|
|
السلام عليكم ورحمة الله وبركاته.
كيف حالكم خواتي العضوات إن شاء الله تكونون بخير وبصحة وسلامة.
هاذي أول مشاركة لي في المنتدى وان شاء الله ما بتكون الأخيرة.
اسمحوا لي في البداية أن أثني على هذا المنتدى الراقي " مدونة كويتيات النسائية " بعضواته الطيبات وبمواضيعه القيمة وأشكر كل من يقوم على إدارة هذا المنتدى الرائع مع تمنياتي لكم بدوام التقدم وتصدّر المراتب الأولى بين المنتديات النسائية.
أتمنى إني اخترت القسم المناسب لعرض مشكلة أختي العزيزة وانا اخترت قسم الحياة الزوجية للاستفادة من خبرات المتزوجات في حل مشكلتها العويصة،
قبل لا أبتدي أحب أقول إن يشهد الله علي إن قصة أختي حقيقية وإني "بنـــــت" وأتكلم من صجي طالبة النصيحة والتوجيه لأختي ومو من النوع اللي يحب يشوف ردود أفعال البنات. ولو بستهبل أو بستعبط ما بستعبط في موضوع خطير مثل موضوع أختي.
طبعاً احنا من عايلة محافظة والبنت ما شاء الله عليها داااانة آية في الأدب والأخلاق والجمال والدين وكل من يتمناها ما شاء الله عليها خطابها
وايد بس هي ترفض بسبب الدراسة والحين هي في الماجستير, إلين جا نصيبها اللي ما قدرت ترفضه لأن فيه كل المواصفات والشروط اللي تبيها, طيب وملتزم
ومتعلم وأخلاقه عالية يعني أول إن وَن ما شاء الله, ولأن قريب بتخلص دراستها فما لها عذر عشان ترفض, واللي خاطبها متزوج من قبل يعني مطلّق وأكبر
منها ب5 سنين, لكن لاحظت بعد ما انخطبت أنها تغيرت مرة وحدة صارت منعزلة وما تحب تخالط أحد ودايماً متضايقة ومكتئبة, حتى لتجهيزات زواجها مو
مهتمة ولا متحمسة وحتى لين يتصل عليها خطيبها تكلمه وبداخلها كتمة كأن قلبها محروق, استغربت هالتغيير المفاجئ بعد ما انخطبت, حاولت أعرف منها
واشوفها ليه تغيرت مرة وحدة من مرحة ورايقة ومبسوطة إلى متضايقة ومهمومة ومكتئبة? مع المحاولة قالت لي إن يوم كان عمرها 16 سنة كانت "اعذروني
عالتعبير" تغتسل وهي مستعجلة ومع الصابون والسرعة انزلقت يدها ودخل ثلاث أرباع إصبعها في ……….. وكانت أظافرها طويلة شوي, فجرحت نفسها وحست بألم خفيف ونزلت نقطة دم صغيرة وما اهتمت للموضوع لأنها ما كانت تعرف هالأشياء, ولما انخطبت بدت تقرا عن هالمواضيع "تعرفون لازم تتثقف كمقبلة على
الزواج", وتذكرت اللي صار لها وضاااقت الدنيا فيها, خافت تكون أصابت غشاءها ذيك المرة. وهي الحين عمرها 23 سنة وزواجها بشهر 12 .
تقول إنها مغصوبة عالخطبة وهي ما تبي لكن ما تعرف إيش تقول للأهل ما لها عذر, الدراسة وبتنتهي. المهم قلت لها يمكن جرح عادي مو شي مهم, تبين نروح
نكشف?!, في البداية رفضت لأنها قالت إنها متأكدة إنها فقدته, لكن أصريت عليها ورحنا أنا وياها لدكتورة شاطرة وثقة كل من يمدحها يعني ما عليها
كلام, وشرحنا لها الحالة وفحصتها وقالت لها الدكتورة عندك تمزق بسيط ناحية اليمين بس ما تخافيش حينزل دم في ليلة الدخلة عااادي جداً لأنه سليم
بنسبة 75%. لكن مع ذلك أختي انهارت وجلست تبكي وتقول خلاص ما عدت عذراء ما عدت بكر, وانا أهديها وقلت لها دام الدكتورة طمنتك ليه خايفة?. تقول
الطبيب غير المجرب, خطيبي متزوج من قبل وهالموضوع مكشوف من قبل الزوج لا محالة خاصة المتزوج من قبل. وتخاف ما ينزل دم, قلت لها يا حبيبتي حتى
ولو متزوج هو مو طبيب عشان يعرف. قالت ورغم ذلك أنا خايفة لأني سمعت إن البنت اللي تنزف مرة ما تنزف مرة ثانية وأخاف زوجي يعرف.
هل خوفها في محله بعد اللي قلته لها واللي قالته لها الدكتورة? معقولة الزوج بيكتشف هالشي؟ الدكتورة قالت لها
مش حيعرف وما تخافيش كلو تمام, لكنها بعد خايفة لأن خطيبها كان متزوج ومن القصص اللي تسمعها واللي تقراها إن البنت اللي تعرضت لهالشي أمرها
مكشوف وما بتنزف مرة ثانية، وغير أن عندها فقر دم فتخاف يأثر عليها. فهل هذا صحيح??. أرجوكم طمنوها وشيلوا هالوهم من راسها أختي في حالة نفسية سيئة جداً جداً ويتقطع قلبي عليها وأخاف
بفكرتها هاذي تقضي على مستقبلها وتحرم نفسها من الزواج والأطفال وهي تستاهل كل خير وألف من يتمناها والله من أشوفها مهمومة أتحسر عليها أقول وين
كانت قبل سعيدة ومفرفشة ومبسوطة وتحب الحياة والحين غرقانة في هالهم اللي غير نفسيتها وهيئتها واللي هو آخر شي توقعته يصيبها. فهي تبي تجارب
عشان ترتاح تبي تعرف راي المتزوجات وخبرتهم ومعرفتهم هل مشكلتها كبيرة وراح تنكشف ليلة زواجها من زوجها اللي كان متزوج سابقاً? ريحوها من
هالتفكير اللي بيتعبها أكثر تدرون الموضوع حساس وخطير رغم طمئنة الأطباء يبقى خطير بسبب مجتمعنا اللي مهوّل المسألة ومعطيها أكبر من حجمها.
فبخبرتكم ومعرفتكم انصحوها إيش تسوي وكيف تتصرف?. أفيدوها طمنوها وريحوا بالها.
بانتظار ردودكم وتفاعلكم وراح أعطيها رابط الموضوع عشان تشوف ردودكم وترتاح. وانا ما نزلت موضوع أختي الغالية على قلبي في هالمنتدى إلا لثقتي
الكبيرة في أعضائه ومدى تفاعلهم ومساندتهم لحل مشاكل الأعضاء الآخرين. وانا متوقعة منكم كل خير فلا تفشلوني. وأي سؤال أنا حاضرة أسألها
وأجاوبكم.
بانتظار ردودكم.
تحياتي لكم.
أختكمـ: الشهـــد
في وحده ريلها يدخل عليها من اول ليله وفي حريم رياييلهم يحاولون من شهر لي 6 شهور يالله تصير
بعدين اشعرفه ماتوصل لي هالدرجه انه بيقارن بين الاوليه والثانيه .. لا ماتوقع واشلون بيبين يعني اهي قالت تمزق بسيط ماقالت مفتوحه ماراح يبين ولاشي ..
بعدين عادي في حريم ينزل منهم دم وفي حريم ماينزل منهم دم .. وفي حريم ينزل الدم اكثر من مره ..
انا نزل مني تقريبا 4 مرات .. سبحان الله .. حرمه عن حرمه تفرق ..
لاتحاتي يبا وخل تتوكل على الله مدام الدكتوره فحصتها وقالت راح يطلع دم اكيد الدكتوره عارفه شغلها اختج لاتعيش روحها بوسواس وبعدين ماكو الا الخير وترى كلنا نحاتي سالفة الدم حتى اللي مو متعرضه لحادث ومتاكده ان مافيها الا كل خير تحاتي .. شي طبيعي .. بس لاتعطيه اكبر من حجمه .. واذا صار ماصار ولا سمح الله ريلها تكلم .. خل تمسكه من ايده وتوديه حق الدكتوره وتفحص على اختج جدامه .. وراح يبين كلشي .. وبيعرف انها مازالت عذار وبكر ..
لا مافيها الا العافيه دام الدكتوره تقول تمزق بسيط اهي ادرى لان شافت اختج
وقوليها خل تستخير وتوكل امرها لله سبحانه اهو الي بيساعدها وخل تدعي ربها يوفقها
وانشااءلله ماكو الا الخير .. واذا الريال شك بعدين مو مشكله خل تروح تفحص واهي معاه
دامها مو مخربطه قبل لا تزعل خل تروح معاه واطمن االريال … اكيد واحد مطلق بيكون له خبره بهالسوالف ويعرف
انتي كنتي كاتبته بمنتدى نسائي غير كويتيات
؟؟؟؟
خل تاخذه عند الدكتورة و اهيه تشرحله الحالة و ان اللي صار بسبة غلط
والله تقطع قلبي عليها
عسى الله يستر عليها و انشالله كل الامور تمشي تمام
يعطيكم العافية
عادي …
الله يوفقها..
و خليها تتوكل على الله
ومثل ما قالو خواتي راي من رايهم تراجع الدكتوره مع ريلها
انا ما نزل مني نقطه دم
بس لما رحت الحمام اغسل الافرازات كانت برتقاليه فيها مثل الدم عرفتي
وعادي الزوج ما قال شي لان كافي حس بالمكان ضيج
وتقعد الوحده فتره يالله يقلقصه سوري على الكلمه بس عشان تفهم اختج لانها بنت ما تعرف
وبعدين اهي فيرجن كل ما قرب بيدخله بتدزه وبتشد عضلاتها وتصكر رجولها هالشي كافي انه يعرف انها فيرجن
السالفه اكبر من نقط دم!
تتزوج وما يصير الا اللي الله كاتبه
وتاكدي ان الله يستر على عبده دايما
شكثر بنات مخربطين الحمدلله والشكر وستر الله عليهم
هالنوب بتقولين نقط دم
تتزوج وتتوكل على الله
خليها تقرا كلامي بعينها
باي
وبما انه متزوج راح يعرف انها عذرى مو من نقطة دم . من التجربه واضح
لان البنت بنت مايحتاج دم دليل للعذريه
خليها ترتاح هاذي محاته طبيعيــه , وعسالله يوفقها