|
|
السلام عليكم
الحمدلله كما يليق لجلال وجهه وعظيم سلطانه
الحمدلله الحمدلله الف شكر وحمد ع فضل ربي وعطيته ..
والف شكر لاختي املي كبير ومرت اخوي شاي مهيل ع وقفتهم معاي بالولاده ..
والف شكر الف شكر لمستشفى الراشد ع عنايتهم الفائقه ورعايتهم لي .. وعلى راسهم الدكتور الاستشاري ( نصر هيبه )
عسالله يطول بعمره ويخليه لعياله .. 
ومااااانسيت كل البنات في في تأخر الانجاب كلكم دعيتلكم .. عسالله لايحرمكم هاللحظه ويرزقكم الذريه الصالحه ..
والبنات اللي ع وجه ولاده دعيتلهم بالسهاله والتييسير ..
انا يابنات فبجري حيل تعسرت وكنت بين الحيا والموت .. والحمدلله ربي لطف ..
وجاني خوف من الولاده ماتتصورن … وحملت بغلطه ومن حللت بحملي وانا افكر بالولاده شلون بتصير ..
طبعا حملي هذا غير حملي فبجري من حللت وانا تعباااانه من الوحام .. كلش ماترقعت ..
وبالاشهر الاخيره كنت ع وجه تخرج وعندي ميداني يعني النفسيه كلش زفت ..
من دشيت الثامن وانا مو مترقعه من التعب واانفسيه والعصبيه …
طبعا بعد بحث وتحري واستخاره قررت اولد عن دكتور نصر عسالله يوسع له ويوفقه ..
من دشيت الثامن صرت اراجع عنده ..دشيت التاسع اول اسبوع من التاسع جتني طلوق رحتله وفحصني قال
رحمج مصكر وماراح تولدين الحين بتعدين التاسع كله .. طبعا اايس فيني حيل ..
بس احلى مافيه انه واااااضح معاي من البدايه …ومن التاسع وتجيني طلوق حاميه واروح له ماااايرضى يفحصني
طبعا مافاد فيني شي حتى العضوه $العــــوبه$ فديتها كانت معاي ع الخط جوجو جربي الحلتيته جوجو جربي تمشين الحين
ع البحر جوجو جربي تمره ورشاد ..جوجو جربي جربي مااااااااااكو فاااايده ..
وكانو اموله وشايونه ياحذوني الافنيوز يخلوني افره كله ولااااا فاد فيني .. الجمااااع كثرت منه .gif "Eh S(3)")
ولاااااااافاد شي ..
تجيني طلوووووق اتعب ابجي بس ماكو شي …
قبل اسبوع من التاسع رحت للدكتور .. اول ماشافني : ايه ياقواهر انتي متمسكه فيها ليه
قلت دكتوووور تعبت خلاص ابي اولد ..
قال ايه مالك استني لين ربنا يأذن لو .. سالني في طلوق ؟؟ قلت اي قال شي حلو
قتله افحص دكتور قال لا مش ح فحص ..بسوي سونار اطمن ع البيبي ..
سوالي سونار طبعا اهو متابع وزن البيبي مايبيه يعدي 3 و8غرام لان ولادتي الاولى تعسرت بسبة وزن البيبي
المهم سوالي سونار طلع وزنها 3 و4 .. قال مااافي الاسبوع الجاي اخر يوم من شهرج تجيني اعطيج طلق صناعي
طبعا انا من قالي جذي ودموعي اربع اربع ليش دكتوور لا طلق صناعي مابي مجربته وذبحني ..
قال مانقدر نصبر لازم تجين وشوفي منيه بهالاسبوع يمكن الله يسهل عليج وتولدين …انتي عااارفه كل شي
وماره بالولاده الثلاثا تجين وتجيبين اغراضج معاج ..
طبعا عيوني ماطاحت من عيون زوجي منصدمه طلعت من المستشفى ابجي واصيح مابي صناعي مابي
عشت باصعب اسبوع مافي شي ماجربته ..وماااااااااكو فايده .
طبعا ماعلمت احد امي مسكينه مره كبيره فيها ضغط وسكري ماتتحمل كافي انها بغت تموت من ولادتي الاولى
بس اللي يدرون زوجي واختي اموله ..
يوم الاثنين زهبت اغراضي كلها ونظفت شقتي وغسلت ملابس زوجي وسويت كل شي ..
الثلاثا .. خذيت ولدي وخدامته قطيتهم ع اهلي ,,, طبعا امي تسال شسالفه قلت يمه بروح الدوام خلي ولدي عندج ..
امي جنها حست ..
المهم خذاني زوجي الساعه 9 الصبح دخلت ع الدكتور قال الحين يحضرونج فوق يعطونج حقنه شرجيه وتحميله
ويحطونلج تخطيط بالغرفه اذا نزلوج الولاده اعرفي انج مفتوحه 3 الى 4 سانتي ..
بس لازم افحصج الحين واشوف فحصني بس سانتي واحد انا وجهي قمط وقلبي قعد يخبصني
وزوجي قام يسولف علي ويلهيني يحاول يضحكني ودوني فوق … وزوجي تحت يخلص الاجراءات ..
عطوني لبس المجانين وحطولي حقنه .. طبعا مايحتاج اقولكم شسوت فيني .. 
اختي اموله جت وجابت ريوقها معاها وقعدنا طقيناها سوالف وزوجي راح دوامه قال راح اجيلج الظهر ..
حطولي تخطيط وجا المساعد مال الدكتور حطلي تحميله ..
طبعا من بعد ربع ساعه اشتغلت الطلوق علي .. طلق ورا طلق … وطلق ورا طلق ..تعبت حاولت اصير قويه
واحتسب الاجر وادعي … طبعا بهالوقت دعيت حق كل من وصاااني ادعيله …
عدت 3 ساعات اطلق بس عاد كلش ماتحملت قعدت اصيح من قمة راسي .. عطوني مسكنات ماكو فايده ..
دقو ع المساعد .. وجا فحصني قال الحمدلله الرحم يبدا يفتح … الحين سانتي ونص بس نبي نزلها ولاده عشان تاخذ كمام
بهالوقت جات مرت اخوي شاي مهيل .. جوجو لاتنزلين جوجو تحملي لين يفتح 4 قلت مااااااقدر خلااااص تعبت ماااقدر ..
جابو سرير عشان ينقلوني .. واموله وشايونه جوجو لاتصايحين اشفطي اشفطي شفطي كمام كثر ماتقدرين واذا جتج الطلقه
سوي بوش قوي .. جوجو خلج قويه وادعي .. جوجو اشفطي كمام لاتهدينه ..
دخلت غرفة الولاده .. حطوني ع السرير تاخروا شوي ع الكمام ينطرون دكتورة التخدير .. طبعا بهالوقت ..
يمااااااه اثنين يتولدون يمااااااااااااا ياصياحهم تعبت نفسيتي منهم …
جت الدكتوره مالت التخدير ووقعتني ع الكمام وعطتني الكمام وحطولي التخطيط ..
بنات شقول شخلي عن كمامهم ؟؟ .gif "Eh S(13)")
وااااااااااااااااااااي يجنن يجنن يجنن يجنن يجنن من حطيته وانا بعااااالم ثااااااااااني .. ما اقعد الا ع وقت الفحص ..
طبعا مابقى احد مافحص حتى الفراشه فحصت
واااااااااااااااه وثم اااااااااااااااااه وثم اااااااااااااااه من الفحص مت منه مت مت ماما شمي شمي شمي كمام ..
طبعا اللي يمي ولدو واسمع صياح عيالهم واصيح ع السستر سستر جيبي هذا بيبي مال انا جيبيه بشوفه
لا ماما انتي للحين مايجيب بيبي شمي كمام شمي ..
طبعا ماخليت شي ماسويته رفعت اصبعي وتشهدت وتجي السستر تركض تشوف نبض قلبي ..خخخخخخخخ
عبالها اني احتضر .. ماما تناديني ماما قتلها سستر جم سانتي مااما قولي ان شاء الله ..
انا اللي ذبحني الساعه اللي فوقي اشوف الوقت مو قاعد يمشي ..
دخلت سستر وفحصتني تعبت من الفحص ها سستر جم سانتي ماما 2 سانتي
واقعد اصيح ليش ياستتر ليش ؟؟؟
ماما قولي ان شاء الله …
وانا ادعي واصيح يااااااارب ياخالق النفس من النفس يامخلص النفس من النفس خلصني مما انا فيه ياحي ياقيوم برحمتك
استغيث …
تعبت وانا افكر بولدي .. سستر جيبولي ولدي سستر ابي ولدي ..
( ملاحظه بنات ترا انا طول الوقت مخدره هالحجي بس وقت الفحص ..
وللحين انا ع 2 سانتي …
فجأه ولا فتح 4 وداخل ع 5 .. بهالوقت .. قمت اصيح من التعب والطلوق ابي ابرة ظهر ابي ابرة ظهر
وانا موصيه اختي اموله قايلتلها اذا طلبتها لاتوافقين عليها لو شنو …
واصيح ابي ابرة ظهر لا ماما انتي 5 سانتي خلاص الحين ولاده ان شاء الله ..
جا الدكتور وبط الماي الهادي .. وانا ارجع ارجع عزكم الله … فحصوني .. ولا 6 .. بهالوقت ..
ماما جنبي جنبي لفوني ع الجنب لانه يساعد بفتح الرحم … وزادولي الكمام وزادولي المسكنات ..
فجأه ولا يابنات خلااااااااااااااااااااااااااااااااص قعدت اصيح اصيح عواااااااااار موووووووو طبيعي مايفيد فيه كمام
ولاتخدير .. الا هذي طلعة الراس ااااااااااه ياطلعة الراااااااااس من 8 سانتي وانا اصيح طلع راسها بس ينطرون
لين يفتح 9 …جتني رعشة الولاه قعدت انتفض وجسمي يرجف وحنجي يفتر ويمسكوني
هنيه بهالوقت امول وشايونه واقفين عند باب الولاده يقولون جوجو قمتي تصيحين صياااح موو طبيعي
قعدو يبجون من صياحي .. بس يادكتووووووور دكتوووووووور اااااااااااااااااه دكتووووووووووور ..
فجأه ولا اقوم سستر جم سانتي ماما مبرووووووووووووووك مبروووووووك خلاص انتي ولاده خلاص في بيبي
بنت واجد حلو ..
وامسك بطني واطالع الساعه سستر صج خلاص ولاده ؟؟ اي ماما مبروك خلاص ..
وين بيبي ؟؟ بيبي الحين يجيب .. جابوها لي فديتها حطوها عند خدي .. وانا بهالوقت قعدت اسبح واحمد ربي
واشكره … ماتتصورون بنات ان الولاده لحظاتها عظيمه … وعسالله يرزق كل محرومه بهاللحظه يااااااااارب ..
استمرت ولادتي 9 ساعات والحمدلله اهون من ولادتي الاولى ..
…
وبس سوري اذا طولت عليكم … بس حبيتكم تشاركوني تجربتي .. وماعندي مانع اجرب الولاده مره ومرتين وثلاث
..نعمه عظيمه ولها حكمه من ربي .. الحمدلله
والله يرزقني يارب ويرزق كل محروم
والحمدللهـ على سلامتج
ان شاء الله تشوفين بنيتج عرووس
ومبرووووووووووووووووك البنوته تتربى بعزك ورزقكم برها
عقبالي يارب وجميع المحروووووووووووووووووومات يارب
طالعة من الشر ان شاالله والله يبلغج في البنوتة وتشوفينها عروسة
Ana bwled bel rashid b3d w ba5d ebrat el ‘6ahar
والحمدلله على سلاااامتج وتتربى بعزكم يارب
والله يرزقج برهاا ويبارك لج ربي في اللي عطااج
وفعلا الحمل والولاده نعمه عظيمه من رب العالمين عسى الله لايحرمناا اياهاا
ياربي يحميلج بنيتج قولي امين ويحميلج اخوها مادري اختها ويحفظج لهم والف مبروووووووووووووووك
ومشكوره لانج دعيتي للكل
الحمدالله على سلامتج وتتربي بعزكم ان شاءالله
واااي والله خرعتيني احس اقراء وشافطه بطنى من الخرعه
الله يثبت حملى ويرزق كل محرومه اللهم امين
حمدالله علي سلامتج ومبروك البنوته والله يخليها لكم يارب ويحفظها والفال لنا يارب بولاده سهله امين رب العالمين
والحمدلله على سلامتج
عشت جو الولاده من جديد