اعتب على المدرسات

السلام عليكم ورحمة الله وبركاته

كاد المعلم ان يكون رسولا

في ايامنا قبل كانو في مدرسات من الي فيهم دين وخير لصارت حصص الاحتياط الي يكثرها الايام هذي او النشاطات او اخر 5 دقايق كانوا يفضون وقتهم لطالبات ويقعدون ويكلمون عن امور الدين والقيم والاخلاق واحتشام البنت ويستانسون الطالبات على المدرسات ويكونون قدوه لهم امثال الداعيه اقبال الغانم وغيرها من الفاضلات مدرسات قبل الي تفرض احترامها غصب على الطالبه مو الحين تلقى المدرسه تشغلها امور تافه جدا ولا عندها وقت انها تنصح ولا تعلم لانها ماتدري انها محاسبه على افعالها ولا تقولون انا ظالمتهم عندي بنات وخوات وبنات جيران والله ماعمري سمعت ان ابله جمعت بنات وعلمتهم على حب الحجاب على الحياء عن قصص الانبياء عن نبينا محمد عن اعداء الاسلام ننشئ فيهم بذره طيبه مو السطاله يجيج الواحد مايعرف شي حتى درسه مو فاهمه ليش يامدرسات زياده وعطوكم والله يهنيكم بس اتقوا الله في هالاطفال اتقنوا تدريسهم لطلعين الجاهل الا فاهم من حصتج وحتى اذا مافهم المستواه ضعيف اجمعيهم بالفرصه واستغني عن الهذره الي مالها معنى لانج في مكان عمل والله راح تحصلين دعاوي اهل الطالب لانهم لما يشوفون عيالهم فاهمين او معلومه جديده مكتسبينها شي يفرح صح ولا لأيمكن كلامي يزعل بس لازم انتكلم ونصارح بعض لمصلحة عيالي وعيالج والي عندها ضمير تقول فعلا وليش مانحسن من نفسنا وتمنياتي لكم بالضمير الحي.

لا من قالج اصابج مو كل واحد اعرف مدارس يختمون القران من حصص الاحتياط وناس يقرون السير وناس تحول عندهم الحصة الى درس ديني

صاجه اختي في تربويات للاسف طمعانه بالراتب ما همها فهم الطالب وانشاء جيل متعلم

والله كلامج صحيح 100% تدخلين حصة الاحتياط على معلمة فجاة تلقين البنات اللي قاعده فوق الكرسي واللي مسوين ديوانية حتى ماتفكر تقولهم راجعوا درس أو كملوا دفتر أو حلوا واجب 000شي والله يعور القلب

انا عن نفسي كل ما دخلت احتياط قلت طلعوا ورقه وانسخوا جدول الضرب
اما على قولتك في الفرص نمسك الضعاف مره في واحد عندي مسكته بالفرصه علشان بس يكمل كتابه وقعدت احل معاه تدرين شنو صار؟ من بكرى جت وليه امره تشتكي تقول ما استانس بالفرصه للعلم استدعيتها الف مره علشان غياب ولدها وكتابه وما جت ومن مسكته جتني شكايه !!!!!
ليش المعلمات تغيروا ؟ انا اقولك من دلع اولياء الامور لعيالهم ومن كثر المجهود الي علينا من مسابقات وخرابيط

للأسف .. كلامج فيه ظلم يارحيل الشمس ..
لو غلطت معلمة وحدة مو معناته كل المعلمات جذي ..
و للاسف دايما تشوفون الصورة السلبية عنا احنا المعلمات .. ما تدرون إن هالزمن فيه معلمات يعطون من قلبهم و روحهم لبناتهم الطالبات …
و الله العالم إنا نخلي عيالنا بالبيت تعبانين ونداوم عشان ما تتاخر صفوفنا .. و ندرس البنات بضمير حي .. وإخلاصنا مو متوقف على حصصنا و مناهجنا بس بالعكس كل البنات خواتنا و بناتنا و نصايحنا لهم عمرها ماتتوقف .. احنا نشجعهم أكثر منكم يا امهاتهم .. في بمدرستنا تكريم للبنت اللي تتحجب و نصورها و نحط صورتها على لوحة شرف .. و بنهاية العام يكون في تكريم لملكات جمال الاخلاق وهم كل طالبة تميزت بحسن خلقها على مدار العام .. ياما و ياما أصلحنا بين بنتين متزاعلين مع بعض .. و ياما و ياما سترنا على بنات يكلمون صبيان و نصحناهم ليما الله هداهم .. و ياما و ياما شكولنا بنات من أهلهم و مشاكل بيوتهم ووقفنا معاهم وحلينا مشاكلهم .. و ياما و ياما تفوقوا بنات و السبب مدرساتهم اللي حبوهم .. صدقوني أشياء حلوة شكثر نسويها و ما يعلم فيها إلا رب العالمين و بناتنا الطالبات .. حتى الاستكرات اللي فيها صور فاضحة و تشترونها لعيالكم قاعدين ننصح البنات يشيلونها من دفاترهم .. نشجعهم على النظافة و الحياء و الاحترام .. و لا أحد حاس فينا ..
يااااااا أمهااااااات اتقوااااا الله فيناااااااا و تأكدوا بأن المعلم شمعة تحترق داااااااائما لتنير دروب الآخريييييييين ..

جزاج الله ألف خير يا اخت " توفت" عز الله انج كفيتي وفيتي وتكلمتي بلساني وبلسان الكثير من المعلمات اللاتي يعملن من دافع رقابة ذاتية من رب العباد وليس لاجل العباد !!ومثل ما قال المثل " إن خليت خربت" وإذا كان فيه نماذج سيئة من معلمات خلنا نشوف الجانب المضئ وهو أن هناك نماذج أيضا رائعة وعلى النقيض هناك نماذج أسوء من السوء من أولياء الأمور وفيه بعد الرائع
فيجب عدم التعميم ،،،،،،،لان مثل ما الزمان القديم فيه مدرسات زينات هم هالزمان فيه مدرسات أيضا ممتازات ((لكل زمان رجال ودولة))

بعدين يارحيل الشمس اللي تغير الحين مو المعلمات إلا الأمهات ..
أنا أمي قبل لما تجي اجتماع الامهات تقول حيلكم ببنتي لو غلطت مع إني كنت الأولى على المدرسة كلها ..
قبل ولي الامر يقول للمعلم : لك اللحم و لنا العظم ..
الحين يقول : ياويلك بالويل إذا بس قلت كلمة غلط لولدي ..
أصلحوا نفسكم أنتم يااولياء الأمور و شوفوا دفاتر عيالكم و قابلوهم بلا الاستقبالات و الزوارات اللي مالها معنى ..
الحين تجينا ولية أمر و تقول ما أدري شنو صف بنتي !!!!!!!
و لا تعرف حتى درجتها بالاختبار .. أهم شي تحف حواجب بنتها و تسويلها شيرة .. و للأسف بنات بسادس و سابع حواجبهم حافينها …
وين دوركم انتوا يالامهات ؟؟؟؟؟ مو معقولة بتقولها الأبلة لا تروحين الصالون و أمها تجرجرها غصب له ..
اتقوا الله في المعلمين و المعلمات !!!!!

الله يهداج
يعني المعلم مايسوي ولايتعب
وكل اللي يسويه غلط بغلط
والله الأساس البيت إذا الأساس غلط بالله شبنعدل فيه
والأهل ياحليلهم مايرضون على عيالهم
إذا أنا أعطيهم واجب ويجيني أمه كاتبته له
او أمه مغيره بالواجب
شلون بنأثر فيهم
والأهل مضيعين شخصية المعلم
ومربين عيالهم على عدم احترام المعلم
وموصينهم إذا الابله قالت لك شي
تعال بلغنا
وعلى طول تجي شكايه

والله يا خواتي المعلمات حطيتو العيب كله في اولياء الامور
واذا على انج تهدين بيتج هذا تخصصج وانتي تحملينه
وكل مجهودج بثمنه وادري بتقولون مو منج ادري مو مني لكن كل شي بتعبه
ولما تكلمون عن الام انا ماتكلم عن الاب لانهم مو كلهم مهتمين بمستوى عيالهم لكن مافكرت ان الام هذي تتعب وتحرق دمها على الشرح لاودروس ماتعرفها جديده عليها انا ماتكلم عن الام الاميه هذي حاله الله يعينها لكن الام الي عندها دوام وبيت وجهال ولله الحمد عندها مثلا في اولى ورابع وسادس والله يعينهم الي في مراحل اكبر من جذي فتشرحين للجاهل من اول وجديد فالحه المدرسه خلي امج تجيب وتجيب كلش علبالها بيتها بالمكتبه وانه ماعندها مسؤولية والله لو تدرون شلون يرتفع ضغطي المفروض الزياده الي طالبون فيها لولية الامر علشان حق المدرسين الخصوصي مثل الانجليزي والحساب والعربي عند طالبه ماتعرف الاحرف قبل نحفظ الاحرف الهجائيه ونغنيها بعدحتى الاغاني بالانجليزي وبعدين على سالفة ان الامهات ماترضى ان الواحد يعلم بنتها او ولدها حتى لو بالهواش بالعكس لمصلحته مافي عداوة شخصيه لكن الطالب لم يخاف من المدرس ويعمله حساب يهتم بحصته ويحاول انه يرضيه ويكسبه وبعدين ليش تزعلون يبا كل بيت فيه كوم مدرسات انا عن نفسي خواتي من ابوي خمسه كلهم مدرسات لا فيهم مدرسه اولى وجيرانه ووووووو فكلام مو جايبته من عقلي تصدقون عاد يقولون ان الام العوبه الي دايما تسال عن بنتها يقولون نجحيها وفكينا من شر امها لاتنبش اموريعني المستوى تدريسي بعدين خواتي شحقا حمقانين يبا حنا نتناقش والانسان الي عنده ثقه في مبدأه ياجبل مايهزك ريح وبعدين شنو اتقو الله يا اولياء امور شبينهم وبينكم والله يا مدرسات السمعه الي معروفه عنكم تحاتون الريوق والحلى والقهوه ومن عليه اليوم علبالهم مسيرات على بعض وهذا كلاممو من عندي انتي الصبح الله لايهينج الساعه تسع ولا ثمان تقريبا شوفوا طاولة الحارس وطلبيات وادري بتستلجون وبتقولون ماناكل يا قردنا لا اكلي بس مثل ماتاكلين وتحضرين بليل شنهو الي تشيحطين فيه من بدلات حضري موضوع طيب لطلبه والله ياخواتي انا اتكلم من باب المصلحه مابيني وبينكم شي ولكن شي زاد عن حده ولي تقول خذت الطالب وامه هاوشتها خربتي عليه الفرصه ياختي بالحصه ركزي عليه وانتبهي لطلبه الي مستواهم ضعيف حطيهم قدام بحصتج وخليه يشارك يحس انه مصحصح مو بس تنبهين لشطار وبالاخر هدو وحنا انتناقش نشوف العيب وين ونحاول نصلح الخطا
وشكرا ولية امر

انا اقول انتي مو معلمه صح؟

وحبيتي ومن قالك اني مو حاطته قدام ؟وبعدين حبيبتي ليش انتي شايفتني بالحصه اركز على الشطار بس الحمدلله !! اقولك كثير الغياب وما يحل شسوي فيه والا شرايك اترك حصتي واقعد احل معاه الدروس الي طافت !!

وتقولين هدوا تقولين ماهمكم الا القهوه والحلو وتبينا نهدي يعلم الله شكثر نتعب مع طلبتنا بالتدريس وبالتالي تجينا وحده تقول انتو ما تركزون الا على الشطار
الشي الثاني انتي بس شفتي خواتك ما شفتي مدرسات ثانيات يمكن خواتك هم الي معطينك صوره سيئه عن المعلمات , اما عن الطلبات والله ما احط الطلبات ابجيبي ترى يحاسبونا ليش ماعنده دفتر ليش مو جايب الوان والا تبينا نصرف عليهم بعد!!

وبالاخير انا اشرح وفوقي الله هو الي راح يحاسبني مو خايفه من وليه امر انجحها علشان امها عوبه

لا حول و لا قوة إلا بالله العلي العظيم !!!!
اشدعوة عاااااد بين كل جملة و الثانية تدخلون طاري معاشنا ….
الله يالمعاش اللي مسكت عاد !!!! عشر سنين أدرس وما وصلت الألف ….
و الحمد لله احنا ما نشتغل عشان فلوس .. واكبر دليل هدايانا لطالباتنا و وسائلنا و دفاترنا التحضير ..
وبعدين يارحيل الشمس كل موظفة ( والظاهر انج مو موظفة ) لازم تتريق بالدوام سواء مدرسة و لا غيرها ..
و بالنسبة للبس يكون بعلمج أكثرنا الحين عبي سودا .. لأن ما عندنا وقت حق الكشخة أصلا .. و حتى لو لبسنا و كشخنا موعيب ( الله جميل يحب الجمال ) و كل أنثى في هذا الوجود تحب تتزين في بيتها عند أهلها في دوامها ..
اسمحيلي رحيل الشمس ما ظنتي تتكلمين لمصلحتنا !!!!
أنا ولية أمر بعد .. أرجع من دوامي وأدرس وأشوف دفاتر بناتي وألبي كل طلباتهم ..و ما أنام إلا وأنا مشيكة على كل شغل بيتي ..
و على كل شغل مدرستي و تحضيري .. أما انتي وغيرج بصراحة فاضيييييين للدرجة اللي تخليكم تعتبون علينا ..
أختي اتقي الله .. اتقي الله .. اتقي الله .. لأنه وحده العالم بمدى عطائنا ..

أتفــق معـــاج .. 100%
أولياء ما يعرفون حتى صفوف بناتهـم ..
ولما تسويـن لهم استدعاء عشان مستوى عيالهم ما يدرون عنج ..
بس خلي ولدهم تعصب عليه الابله من باجر تشوفينها الساعه 7 عند باب المدرسـه ..

يعني ماشاء الله توج مسجله وهذي المواضيع اللي تطرحينها
الله يهداج حبيبتي
الظاهر وايد مآخذه صوره سلبيه عن المدرسات من خواتج
إذا أهما ما يشتغلون ولا يراعون الله في عملهم
لا تعممين علي الكل رجاااااء
عيل لو تدرين أني مدرسة روضه شبتقولين بس
مثل ما قالت أختي ** توفا ** أتقي الله في كلامج علي فئة المدرسات والله ينور بصيرتج