اطفالنا بين مطرقة المستوصفات وسندان العيادات الخاصة

السلام عليكم ورحمه الله وبركاته …

حبيباتي انا وحده قاعدة اعاني من بنتي بالأول كانت تطيح بشكل اسبوعي يعين اسبوعيا لازم تأخذ مضادات سواء من المستوصف او الخاص ..اخر شي الله هداني ورحت لعبد الله عالى قال لوزها متضخم لازم تنشال ((سنتين ومحد قالي من اطباء المستوصفات انها متضخمة )..وسويت العملية وارتاحت شوي ..احسن من قبل ..

والحين مع تغير الجو تجيها نشلة اوديها المستوصف يقول ما فيها شئ ويعطيني دوا نشلة من باجر الحرارة اربعين ..اروح للخاص تقولي هذا اصلا معاها احتقان ولو صابرة عليها جان نزل الإلتهاب بالصدر وتعطيني مضاد وتطيب..

اللى بقولة شنو الحل ..ان رحنا المستوصفات ماكو فحص عدل وبالتالى ما كو تشخيص سنع …وتزيد الحالة سوء
وان راحنا للخاص الحل الوحيد عندهم المضادات …

شنسوي بالله ..

والله ساعات اقول ليتني دارسة طب ومفتكة اعالج بنتي بروحي ..

بإنتظاركم ..

الله يكون بعونج احتمال من كثر مااستخدمتي مضادات صار الجاهل ماعنده مناعه
شوفي الطب البديل
انا استخدم المر اذا عندج فكره عنه سواء مراضي من غير شر او مافيهم شي يعني معودتهم اهي الصخونه لابد منها بس اذا تطور الامر اكثر من 3 مرات بالسنه ومضادات فهذا وضع غير طبيعي وهم عندج الحلبه ممتازه لو تحطينها بالحليب عشان يضيع طعمها وهم عسل العويد ممتاز والمرميه ممتازه وحاولي ماتستعجلين عليهم اذا ماعليهم حراره وتودينهم الطبيب واذا مافي حل الا الطبيب والمضادات حاولي تستمرين في العلاج لمده خمس ايام وخاصه المضاد ومايشوفون شر عيالج ان شاء الله

ياحياتي ياديحانية فعلا ذكرتيني على اشياء كنت غافلة عنها ..

فعلا بنتي عندها تضخم باللوز وشلتهم هذا سبب طيحاتها المتكررة ..

ومناعتها ضعيفة والدليل هم كثرت مرضها من باجر ان شاء بشتري عسل العويد ..

وبالنسبة للمرة سمعت انها موزينه مع المضادات بس شلون اعطيها مرة انقعها واعطيها بالقفشة يعني ؟؟؟ماراح تحب الطعم ….
الحلبة احطها مطحونة والا حب ؟؟

ومشكلتي لو تجيها كحة وخليتها تقاومها من نفسها نزل الإلتهاب بالصدر وتعالى عاد عالجي الصدر …

الله يكون بالعون …

مشكووووووورة حبيبتي جزاك الله خير

الله يكون في عونج شوفي اهي المره صح ماتصلح مع المضاد بس انا قصدت انه تستخدمينها دايما يعني تعودينهم شوفي للمره طريقتين انا اشربهم قبل لايروحون المدرسه شي بسيط واذا سبحتهم مسحت علي خشومهم وشربتهم وحطيت شويه باذونهم يعني بطرف طبعي الصغير والحلبه مودايما من فتره لفتره لا مومطحونه افوح ماي واحط عليها واخلطها مع الحليب خاصه بالشتاء
وبعد ذكرت بس لمن كانو صغار خدامه امي كانت تدهنهم بزيت زيتون ومسمار مطحون ممتاز للبلغم واي سؤال حاظرين للطيبين

انا بنتي نفس بنتك لما كانت صغيرة كل اسبوع بالمستوصف و لما جاني عبود جرب معه طريقه عرفت مشكلتي مع بنتي.

انا مع بنتي كنت كل لما احس ان فيها شيء طيران للمستوصف …. لقافة … و هذا يعني من الجيد عندي ….
الزين اروح للمستوصف ابي اشيك على بنتي .. ارجع من المستوصف إلا بنتى انعدت من فيروسات المنتشرة بالمستوصف و طيران على الخاص اللي ما يعالج إلا بالمضادات القوية لو انها صغيرة و هذا احس انه ضعف مناعتها ضد الامراض.

بالنسبة لولدي فقللت نسبة الروحه للمستوصف و اذا حسيت انه مستبرد اعطيه حليبه شوي حار و ابعده عن التكييف و الحمد لله احس انه مريحني اكثر من بنتي..

هلا والله ديحانية ..صح انا سمعت ان الزيت والمسمار يطرد البرد ..والله يجزاك خير على الرد ويبعد عنكم الآمراض

هلاوالله بنت الذيابة و الاسوداي والله انتي نفسي بالضبط ولدي اصغر من بنتي الحمدلله اقل طيحات من بنتي ..ما اردي يمكن البجر اهتمينا فيه اكثر وكنا نخاف يمرض واجد فعشان جذي قابلنا الطبيب؟؟..
ومشكووووووووووورة حبيبتي

بالضبط من زود الإهتمام مرضنا عيالنا…

شوفي حبيبتي انا كل ما طاحو عيال ما اوديهم الا عند الدكتوره اسيل الخطيب, صج دكتوره شاطره وممتازه خصوصا لليهال . ودوا عيالكم اعندها احسن لكم وما تودونهم للمستوصفات ولا المستشفيات الخاصه لان هناك كله يعطونكم دوا غالي وما يسوي نتيجه , لا وبعد ساعات يعطونكم دوا اثره السلبيه مو زينه للياهل.