افكار جديده و راقيه لتوزيعات الولاده وفناتق التقديم افكاري متجدد

بما اني كنت من الرواد في زياره قسم الحمل و الولاده وحييييل ادور كل فنتق و جديد من مواعين و اكسسوارات التقديم + توزيعات الولاده اللي يعرضونها البنات …
وما يخفى علي و عليكم المعاناة و التعب من الفراره بالسووق ندور كل الجديد من الفناتق …خوو الثقل مسوي شغله

فقررت اني انزل افكاري المتواضعه ان شاء الله تعجبكم و تستفيدون منها ..

اللي راح اعرضه لكم مجموعه متجدده من الافكار تقدرون تستمدون منها ضالتكم و تطورونها كلن حسب حاجتها ….

توزيعات ولاده …

فناتق وافكار للتقديم …

اكسسوارات للزينه …

والاشياء اللي استخدمها كلفتها بسيطه تلقونها بكل مكان (عشان محد يقول تحرضين على المبالغه والبذخ)

صحن مثل هذا ..

كوب مثل هذا …

تحطين الكوب بالصحن على جنب …
و الجنب الثاني بالصحن تحطين فيه (وصلنا للفنتق) اللي يعجبج …

راح يصير شكله جــــــــــذي …

بنات ما اقدر بالكتابه اوصف لكم شكثر شكله راقي بالصج و فنتق لان هالمواعين شكلهم بالصج نعووووم مو كبار مثل ما الصور مبينتهم ……

لحد هني اترك لكم التكمله …..

تقدرون تفكرون شنو راح تحطون بهالمواعين …. تقدرين تستعملينها للجاي و الحليب و القهوه بأنواعهم …..

او

تحطين نسكافيه …او كابتشينو …
وبجانبه تحطين قطعه كاكاو ….او حلو ….او ميني كيك ….او جيزكيك …او كاكاو مغلف ..(الخيارات عدييييده )

وايضـــــــــــــــــــا نقدر نتفنتق بشكل السكر اللي راح نحطه …(السوق والبنات عندهم اشكال و اللوان بفناتق السكر)

ف بالصينيه الكبيره تصفين هالصحون يم بعض او تحطين شمعه و تصفينهم حواليها …وياا حلووو شكلهم وقت التقديم بايد السيرفس اللي تقدم لضيوفج …..

هذي الفكره تصلح لبنت بس اللي تبي للصبيان السوق متروووس مواعين تمشي مع الوان طقم استقبالكم …

واكيد بتقولون ما تكلمت عن القفاش …..(القفاش متوفره اشكال و الوان بالمحلات الكبيره مثل زارا هوم وكل لحظه المهلب ومحلات الصحون والمواعين ….

(سامحوني بنات انا احط لكم نمونه من الصور واكمل باجي فكره التطبيق بالكتابه ……)