|
|
السلام عليكم يا قمرات 
ولهانة على المنتدى. من زمان ما كتبت فيه.
يمكن سمعتوا وايد عن المردقوش واهو عشبة مفيدة جيدة. واليوم سويت لكم تقرير مفصل عشان أفيدكم.
والله أبيه منكم دعوة بظهر الغيب أنه الله يحل مشكلتي. مو لازم تردون على الموضوع وتدعون لي، بس يكفيني في سركم إنكم تدعون لي بالخير والتوفيق 
الاسم الكريم 
طبعا اهوه له أكثر من اسم في العالم العربي وكلهم نفس الشي:
مردقوش – بردقوش – مرقدوش – مردكوش وبالإنجليزي اسمه marjoram
المردقوش للطبخ:
طبعا أهو وايد حلو للأكل، يعني ممكن تستعملونه كبهار، وممكن تحطونه في الصلصة مالت البيتزا، أو لما تتبلون اللحم أو الدياي.
الفرق بين المردقوش و"ماي المرقدوش" اللي ينباع في غراش:
اللي قاعده أتكلم عنه اليوم اهو العشبة نفسها. ماي المرقدوش أعتقد أنه مثل ماي اللقاح، يعني ماي وحاطين فيه العشبة شويه لما صار فيه منها طعم والمواد الفعالة (أعتقد مو متأكدة) وطبعا ما راح يكون بنفس قوة وتأثير طريقة الاستعمال حق العلاج أو الشرب اليومي اللي الحين بقول لكم عنه. لا تستعيلون
المردقوش كمشروب ساخن:
المردقوش ممتاز للاستعمال بعيد المدى ويمكن استعماله بدال الجاي، و إذا حطيوا عليه عسل بدال الشكر، شوفوا الطعم
فوائده الطبية:
1. هذا مو كلامي، هذا كلام الدكتور عبد الباسط سيد (وهي غني عن التعريف، متخصص في العلاج بالأعشاب) يوقل أنه للتوزان الهرموني للرجل والمرأة. يعني أي مشكلة هرمونية بإذن الله علاجها في المردقوش. ويشرب المردقوش الساخن 3 مرات في اليوم لعلاج الهرمونات.
2. الشي الثاني أن "زيت البردقوش" ممتاز في حالات الزكام. وفي زيت شفته عن الحواي ماركة "الكابتن" مكتوب عليه "زيت البردقوش" (أظن سعره دينار ونص أو دينارين والعلبة فيها 30 ملم) د. عبد الباسط يقول يندهن فيه الأنف، ممتاز لحالات النشلة والأشياء التنفسية في الأنف. وأنا ما جربت الزيت بصراحة، بس الدكتور عبد الباسط يمدحه وايد.
وهذي صورته:
ومكتوب فوائد الزيت:
مفيد لحساسية الجيوب الأنفية والبرد والزكام والرطوبة. يدر الصفراء ويفيد في الاستسقاء، وله دور قوي في تنظيم الدورة الشهرية وإدرار الطمث.
3. للأشخاص الأصحاء أيضا شراب المردقوش ممتاز، إذا شرب في الصباح يكون مقو عام general anabolic وفي المساء مهدئ.
طريقه الإعداد:
ممنوووووووووع غلي العشبة! ممنوع أصلا أي عشبة تنغلي بما في ذلك الجاي!
لأن الغلي يطلع مواد ضارة من الأعشاب تسبب مشاكل للجسم لا سمح الله.
الله يسلمكم تغلون ماي وبعدين تحطون فيه المردقوش (ممكن يكون مجروش وممكن يكون أكياس جاهزة) ، وتغطونه مدة 5-10 دقائق (تخدرونه يعني ) عشان الزيوت الطيارة تنزل في الماي وتستفيدون منها.
من وين نحصله:
1. موجود عند الحواي، الكيلو جنة ب 4.500 بس أنا صراحة ما أحب أشتري من الحوايين أشياء مكشوفة وأشربها أو آكلها. حق البشرة ما يخالف، بس الشرب والأكل صعبة.
2. ومرات تلقونه في قسم البهارات بالجمعية مجفف، حق اللي يبون يستعملونه حق الطبخ.
3. وأحسن شي حق الشرب عندكم مردقوش معبأ على شكل أكياس (مثل أكياس اللبتون) ونظيف. تحصلونه بالجمعيات وسعر العلية نص دينار.
وهذي صورته البهية:
وبث
ولا تنسون تدعون لي، مو شرط تردون على الموضوع، في سركم كفاية، ومثل ما قال الرسول صلى الله عليه وسلم إن"دعاء الأخ لأخيه في ظهر الغيب لا يرد".
وسلامتكم.
,
مشكورة
انا اشترية طازج واجففة
كنت ابي معلومات اكثر
واب لعيون الباقي يستفيدون منه
انا اشربه حار .. و انصحكم فيه
اثاااريهم لنفس الشغلة