|
|
الخدامة اكبر مشكلة في البيت
ليش صار لازم الاستعانة بالخدامة علي الرقم من ان المراة قادرة علي ادارة البيت علي اكمل وجه ؟
اكثر المشاكل الزوجية في البيت سببها الخدامة
البداية في طلب الزوجه الي الخدامة وتبدا بعدها مشاكل الحياة مابين موافق ورافض للفكرة
ولاكن هل تعلمين ايتها المراه انكي قد تدمرين حياتك بهذه الخادمة
لانك بكل سهولة سوف تسلمين شخص اخر قيادة البيت ومن هنا تبدا الحياة بالمرارة
1- ضعف النطق الصحيح لدي الاطفال
2- عدم النظافه والاخلاص بالعمل
3- ادخال شخص جديد الي بيتك ومجتمعك لاتعرف عنه اي شي من تربية واخلاق وغيرها
4-نسيان دورك في التربية والمحافظه علي الزوج وجعل الخادمة تقوم بكل شي من اكل وشرب وتنظيف وترتيب وغيرها
5- يتولد شعور عند الزوج ان الزوجه ليس لها اي دور ويمكن الاستغناء عنها لان الخادمة تقوم بكل شي
6-بعض الخيانات الزوجيه مع الخدم
7-تفشي اسرار البيت الي الخارج وتناقلها بين الخدم
8-تصبح المشاكل بين الزوجين بسبب ومن غير سبب
وغيرها الكثير
نصيحه ؟
الانسان لايعيش سوا مره واحده في الحياة لذالك فليحافظ علي نفسه ويفكر بما يدوم له لان لا العمل ولا المناسبات ولا غيرها يجعلنا نهمل بيوتنا بايدي الخدم
ارجو التوفيق للجميع
انا ما أايد انه المره الي ماتشتغل تحط خدامه ,, اما اذا كانت موظفه الوضع يختلف
شنسوووي هالاياام الخدم شي ضرووري
يعني الوحده ماتقدر تقوم بكل شي
تنظيف /طبخ/غسيل/ عياال/ واهمامها بزوجها وبنفسها/
والخدامه لها شغلاات معينه تقوم فيهااا
وتسلميين حياتي على وجهة نظرج
وطبعا بطبيعه وضع الام العمل والبيت وغيره لازم يكون فى شى مساعد
واعتقد الوضع طبيعى اذا الام اهتمت بامور الطفل
وشكرا للموضوع
انا موتي وسمي الخدامة الله يقدرني يارب وما اجيب هالمخلوق لبيت والحمدلله والشكر زوجي ما عليه قاصر اعطيه كل يلي يباه وان كان ما عندي او ما اقدر هم يقدر موقفي
انا من كنت ببيت اهلي اثنين من الخدمات ولو والسبه انا لاني غيورة على اهل بيتي واكره الغبية يلي تتشرط وهي بالاصل مالها كلمة بالبيت
ياما وياما صارت مشاكل في البيت بسبب هالملعون
بس الحمدلله امي سيطرت على الوضع وارتحنا من هالعوار راس
بس الحينه ان شاء الله ما يجي اليوم يلي انا يكون عندي خدامة واذا اضطر الوضع اجيبها اهناك معاملتي لها تكون خاصة وغير
والزمن تغير .. يعني الوحده وينها ووين تغسل / تنظف / تكوي / تجابل ريلها / تطبخ / تجابل عيالها
حتى لو مكينه اختربت ولا عاااد تشتغل مره ثانيه
الحل انه ما نستسلم في المواقف الصعبه نواجها وما نهرب من المشكله وأنا أشوف ان الخدامه شي صعب بس وجودها ضروووووري عشان المره تكون ريلاكس
بس منوا اهم الدوام والشغل ولا البيت
منوا اهم الطبخ من ايد راعية البيت ولا الخدامة
الزوج اذا اكل من ايد زوجته الاكل له اثر كبير بقلبه
وبعدين كثير من الازواج اقدر اذا زوجته كانت ما عندها خدامه واتفهم الوضع
البيت قبل كل شي
شوفوا المشاكل الي قاعده اتصير في الديره 90 % من الوافدين وخاصة الخدم والسواق وامور كثيره قاعده اتصير بالبيوت الله يستر منها سببها الخدم
الخدامة شر لابد منه
مع ظروف الحياة اللي صارت صعبة المرا تقوم من صباح الله تداوم وترجع البيت حده حده تلاقي اليهال يبون غدا
بالعكس انا اشوف الخدامة تقوم بدور المساعد للمرا تدخل بيتها تلاقيه نظيف ومجهزه لها مقادير الطبخة
وهم انا رايي من راي البنات ان الخدامة ما اسلمها زمام امور البيت لكن اهيا تقوم بشغلات معينة فقط مثل غسيل ملابس صحون كوي
اما اليهال والزوج فهم من مسؤلية المرا
انا مااشتغل " ربة منزل" بس هم بحاجه للخداامه
يعني عياالي 2
بنتي عمرها سنه و8 شهور والولد 3 شهوور
وبصرااحه قبل ماتجيني الخدامه والله ماكنت انام مثل العالم ولا اقدر اطلع مع زوجي
حتى السبووح بالحسره شوور عالسريع واطلع ماقدر اروح صالون
طوول الليل سهر مع ولدي ماتجي الساعه 8 الصبح الا بنتي قاعده اضطر اقعد معاها
كنت طوول اليوم تعب بتعب
ولاتقولين اطلعي وخليهم عند اهلج ولاحمواتج
بيتقبلونهم مره مرتين مو على طووول
ابسط شي زوجي يبيني اطلع معاه الممشى ماكنت اقدر
واذا بوديهم بيت اهلي منوو بيقابلهم ماعندي غير اختي الصغيره واخووي
وامي تعبااانه
ولما جبت الخداامه الحمدالله رااااحه
علىى الاقل اقدر انام جم ساعه متواصله
اذا انتي مو بحاجه للوظيفه اختي في غيرج محتاج لها حييل مو شويه…
بعدين الطباخ من ايدينا احنا مو شرط الخدامه
والخدامه بس تجابل الجهال اذا منت بالدوام
عقب الدوام يومي كله وليلي كله لهم وحق ابوهم….
اهي بس تخم تغسل ملابس الاطفال وتكوي وتمسح الارضيات والحمامات وانتو بكرامه….
بالنسبه لي ماتلمس شي بالاكل حتى البصل انا اقصصه……. واللي تبي تطبخ تطبخ بالليل ولما تجي من الدوام تسخن وتحط الغدااا
اهم ضج فيهم سلبيات واجد بس اهم شي اساسي مو ثانوي….قبل الامهات يقدرون يمسكون عيال بنتهم او عيال ولدهم والحموات وخواتج…. الجده كانت ترعى الاحفاد… الحين مع كثره الامراض والسكري والضغط … والرماتيزم من يقدر؟؟؟ يالله بس تعطيهم العافيه مانبيهم يمسكون عيالنا يالله يقدرون على نفسهم مساكين…..
وتقبلي تحياتي قبل مروري على موضوعج
ام عبوش
واحس ماني متقبله اي خدامه او شخص غريب
لاني تعودنا الاستقلاليه انا وريلي بالشقه وناخذ راحتنا
واوصخ شي بعد انه وعن تجربه من زمان قبل لا اتزوج
اختي ماخذه ولد عمي وساكنين اهناك
وخدامتها كل ما تيي طبعن كل شي تقوله حق خدم بيتنا وخدم اخوي واخواتي
وخدامتنا كانت تقولي وربي عرفت اخياس عن العايله وفاضيح
وتقولي الخدامه انه كل خدامات عايلتنا يدرون اكثر منا عن البلاوي لانه كل ما راحوا مكان تكلموا
يعني لو ريلج صارخ عليج بيوم توقعي الكل يدري عن المشكله
انا كنت من المعارضين لفكرة انو اجيب خدامه وكنت ما احبهم عند اهلي اححس وراهم بلاوي تزوجت قعدت 3 سنين بدون خدامه ماقدرت اتحمل اهلي يقولون ها مااستسلمتي منتي جايبة خدامه وللاسف انهد حيلي بغيت اموت من التعب والارهاق وتوني جبتها لها كم شهر بس انتي بيدج كل شي موتقطين
مثلا انا اطبخ لزوجي واغسل عيالي واسوي لهم الحليبه والبسهم البامبرز و واوكلهم واغسل ملابسي الداخلية وملابس ريلي الدخلية واشرف على شغلها
ومع هذا اتعب اموت عيل شلون لو شغل البيت كله على راسي,,, على الاقل هي فاكتني من غسيل المواعين وتنظيف الارضيات وخم السجادات وتنزيل الزبالة (تكرمون ) اشياء واجد احتاج لها كافي انها عندي اذا كان دوام ريلي ليل لاني اخاف بروحي
وكلش ملش ما اخليها تولى عيالي ولا اخليها عندهم واطلع احطهم عند اهلي واطلع وانا مرتاحه
بس سبحان الله لما تكونين بدون خدامة تحسين براحه ونظافة البيت ومن يجون احس بقمته والبيت وسخ لو تنظف مية مرة
الريال يبي المره تشتغل وعلى الاقل تشيل نفسها
اليهال يبون ام تدرسهم على الاقل هذا يبيله اربع ساعات باليوم على حسب استيعاب الياهل
وبعدين اي مشكله في البيت بيني وبين ريلي ليش انصرخ والصوت يوصل لي الييران