ولاشي
عشان شنو؟
والله انا عيالي مدارس خاصه ما احب المدارس الحكوميه
كلنا مانحبها بس نفكر بالعقل
انا عندي اللي يكفيني ويزيد.. علي بالعافيه وادشش عيالي احسن المدارس ليش اقصر عليهم
بس انا اللي عندي يبوب يكفيني ليش اخنق نفسي بمصاريف مالها داعي وفي لها بديل؟؟
ليش اذا بغيت اسافر مع عيالي اقول لا والله ماعندي السنه اسافر.. (لو موفره فلوس المدارس جان سافرتي احسن ديره)
وليش لما يقولولج عيالج يما نبي هالشغه تقولين بعدين بعدين (ماكو فلووووووس)
مو كنتي تقدرين تدششين عيالج مدارس حكوميه وتونسينهم وتيمعينلهم وتخشين حق مستقبلهم وتعيشينهم احسن عيشه وبالعكس احسن مليون مره من عيشة اللي مدششين عيالهم مدارس خاصه ومقصرين على نفسهم وعلى عيالهم بسوالف ثانيه ممكن تكون أهم

والمشكله بالحريم الحين اذا ريلها خلاص زهق من المصروف وقالها خلاص يبا ما اقدر عالمدارس الخاصه يا حكومه والا بالطقاق
قامت تقول حق الناس
ياربي اكتشفت ان المدارس الخاصه مو زينه من جذي طلعت عيالي.. والا يعلمونهم شي مو زين.. والا اكتشفت ان تدريس المدارس الحكوميه احسن
ما اعتقد فيها شي اذا قلتي فكرت بعقلي واكتشفت اني كنت غلطانه واني اقدر اوفرلهم شغلات افضل اذا دششتهم مدارس حكوميه

الله يهدي الجميع انشالله
وارد واقول اللي عنده عليه بالعافيه واللي ماعندوش مايلزمووووش

مشكورين بنات عالمرور والمشاركه
أرد أأكد على وجهة نظري
انا ما اعارض الدراسه بمدارس خاصه
بالعكس أأيدها وبشده اذا عندي الامكانات اللازمه
بس اذا ماعندي ماقصر عنهم بشغلات ثانيه على بو ان المدارس الخاصه افضل
اذا من ناحية أفضل أفضل بشغلات وايد بس هم المدارس الحكوميه تفي بالغرض
وبالنسبه للتحرشات بين الاطفال ترى يعتمد عالتربيه بالبيت مو عالمدرسه سواء خاصه او حكومه

رفيجتي بنتها بالباكستانيه وتشكي من مدرسات بنتها تقول يطقون البنت وعلى بو ياهل ماتفهم ماراح تفتن لين زهقت الام واشتكت عليهم بالتعليم العالي
اختي بناتها بالباكستانيه ماشي حالهم الحمدالله بس يوم دششتهم الحكومه عقب مده عشان بناتها كبروا وماتبي اختلاط.. بناتها استانسوا بدل لايتضايقون وارتاحوا اكثر وقالوا حق امهاتهم وناسه الحين رفيجاتنا كويتيات وبنات كلهم خخخخخخخخخخ
اخوهم معاهم بالباكستانيه بس ربعه بقلة الادب واللسان الطويل والشطانه ولا عيال الشوارع
يعني شفتوا الفرق؟
في ناس تمدح وفي ناس تذم

الله يوفق عيالج انشالله بنت الشمالي ويعلي مراكزهم امين
حبيبتي انا أكدت اكثر من مره اني مو معترضه على المدارس الحكوميه
وبعد قلت اكثر من مره ان مسواتهم احسن من المدارس الحكوميه بوااااااااااايد مو شوي
وهم قلت ان عنايتهم افضل
يعني بالعكس آنا مأيده المدارس الخاصه
بس اذا حالتي الماديه تسمح
انتي تقولين ان مستوى بنتج جيد جدا من أي ناحيه حكمتي؟
من ناحية علاماتها أو دراستها؟
وتقولين ان ولدج يدرس اللي تاخذه بنتج بثالثه ابتدائي
اوكي احنا معاج ان مستواهم اقوى محد اعترض على هالشي
بس انتي تقولين عساني ان اهم شي مستقبل عيالج
هل دخولهم مدارس حكوميه معناه ان مستقبلهم منتهي؟
يعني بنتج مثلا خلاص مالها مستقبل؟
عندنا دكاتره خريجين من مدارس حكوميه
ونفس الشي بالنسبه للمدارس الخاصه
بس واهم صغار طلبة الخاص مستواهم كان اقوى من طلبة الحكومي
وبالنهايه كله معتمد على اهتمام ولي الأمر
بس هل ترضين لنفسج انج تدششين عيالج مدارس خاصه وتقعدين كل يوم تشتكين بالدوام.. ياربي هالشهر ماراح اقدر اييبلهم الشغله الفلانيه
والا بخلي الشهر هذا ماراح ادفع قسط السياره عشان فلوس المدرسه
والا قاعدين بغرف قديمه ويبيلها تجديد بس مو قادره لأن قسط الدراسه قاص ظهرج
لا والله ادششهم مدارس حكوميه واحرص على تدريسهم ومتابعتهم وادششهم معاهد انجليزي تنفعهم واعدل غرفهم واسفرهم كل سنه واعلمهم الشغلات اللي ماتعلمهم اياها المدارس الحكوميه وبيطلعون احسن من طلبة الخاص بالتربيه والتعليم

عن نفسي بنتي ماشالله طالبة امتياز بمدرسة حكوميه
بس بالحضانه والروضه كانت بخاص لكن طلعتها لما فكرت اني ان دخلتها خاص بدخل خواتها وخوانها فهل راح اقدر ماديا عليهم كلهم؟
يا كلهم
يا محد
صج مستوى المدرسه الحكوميه مو قوي
بس بنتي على طول تقرى كتب بره الدراسه وتعرف شغلات وايد مادرسوها اياها واذا سمعت عن شي ماتعرفه تحاول تعرفه بأي طريقه وانا اساعدها حتى احيانا اوديها مكتبه عامه تدور وتشوف اذا ماحصلناه عالانترنت

والله على قولتج اختي نهاوند
قبل جم سنه كانت مع اختي بالمدرسه بنت الشيخ جابر عسى الله يرحمه برحمته انشالله ليش مادششوها مدارس خاصه؟
هل قاصرهم فلوس؟

والحين رفيجة بنتي بالمدرسه بنت عايله كبيره (بس ماني ذاكرتها اخاف بعد تصير سوالف) ماشالله ابوها عنده خير ومصانع واسمه معروف ومو مقصر على عياله بأي شي بس موحاط اهميه للمدرسه الخاصه او الحكوميه واهم شي انها قاعده تدرس بالنسبه له ومو فاشله