استفسار بخصوص التطعيم ؟ ولدي ما يمشي!!

السلام عليكم بنات شلونكم شخباركم

بنات ابي مساعدتكم و خبرتكم …
السالفه و ما فيها ، ان امس الأثنين طعمت ولدي اللي عمره 4 سنوات و قالت لي السستر ان هذا آخر تطعيم عندنا بالمستوصف و الولد راح يصخن شوي ..
المهم رجعنا البيت و كل شي طبيعي بس من صار العصر والولد مو قادر يمشي كله منسدح على الغنفه و احط له كمادات ماي حار .. حتى تكرمون الحمام آنا أشيله و اوديه و اللي مخوفني
ان الوضع مستمر لي اليوم الثلاثاء الولد ما يمشي و اذا شلته ولا حركته قام يبجي يقول يما ريولي تعورني !!

بس حبيت اعرف هل هذا الوضع طبيعي ولا لأ ؟؟

و شاكره لكم خواتي

حبيبتى لا تحاتين من اسبوع انا بعد طعمت ولدى كمل اربع سنوات وابرتين بالفخذ وصارله 3 ايام بس بجى ولا يقدر حتى يوقف وبس يشكى من ريوله وبعد ال3 ايام الحمدلله ما فيه الا العافيه لا تحاتييين عادى بس ها اليومين وبعدين ما فيه الا العافيه …..

ما يشوف شر

ونسيت اى صح اخر تطعيم … بس لا تنسين الادول عطيه حتى لو ما عليه حراره ……

اي اختي لا تحاتين هذا التطيعم يسوي جذي بالعيال ولدي بعد 3 أيام لين قدر يمشي الله يخليهم لنا

same same
حتى انا ولدي سوه جذي حسبته يدلع

اختي من فتره رحت لدكتوره سعاد البصيري وسألتها عن التطعيم وشسوي عشان ماتركب ولدي حرارة فعطتني خطوات اسويها قبل كل تطعيم :
1 قبل التطعيم بساعه ادول شراب
2 بعد التطعيم اول مايرد البيت كمادات بارده عشان ما يتجمع الدوا تحت الجلد تقول لأنه حار
3 بعد التطعيم بساعه ادول
4 كل اربع ساعات ادول
وانا على هالخطوات ولله الحمد

الحمدلله ان حالة ولدي طبيعيه
و مشكورين بنات على نصايحكم الله لا يخلينا منكم
و يخلي لكم عيالكم آمين

مع خالص التحية