|
|
السلام عليكم ورحمة الله وبركاته
حبيت اعطي باختصار شديد بعض الاداب للمناقشه اثناء المحاضرات بالجامعه, لاني انصدمت ان في بنات ما عندهم علم بطريقة المناقشه الصحيحه ويقلبون المحاضره سوق يمعه, من وجهة نظري.. هذه بعض اداب المناقشه التي يجب وضعها بالحسبان قبل المشاركه في اي مناقشه:
1. قبل البدء بالمشاركه بالنقاش لازم ترفعين ايدج اول والدكتور لما يقولج تفضلي تتفضلين : في ناس عبالهم اهم كل اطراف المناقشه وما شا الله مايسكتون, والمشكله يريت لو كلامهم مفيد, عندنا وايد مخوخ مقفله, فيريت لو انج تستاذنين قبل لا تبدين مو تبدين وبس ولا تقاطعين اللي كانت تتكلم ولا الدكتور, هذي ابسط اداب الحديث…
2. رفع الصوت مو يعني انج صح: يعني انج يا ماتسمعين عدل او ام لسان, فبليز راعو هالشغله, احنا شذنبنا راسنا يصكنا بسبت صوتج؟ والله مو يعني ان كلامج صحيح اذا رفعتي صوتج, احنا بجامعه مو بغابه او شي ان اللي صوته اقوى ولا اعلى اهو اللي كلامه يمشي…
3. المناشقه مهما بلغت من حده هي تفضل فقط مناقشه وليست خناق وذبح!!: في ناس يقلبون الشي شخصي, وبالنهايه محد يستفيد من المناقشه وتلقينهم صج بعدين يكرهون بعض, كرهو بعض كيفكم بس لا تستغلون وقت المحاضره ووقت المناقشه اللي خذيتوه من غيركم عشان هوشه يهال
4. لا تغيرين رايج ستين الف مليون مره بموضوع واحد: يعني في بنات غصب يبون يثبتون انهم مثقفين وان رايهم كله صح, فتلاقينهم بس الدكتور يقول شي تقول ايييييه هذا اللي كنت اقوله! والاخت تلقينها كانت اتكلم عن شي ثاني, فثبتو على رايكم واذا المناقشه غيرت رايكم ماكو مشكله بس قولو "ايه صح كلامكم عيل جني انا غلط" او مادري يعني اي شي, بس مو تصيرون جذابين وكل دقيقه كلام وبالنهايه تقولون ايه انا كنت اقول جذي..
5. لا تطولين زياده عن اللزوم لان في غيرج ناس وايد يبون يشاركون: في واااااااايد بنات عبالهم المحاضره حقهم بس اهم! والله الحمدلله والشكر لسانها مايطيح 24 اتكلم وتلاقين في بنات وايد يبون يبدون رايهم واهي ليلحين, بتقولون بس الدكتور اهو اللي يقول منو يتكلم منو لا؟ بقولكم لااا حبايبي في بنات ياكلون الدكاتره بقشورهم! والله مادري من وين يطلعلهم هاللسان..هذا واهم توهم بالجامعه..الله يعين اللي وياهم عليهم, ففكرو بغيركم, مو كل شي حقكم, ولا كل الوقت وقتكم…
بالنهايه هذا كله من وجهة نظري, وهالاشياء كلها انا شايفتها بعيني البنات يسوونها وفي اكثر بعد, فمو قاعده اطلع من عندي امثله ولا شي… واللي ماشاف جذي معناته يا حظه حلو يا ماعرف بنات الجامعه عدل
ملاحظه: تجربتي هذي من جامعه الكويت كليه الاداب والتربية (يعني كيفان) فمادري عن باجي الكليات, بس قلت الكل ان شا الله يستفيد دام المناقشه كل مكان.