الصبايا اللي بالاربعين يتفضلون

السلام عليكم

بدخل بالموضوع على طول

الحمدلله انا دخلت سن الاربعين

بس من فترة مادري شفيني كله ابي احس بالحب واقول حق زوجي ابي احس بحبك لي
ابي احس بدفا الحب يطالعني باستنكار يقول شفيج انا احبج
طيب حسسني فيه انا مو حاسته يسكت ويخليني
حاولت افهمه يقول انتي متأثرة بالروايات والقصص اللي تقرينهم
وفضفضت حق رفيجتي وقالت عادي المرة من اخر الثلاثينات ومع بداية تغير الهرمونات
تحس بهالاحساس

وتذكرت موقف صار لي من قبل عشرين سنه

وانا طالعه من الجمعيه وركبت السياره الا واحد يطق الجام
استغريت منه قلت له خير
قال ماعرفتيني انا فلان
انا :اي اعرفك بس خير في شي
قال الله يخليج اخذي رقمي وابيج ضروري تكلميني بغيتج بموضوع ضروري
استغربت انا ما بيني وبينه شي اشيبي مني
وقعدت افكر شنو الموضوع الضروري
وتذكرته لما كنت ادخل القاعه كان يوقف برة ويقول شعر
وماشاء الله حافظ لاشعار قديمه واغلبها غزل وكنت اطالع حق منو يقول هالاشعار واقول بقلبي الله يهنيها
اللي يقول لها الشعر ويابختها من قدها
وكان خلوق وشاطر والكل من الشباب يحبه
المهم دقيت عليه لما وصلت البيت وانا خايفه شنو الموضوع
انا مالي احتكاك فيه كلش
المهم كلمته وقال لي انه يحبني من اول ما شافني وسأل عني ومدحوله اخلاقي

انصدمت

يقول معفوله انتي ما حسيتي فيني؟ كل ما اشوفج اقولج اشعار (بقلبي معقوله انا ماعندي احساس)
يقول انا صارلي سنه ونص ادورج اختفيتي والحين مو مصدق اني لقيتج وانا الحين مستحيل اخليج
وسامحيني على طريقتي بس جني لاقي كنز
قال انا طلعت من الجامعه ودورت لي شغله اشتغلت بالثانويه بس علشان اكون نفسي وايي اخطبج
وانا طول المكالمه جذي حالتي

مسكين من فرحته ما عطاني فجه اتكلم فالي اشرايج فكري لاتردين علي الحين
وفقير قلت له في شي لازم تعرقه انا ……………مخطوبه وبأخرالاسبوع ملجتي
ترجاني اني اغير رايي ولاااجل الملجه
كسر خاطري وكسرت خاطر نفسي

مادري ليش هالايام وايد ايي على بالي هالموقف

سامحوني وبسألكم ما ياكم مثل الاحساس هذا

خلونا نتناقش بالامور والتغييرات اللي تصير بالمرة بهالسن

الله يحفظ لي زوجي وعيالي

ياحياتي انتي

عاطفيه فديتج .. انا بالعشرينات مااقدر افيدج بس حبيت ادعي لج بطولة العمر والله يحفظ لج زوجج وعيالج من كل شر

آمين ..~

حبيبتي هذي يمكن تغير هرمونات …

بس انا بالعشرينات همن ما اقدر افيدج ,, بس عسى ربي يحبب زوجج فيج اكثر واكثر وتعيشين معاه احلى ايام حياتج

آنا هم بالعشرينات
عسى الله يطول بعمرج
وآنا أشوف العمر مو مقياس والحب ماله عمر معين
ياما ناس كبار وعنده الحب أقصى واكثر من اللي بالتعش والعشرينات
الله يخليلج عيالج يارب

تدرين ليش تفكرين بسالفة الشخص اللي كلمتيه قبل 20 سنه ؟
لأنج حنيتي للاهتمام وانج تشغلين بال زوجج وتبين تكونين مميزه في عينه
يمسيج بكلام رومنس ويصبحج بـ أحبج ، في هالمرحله المره لازم تشغل نفسها بالاهتمام
تهتم بنفسها وبشرتها ولبسها ورشاقتها عشان يروح منها احساس انها اكبرت شوي
مع ان عمر الاربعينات أحلى عمر للمره .. يزيد نشاطها وتزداد حيويتها
وتنتهي مشاكلها الزوجيه كلها وتتفرغ لعمرها وتكون تأقلمت بشكل تام مع الزوج
ويكون زوجها محتاجها كثير في هالمرحله لانه تعود عليها خلاص مايقدر يستغنى عنها

والحب عمره مايكبر فينا
أنا بالعشرينات بس عشت مع ناس وصلوا لـ هالعمر
وتقريباً بديت افهم نفسياتهم ، وربي يطول بعمرج يالغاليه

غمضني الولد
مب من نصيبه

><

غمضني الولد
مب من نصيبه

><

حبيبتى عادى الحرمه من توصل حق هالسن تدور اللى فقدته وتحن حقه يعنى الريل لاهى واهى لهت بهالدنيا اليهال والمسؤليه وفقدان الرومانسيه

عاد تشتغل الذاكره وتحن حق اجواء اول لما كنا مومتزوجين والمواقف الحلوه بس حطى بالج ترى هذا من عمل الشيطان

قعدى مع الريل وقولى له اشكره ابى حجى حلو ابى حجى مصفف وقعدوا تذكروا سوالف اول اللى شزينها والله يعينج

المره تحب الي يحسسها بقيمتها عنده ويدلعها
ويعبر لها عن حبه بالكلام والافعاال
حبيبتي انا بالتعش بس همن احب انه ريلي يعبر لي عن حبه لي بكل الطرق
والله يسعدج

البنات كفو وفو يعطيهم العافيه ..الله يحفظ لج زوجج وعيالج ياقمر

السلام عليكم
اولا انا بقيت هالنتاتيف الي بالعشرينات ما قرو العنوان والا شنو

ثاني شي حبيبتي هذا شعور جدا طبيعي انا الحين كله ساعات اروح لريلي المه واهوقاعد يشوف التلفزيون واقول له احلف احلف تحبني يقول لي الحمد الله والشكر منصجج اشفيج اقولله كيفي بسال
–طبعا واهوبالدوام على طول لازم اتصالات اكثر من مره باليوم اوله عليه ادق عليه واسولف– بعد شنو — امس قلت له كيفك جهز نفسك بساااااافر معاك بروحنا عيالنا كبرو من زمان ما سافرنا مع بعض بروحنا

بعد شنو تبين بس هذا شعور عااااااااااادي بس اذا بقيتي اي شي فكري بزوجج باي شكل الا انج تفكرين بالماضي لانه يعتبر خيانه حبيبتي سوي اكشن مع ريلج حتى لو مو عادي يمكن لانه انا شخصيتي مع ريلي جذيه فعادي ساعات افصل عليه يقول لي الحمد الله والشكر بس مالي شغل فيه اونس نفسي
وما اعتقد العمر له شغل بس يمكن كثر المسؤوليه والانشغال بالبيت

صباح الخير ام مشارى ..اشلونج …يارايق انتى …مااعبر ..والله …
شوفى عزيزتى ..كل اللى قالتله ام مشارى صح ..هذى اشياء طبيعيه ..تحصل للمره اللى بدت تخطى الاربعين ..

تحس انها خلاص ربت عيالها وكبرتهم …وماعندها شى اللى يشغلها …بالماضى كان يشغلها العيال والوظيفه والبيت
بس الحين ..خلاص ..العيال واكبروا ..والوظيفه اعتقد انها تقاعدت …ولو فيه ناس للحين يشتغلون..مثل حلاتى …

مابقى شى ..علشان جذى تحسين بفراغ ..لا وفراغ عاطفى بعد …
حبيبتى الحين ياه الوقت اللى تهتمين فيه ..لنفسج ..روحى النادى لعبى رياضه ..ودلعى نفسج بسباه والمساج ..
تسوقى ..زورى اصدقائج ..يعنى حطى لج جدول …عشان تملين هالفراغ ..
ومثل ماقالتلج ..اهتمى بريلج ..احضنيه ..بوسيه …حسسيه انج محتاجته ومشتاقه له وولهانه عليه ..يعنى ..
انشالله الله يتمم عليج انتى وريلج وعيالج اجمعين …

لرفع

ما قصرتوا يابنات

وكل كلامكم على عيني وراسي
ويا ام مشاري انا عمري ما فكرت اخون زوجي وان شاء الله يغفرلي ربي اذا هذا يعتبر خيانه
وانا على طول اقوله ابيك تحسسني بحبك بس مشكلته انه جامد ما يعبر او مايعرف يعبر

اختي ملح وسكر انا على طول مهتمه بنفسي من نظافه ولبس ورياضه وطلعات مع صديقاتي (اذا سمحت الظروف)
و من تقاعدت وانا قاعده احورف بعمري ما اخلي ماسكات ولا خلطات مو مقصره على نفسي
20 سنه وانا بين العيال وشغل البيت والدوام الحين هذا وقتي

الحين عرفت انا شنو ابي بالضبط

امس قريت قصه وحده ناقلتها للمنتدى من منتدى مملكة بلقيس للاستشاريه ناعمه الهاشمي
واذكرت انه في فرق بين العشق والحب واشرحت شنو معناتهم
والظاهر انا اللي ابيه اهو العشق ابي زوجي يعشقني لانه اصلا يحبني ومتعود علي
وياليت اقدر اروح لها او احضر دوراتها
يبيلي دورات اجدد فيها حياتي