الآبط و الثدي

السلام عليكم … أسفة اني اضايقكم بمشكلتي بس انا عندي مشكلة مضايقتني وودي اخذ رايكم …انا عندي الغدد بالأبط كبار ووارمين واحس فيهم صعرورة وبين فترة و الثانية يعوروني .. راجعت فيها استشاري غدد … بس أبي مساندة وتوضيح من اللي تقدرأو سمعت عن هالشغلة … … وكذلك الصدر ما احس بالورمات بس أحس بثقل و شي غريب … المهم السالفة بدت قبل سنتين حسيت بألن طبعا قبل لمن كنت أشيل ابطي بشيرة أقعد يومين أتألم وأحيانا ترتفع حرارتي .. تالي قمت أستخدم الموس بس هذاك اليوم الألم من غير سبب …سألت و انصحوني أسوي سونار فلقوا 8 سيست في اليمين 3 واليسار 5 شي ورا الحلمة شي بالجنب بس الدكتور طمني بان حجمهم أصغر من 5 سم و ان عمري تحت ال 40 فماله داعي احاتي و ان شكل اباطي نازل طبيعي هند بعض الحريم …وقال ان بعد عمر ال 40 ابتدي كل 6 شهور اسوي موموجرام أو ان اذا حجمهم أكبر من 5 سم حتى لو قبل عمر ال 40 سنة يسحب منهم عينة عشان يشوف شنو اهمه …… فهالموضوع متعبني نفسيا حده و اذا بسوي عملية قال لي استشاري الغدد ان اهيه عملية سهلة بس اقعد شهرين ما احرك ايدي عدل و انه راح يشيل كل الغدد من دااااااااااخل وان اغلب الحريم اللي ابطهم متفوخ نفسي يسوونها كتجميل عشان اذا يبون يلبسون بدلات سهرة علاليق ….!!!
طبعا انا مو هامني شكلهم عساني ما لبست حفر … بس خايفة و مترددة و ما ودي أحورف بعمري و دايما أفكر أعوذ بالله بالشي الشين …فشرايكم بنات الحين رجع لي العوار بأبطي اليمن علما بأن اول فحص كان قبل سنتين و الثاني قبل 5 شهور بس ما دخلت على الاخصائي بس عند دكتور السونا و كان الوضع نفس ما اهوه الا ان عددهم قل لكن الالم موجود وأمس رجع لي العوار …فنصحوني …شسوي ؟؟؟

الف لاباس عليج

وبخصوص الغدد مالي خبره عشان افيدج

بس الشين الله يبعده عنج وعن كل مسلم مايصاحبه ألم بس يظهر بشكل ورم او حبه او صديد من الحلمه او انكماش الجلد بشكل واضح

ودام فاحصه والطبيب مطمنج انها غدد وعادي تزال ماله داعي المحاتاة والتفكير

وراجعي الحين اذا قالج تحتاج ازاله توكلي على الله وسويها

وأفضل اخذي راي كذا طبيب

وماتشوفين شر يارب

ما قصرتي يالغالية … والله انا محتاجه رايي ثاني و محتاجة أفضفض و ما تتصورين شكثر فرحت بردج

اختى ما تشوفين شر

الافضل تاخذين اكثر من راى ,, استشارى بالغدد يكون افضل وافهم ,, انا ماابى اخرعج بس

الحرص واجب والف سلامه يارب,,

الله يسلمج من الشر … ما قصرني بس ترا انا اللي راجعته استشاري غدد

جزاج الله خير جاي الضحى ردج مرهم على قلبي ….انا معاج بس اتصور هالشي يمكن يكون طبيعي هند بعض الحريم انا ربطته مع الهرمونات … لان أول مرة و ثاني مرة كنت استخدم الحبوب اللي ترفع الدورة عشان العمرة بس الحين انا مو قاعدة اخذ شي بالمرة و من الاساس ما استخدم حبوب منع حمل … فحسب تحليلي يمكن من هالحبوب بس اشمعنى الحين في الم ؟؟ شكلهم هذا اهوه بس الالم … وعموما اختي الله يرحمها (وفاتها ماء على الرئة بسم الله عليكم ) و عمتي الله يطول بعمرها أباهم متفوخ بس ما اشتكوا من الم ام صعارير و خلافه .. شورج و هداية الله بستخير و بروح حق كذا دكتور و على قولتج الوقاية خير من العلاج ما قصرتي و عسى ما تشوفين شر و تلاقينه بدنياج يارب

[QUOTE=حبنا الله عليه;5533969][color=#ff3399][font=courier new][size=4][align=center]
الف لاباس عليج

وبخصوص الغدد مالي خبره عشان افيدج

بس الشين الله يبعده عنج وعن كل مسلم مايصاحبه ألم بس يظهر بشكل ورم او حبه او صديد من الحلمه او انكماش

انا مرة سألت وسمعت انه يصاحبه ألم و مرة قريت مقابلة زهرة الخرجي و قالت انها حست بألم الله لا يقوله استغفر الله الحمد لله الذي عافانا مما ابتلاهم به و فضلنا على كثير مما خلق

ماتشوفين شر يارب

روحي لاستشاري ثاني واخذي رايه تحركي لاتسكتين وتهملين صحتج

مرت حمى اختى كان عندها انتفاخ بالغدد بابط واحد وشالتهم ومافيها الحين الا العافية

طمنينا عليج

ما عليج شر انشاالله الله يشفيج يارب ومافي الا العااافيه انشالله ،، والله للأسف ما عندي شي أفيدج فييييه بس انتي تقولين العمليـة تأثيرها بس شهرين ما تقدرين تحركين ايدج عدل اذا بس هذا الأثر وبعدين ترجعين لطبيعتج والله سويها وارتاحي بس سألي اكثر عن العملية انشالله في أحد اهنيه يفيدج ويرد عليج وينصحج احسن مني بس دام الدكتور ناصحج سويها وتحملي هالشهرين وانشالله ترتاحين ياااااااارب و آسفة لأني ما افدتج بس خليني أشاركج معاناتي هم تحت الإبط و مو من سنتيـن من 5 سنيـن مو راضي يروح وتعبت وانا أراجع بس محد يفيدني بسمالله ما يمديني اتحجى الا كتبولي مضاد حيوي انزين الله يهديكم ليش ما يسوولي فحوصات تحاليل يعرفون شفيني قبل ما يوصفون الدوى انا أعاني بالتهاب بغدد الإبط و أكثر من دكتور قاللي انتي تعانين من التهاب الغدد العرقية بس مادري تشخيصهم صح والا لأ ما يندرة بعد !! مع اني كنت خايفه ان يكون فيني الشين الله يبعده عنا و عنكم لأن حسيت تغير بجلد الثدي وايد متغير ما ادري شلوووون ماعرف أوصف بس خفت حيل وعشت حاله نفسيـة وهم كان عندي تفخه تحت الابط صوب الالتهاب مرة تنتفخ ومررره تطخ و للحين خايفه لاني راجعت دكتورة جلدية حسيتها مالها علاقه بهالشي وصفتلي ادوية بدون لا تفحص عدل بس شافت شكله و على طول كتبت أدويـة ما فادوني كلش و من قبل ياما كتبولي مضادات حيوية ولا فادني كلماله ويزيد والمشكله ان مأثر على الوي صار شاحب ومنتشره فيه حبوب " دكتور قاللي الالتهاب له علاقة بحب الشباب اللي تطلع بالوي " وبعد يطلع دمل أو ورمه أعلى الفخذين و صح هذا اللي فيني بس ما ادري كلامهم هذا صج والا لأ لأن مافيه أحد فحصني عدل مجرد ما يسمعون كتبووو الأدوية و الحين مفكرة أروح خاص بس ماادري وين اروح جلدية والا شنوو مابي اجرب بعد أدوية واخر شي يطلعون مو لي لأني جربت وايد وشكلهم يوصفون شي ما يناسبي .. !

سلامتج حبيبتي.. ونصيحتي انج ما تنطرين
روحي حق جراح مثل د. فواز العامر ..
واجر وعافية ان شاءالله

جاي الضحى كلامها عدل لهالسبب مابي ازيد عليه سلامات يالغاليه

حبيبتي سلامات ما تشوفين شر اذا تبين دكتوره جراحه عندج ميرفت الصالح اهيه مختصه بأمراض الثدي عندها عياده في الجابريه و الصبح تداوم بمستشفى مبارك بس ما عليج الا العافيه لأن انتي اللي فيج غدد صح مو اورام حبيبتي

سلامات وما تشوفين شر ان شاء الله
انا ما عندي فكره عن الموضوع ..
بس اتوقع لراحه بالج سألي اكثر عن العمليه
واذا مافيها مشاكل توكلي على الله وسويها
واذا خايفه من الشين لا سمح الله سوي اشعه الميموجرام عشان تتطمنين

سلامات وماتشوفين شر