|
|
السلام عليكم خواتي شلونكم ان شاء الله تكونون بخير
ام زوجي الله يهداها لي الحين ما تخلص من مشاكلها اللي تسببها لي وانا صابره وساكته واقول ما عليه مره عوده لكن الصبر له حد وكل انسان وله طاقه انا بدخل بالموضوع على طول
من فترة اسبوعين صارت سالفة قيل وقال كالعاده ام زوجي طلعت لها سالفة هالمره تطاولو على ابوي المسكين اللي ما يعرف الا درب المسجد والبيت وبس المهم دق عمي اللي اهو ابو زوجي بعيد الاضحى اللي طاف وطبعا مو داق علشان يسلم على ابوي لا كان داق ونيته بشي ثاني تقول امي لانها كانت يم ابوي لما كان يكلم عمي تقول ابوي انصدم اول ما رد عليه يقولها كان ينزر بالحجي وقال حق ابوي ترا انا معطي ولدي قلوس حط بالك ابوي انصدم قاله انزين عليه ولدك بالعافيه بس انا شكو تقول لي جان يقوله عمي اقولك عطيته فلوس انا انا معطيه ويصرخ ابوي قاله انزين انت وولدك اموركم بينكم انا شكو تقول لي ابوي حس ان الموضوع بيطول وان عمي جنه يبي الهواش جان يخصم الموضوع ابوي وسلم عليه وانتهت المكالمه وعلى فكره امي وابوي ما قالولي ان عمي دق بالمره لانهم ما يبون تصير مشاكل بيني وبين زوجي لانهم يدرون ان عمي مو معطي ولده شي ابدا فنسو الموضوع وسكرو عليه بعد جم يوم دقت ام زوجي على زوجي وقالت له ترا ابوك دق على ام زوجتك اللي هي انا وانا ما ادري ان ابوه دق سالت امي عادي جان تقول منو قالج احنا ما بغينا نقولج علشان ما تصير مشاكل بينج وبين زوجج وقالت حق زوجي ان ابوك قال انه معطيك فلوس والله يهنيك فيهم جان زوجي يقول ماعطاني ولاشي ودق على امه وقال لها وانتهى بعد شهر ونص من السالفه ام زوجي دقت على زوجي وقالت له ان ابوك يقول ما قال حق عمك اللي هو ابوي انه معطيك فلوس ولا شي وابوك توه دق عليه وعمك اعترف انه غلطان وان ابوك ما قال له هالحجي روح شوف عمك شنو قايل بس ابوك ترا ما قال شي وزوجي قال لي هالحجي وانا عصبت ليش بكذبون على ابوي وطلعوه جذام وابوي مسكين ماله شغل بشي اهم اللي تبلو عليه وصلت لغاية ابوي ؟ ياما جذبو علي وطلعو علي كلام واقول ميخالف مهما كان اهل زوجي وكله يقولون له طلقها واشتبي فيها واسكت لكن توصل لغاية ابوي ؟ ما اقدر انا الحين طافت على السالفه من اخر مكالمه تقريبا 20 يوم وانا لازم ابين الحق باجر بيجذبون علي كذبه اكبر من جذي وتخرب بيتي والساكت عن الحق شيطان اخرس بس كلما فتحت الموضوع حق زوجي اني بتفاهم مع امه على سالفة ابوي يقول لي انا مابي مشاكل وانتي ادورين المشاكل ومره انفجر وقام يصرخ بهستيريا انتي اشتبين باهلي انتي تبين المشاكل والحين خايفه اكلم امه من وراه وامه تسويها كبيره وتدق على زوجي وتقوله اني دقيت عليها ويتهاوش معاي تكفون عطوني حل انا ابوي مو هاين علي يطلعونه بهالصوره وابوي المسكين يوقف بمواجيبهم او يت علي انا عادي بس ابوي لا والله لا ما اقدر تكفون قولولي شسوي
وان هالكلام من عمج ابو زوجج
اذا كان مصدق طوفي خلاص وسكتي
اهم يدورون المشاكل عليكم
الله يكون بعونج
والله صج مشكلتكم كلها
اختصرتيها بنفسج
قيل وقال
الله يهديكم كلكم
كبروا عقولكم
في ناس وايد السكوت عنهم وايد اخير من الاخذ والعطا معاهم
طنشيهم ولا تعطينهم وجه … المهم تكسبين ريلج ويكون فاهم كل شي
والله يوفقج
وبعدين يجوز ريلج عارف بسوالف اهله ومايبي يواجهم معاج عشان لا يصغرهم بعينج مهما كان الريال مايحب تطلع عيوب اهله جدام مرته لان هالشي يجرحه فتجاوزي عن هالشي عشان خاطر ريلج واهله فووقهم رب بيحاسبهم على اللى يسونه
طوالى بالج يالغاليه والهون ابرك مايكوون
الله يكون في عونج حبيبتي
شوفي حبيبتي هالأشكال ما يمشي معاها إلا التطنيش
ودام السالفه فيها تكذيب و تصديق لازم تعرفين شغله وحده
انتي ما ترضين على اهلج و اهو ما يرضى على اهله و هذا شيء طبيعي و ردة الفعل طبيعية إذا ماكان مصدق الطرفين …
اهو يعرف انهم لما طلعوا عليج حجي انهم كذابين ولا لألأ؟؟
لازم تعرفين هالشغله و منها لازم تقولين لزوجج إذا اهو انسان طيب و عصبي بنفس الوقت
و ضحيله انه اهو صار كل حياتج ولازم انكم تفضفضون لبعض و صعبه جدا ما ألاقي الزوج اللي صار كل حياتي سند لي و يسمعني مو شرط يصدقني بس اللهم يسمعني و يحس فيني
انا ما طلعت من بيت اهلي إلا معززه و مكرمه ما طلعت علشان انذل و تحكرني بزاويه اتهامك .. << عايشه الدور
و الله صج
انا مره صار معاي هالشيء …
ان خالتي قطت كلمه وانا تضايقت منها
و يتني فتره كله متضايقه اول ايام زواجي
حتى قعد يقولي ليش انتي كله متضايقه و معبسه ترى جذي الواحد يحس بالنكد …
و انا ما ارضى تقولين جذي عن امي ….
هذي امي و ما ارضى عليها << معاه حق بس مو بكل شيء 
قلت له شوف
انا مشاكل البيت ما اقوولها لاحد لا امي ولا أبوي
ابيهم يحسون اني سعيده رغم اللي اشوفه ..
قلت له انا كان عندي امي
كنت افضفض لها كل اللي بقلبي وما اخلي اي شيء في نفسي
بعدين لما تزوجت قفلت على بيتي بمفتاح
بس هالمفتاح بيني و بينك
إذا ما سمعتني ولا سمعتك ما نكون حققنا مع الزواج بالكامل
ووضحت له الزواج مو بس تفريغ عواطف ولا بس تكشخ و قعده الزواج سكن وراحه واستقرار
لازم تسمعني و أسمعك … ولا بعدين مراح احتاجك ولا تحتاجني … راح نصير مثل اللعبه اللي تدور … نوم أكل شرب سفر وضحك بس …..
ولازم يعرف ان الزواج بدن البهارات زواج جامد وماله حيويه
و قلت كلام وايد بهالخصوص وانتي واسلووبج تقدرين تقنعينه
و الله يهديكم ويصلح بالكم …