الدكتورة ليلى ابو الليل !! وينها ؟؟

ادري الموضوع قديم بس شدني وايد وشدني موضوع ثاني بعد عن نفس الدكتورة ..

بالنسبة لي عايلتنا كلها تعاملت مع هالدكتورة من ال2003 .. انسانة حبوبة وبالها طويل وغشمرجيه وشاطرة ..

كل بنات خالاتي ولدوا عندها وحده منهم ذمتها ولما سألتها ليش؟ قالت لي باردة وبولادتي مت مافي احد معاها لا سسترات ولا شي بس اهي بروحها تولدني!! قلت لها اهي مو مسؤلة عن السسترات المستشفى اللي لازم توفرهم سكتت وماردت علي وعرفت انها مرتاحه مع دكتور ولادة وبرأيها بعدي عن اي مره!! فقلت وجهة نظرها ويمكن اهي ما ترتاح او تثق بالحريم علشان يولدونها!

بنات خالاتي الباجي كلهم ولدوا عندها ومو مره مرتين و3 ..

اختي كانت حامل وتراجع عند د. فوزية القطان ( طبعاً غنية عن التعريف ووايد يحبونها وما يرضون عليها) بس المصيبة ان في وحدة من المراجعات قالت لها الدكتورة ان نبض البيبي ضعيف وراجعيني بعد اسبوعين ولما راجعتها اختي قالت لها نفس الكلام النبض حيل ضعيف واحتمال اجهاض ومادري شنو .. وقامت تبجي اختي لأن بجرها .. فخذيناها على طول حق دكتورة ليلى وكانت ايامها في انترناشونال كلينك ومسكينة استقبلتنا من غير موعد ..وسوت حق اختي سونار داخلي وسيده قالت لها البيبي "ميت" صارلها 3 اسابيع في بطنج!! ودتورة فوزية تقول النبض ضعيف!!

طلعت مسكينة اختي البيبي ميت في بطنها ودكتورتها فوزية ما قالت لها وعقب يومين من روحتها للدكتوره ليلى اجهضت وسوت لها د. ليلى تنظيفات والحمدلله حملت بعد شهرين وراجعت عند دكتوره ليلى ووايد ارتاحت منها وخياطها وايد زين ولما حملت في ولدها الثاني هم راجعت عندها وولدتها دكتوره ليلى ..

شخصياَ عانيت مشاكل بالحمل .. ورحت راجعت عندها والحمدلله بعد 3 اشهر من العلاج عندها الله قسم لي وحملت ومن يومها وانا اراجع عند دكتوره ليلى في مركو الصفاة الامريكي .. وايد مرتاحه منها واهي حبوبه وتنصح .. وتذكر الله على طول .. وايدها خفيفه ( جربتها بالفحص الداخلي) والله ما عورتني وتفهمني وتقولي شراح تسوي قبل لا تبتدي بأي شي ..

الله يتمم علي يارب وتولدني .. صج انشانه حبيبه وتستاهل كل خير ..

بس حبيت اكتب تجربتي ممكن في ناس ما ارتاحوا معاها وهذا شي طبيعي وكل وحده على حسب تجربتها مع الحمل والولادة ..

اعرف وحده تموت على الدكتوره ماجدة اليتامى وكانت مرفعتها السما ولدت عندها وسولفت عنها جنه مافي احد بالكويت غيرها وبولادتها الثانية ليش تعسرت ذمتها ونزلتها لي سابع ارض!!