|
|
[B]السلام عليكم جميعا…
بنات… 
الله يرحم والديكم ابي مساعدتكم… والله مالي غيركم… افكر بالانتحار …. مو لاقيه حل
خسرت نفسي … بيتي … ريلي … صحتي …مادري شسوي …
قصتي بدت قبل بال 99 كنت اكلم واحد قبل زواجي ب 3 سنوات
وهالواحد كان يقولي انه يحبني بس كان يجذب علي… لانه تزوج بعد سنه من علاقتنا…
وانا تميت معاه بعد زعل ما طول.. وفي سنة ال 2024 ياني ريلي وكان اول بيت يدشه…
وما طلع منه… صارت مشاكل بين امي وامه عن امور تافهه بالعرس … وكنسلوا كل شي .. بس اهوه قال حق امه انا مو مقتنع بالاسباب اللي قلتوها ( امي قالت انه البنت تبي تكمل دراستها ) طبعا اهو كان صاحب راي وما اقتنع لانه قال حق امه انا دشيت البيت وارتحت منه ومن البنت وابيها … وراح اعطيهم اسبوع اذا ما صار شي وانتهت سخافات الحريم راح اتصرف… وفعلا الكل كان يقول مابي اتنازل.. بس اهوه الله يحفظه راح حق اخوي العود .. ودوره من مكان ليه مكان لما لقاه لانه كان ما يعرف الا اسمه ودوامه… وبعدين طلع رقمه .. ودق عليه وواعده .. وقاله انا ابي اختك على سنة الله ورسوله… وانا دشيت من الباب ما نطيت من الدريشه… وكنا متفقين على كل شي.. شاللي صار.. ليش الحين البنت تبي تكمل دراستها.. ومنو اللي قال انا معترض على دراستها.. خل تدرس.. المهم اخوي انصدم لانه امي كانت قايلتله انه اهمه اللي مايبون وكنسلوا… اخوي كان هم ريال وقاله انته تبيها. قاله ايه .. قال والله اذا اهيه تبيك .. وموافقه عليك .. ملجتك في بيتي الاسبوع الياي.. وانا اكسب ريال حق اختي .. بس الملاج عليك
المهم كنت عايشه بسعاده لانه ريلي صاحب شخصيه قويه بالحق… مع انه طيب وايد وايد وايد…. وعندي اخو مو محترم
وايد شايف نفسه على الناس.. وكان كله ما يحترم ريلي لانه اصغر منه بالعمر واهو كبير.. وريلي يقولي انا ترا سكوتي عشانج وعشان الموجودين من اهلكم.. مابي انزل نفسي لهالمستوى.. وكان كله يسكت…واخوي حاط دوبه من دوب ريلي..
وللاسف انا كنت اوقف مع اخوي ضد ريلي…واقوله هذا اخوي ما اقدر اوقف ضده.. واهو كان يقولي الله يخليكم حق بعض ولا يقطع صلة الرحم اللي بينكم… بس انا حقي رب العالمين ياخذه..
بعد الزواج وبشهر العسل… ريلي كان يستعمل كمبيوتري ولقى رساله انا كنت دازتها حق اللي ما يتسمى اللي كنت اكلمه قبل زواجي… اقوله كلام كبير.. يعني كلام اتطلق عليه اكيد…بس تهقون ريلي شنو سوا… يابني وكان ضايق خلقه حيل..
وقالي صلي عالنبي وقومي خل نصلي ركعتين.. بعد الصلاة.. قالي هذا القران ابيج تحلفين الحين انج تقولين الصج.. وما تجذبين.. حلفت .. وسالني شنو هالرسااله… جذبت عليه وقلتله انا كنت اجذب على البنات بالثانويه.. واقولهم اني اكلم عشان لا يقولون انا معقده.. بس انا عمري ما كلمت وهذا كلام فاضي انا بس جذيه كاتبته… قالي كلامج مو مقنع لكن انا احترم حلفج عالقران.. وراح اصدقج.. وطوف السالفه لانه يبي يستر علي…
وبعدها خلاني يا دهينه لا تنكتين.. وانا كنت وايد مقصره بحقه.. يعني يكلمني عن ملابسه.. نومه.. حقه.. اهتمامي فيه بشكل عام.. وانا مطنشه.. حتى علاقتي مع اهله كنت اطفشهم لما اييون.. وكان يقولي امي واهلي ما قاموا اييون بيتي والسبه انتي..كل ما اييون انتي تكشرين والا تدشين تقعدين داخل.. شمسوينلج؟؟؟
كنت اتحجج باي شي.. بس للامانه انا ما كنت ابي اصير وايد مع اهله.. كنت خايفه وبس…
وقدرت اقطع ريلهم… وما قاموا اييون.. واهو كان بحكم دوامه ما يروح الا يوم بالاسبوع وانا ساعات اتعيير عشان ما اروح معاه… وكان يقولي عشان العيال مو عشانج ولا عشاني وانا كنت عمك اصمخ..
حتى باليهال انا خلال 6 سنين يبتله ولدين بس… واهو يبي اكثر.. وانا افكر بجسمي لا يخترب.. وكان يقولي حتى الذريه تتمننين علي فيها… وكنت اطنش واتعذر بالتربيه….
والله انه ما خلا علي قاصر.. ولادتي ومراجعاتي بمستشفيات خاصه و فلوس… سفرات… هدايا… شاليهات.. مخيمات.. طلعات .. تمشي…كل اللي ابيه يوصلني ليه عندي.. والله انه صارلي جم سنه انا موظفه.. عمره ماخذا مني دينار.. ولافلس.. ما يرضى .. يقول هذي فلوسج.. وانا بس قاعده اشتغل واقصر في بيتي واجمع بهالفلوس… ولا يرضى اخذ فيزا او قرض من البنك يقوللي اي شي تبينه انا اوفرلج اياه بس لا تسوين بنفسج جذيه… حتى مؤخري عطاني اياه…كل شي يشتريلي اياه كاش..
جنه يا ناس جنه..
اكملكم مواصفات ريلي عشان بعدين تحقدون علي زياده لاني استاهل…
ريلي جميل وايد وايد وايد
طيب خلوق متواضع خدوم عطوف كريييييييييييييييييييييييييييييييييم بكل معنى الكلمه
اكثر انسان عصامي عرفته بحياتي يحب الخير لكل الناس … دوم يسوي اعمال خير بدون لا يتكلم .. بس انا اكتشف بالصدفه
يعني تبرعات.. كفالة ايتام.. يعني انسان عايش حق الغير.. والله انه ماكو واحد بالعايله الا سوه معاه موقف ما ينساه
يعني كل اخوانه وخواته وامه وخواله وعمامه وحتى اهلي امي وخواتي… يعني القريب والبعيد؟؟؟ كنت اقوله ليش تسوي جذيه ؟؟ يقولي الاقربون اولى بالمعروف..
وفي بداية علاقتنا كان معاشه قليل وانا كنت ادرس
قالي عطيني فرصه وراح اعيشج ملكه … ابي 5 سنوات بس.. بس خليني اكون نفسي عشان نرتاح طول العمر..
راح واشتغل دوام ثاني عشان لا احس بنقص بس.. يعني كان يكرف نفسه… عشان لا يقصر على بيته..
للعلم بيتي احسن بيت بالعايله.. من كل النواحي وانا الصغيره بالعايله … اخر العنقود… سيارتي احسن سياره بالعايله… وهذي بروحها سالفتها سالفه … يابها لي مفاجاه تعب عليها شهرين ويابها من بره الكويت كاش.. وحجز شاليهات بجزيرة فيلجا … وعزم العايله حق عيد زواجنا.. وشحن السياره وخشها في بيت مهجور… وبعدين حجز المطعم كله حقنا… وعطاني البوكس وفتحته ولقيت مفتاح السياره اللي بخاطري من زمان…. وكانت احلى هديه بحياتي.. حتى كل الموجودين عيونهم طلعت… وريلي بنفس الليله طاح ولفت ريله.. شبه كسر… وسيارته بالمصافط بالديره عند الواجهه مالت العبارات انعدمت من الصوبين واهي صافطه وصارت سكراب…
ودراية ولدي اللي ريلي يايبها وشاريها بالمبلغ الفلاني … انباقت وولدي ما قعد فيها.. ( عين ما صلت على النبي )
يعني هالانسان في كل مجال متميز.. والكل يحبه ويقدره .. حتى دوامه بالوزاره طلع منه واشتغل في شركه..
لانه طموح.. وفعلا خلال مده قصيره.. وصل مواصيل محد وصلها بالشركه.. وكتب شكر ومكافئات..و و و ؟؟
والحين بعد الخمس سنوات اللي وعدني فيها الحمد لله ماعندنا اقساط كل شي كاش… وعنده اسهم بالبورصه موزعه على جم
شركه قيمتها بالسوق… مبلغ كبير.. لانه ذكي وايد… وعرف شلون يسوي من ولا شي .. شي؟؟
وعيالي الحين يدرسون بمدرسه خاصه .. تعتبر الثانيه على مستوى الكويت..
ووالله… والله… انه كل هذا منه مو من اي احد … محد ساعده بدينار…. ولا حتى مني… يعني حتى العلاج بالعيادات والمستشفيات الخاصه..
كل هذا وترا مقصر على نفسه وايد وايد.. مو مثل شباب هالايام.. سياره وفخفخه.. ريلي ملاك…
بعد كل هاللي قلته… الحين اقولكم شنو انا سويت فيه…
عمي اللي اهوه ابوه.. ياله المرض الشين ( سرطان ) .. كل عياله شالوا ايدهم.. الا اهوه سنين واهوه ينوقل فيه من مستشفى ليه مستشفى… لغاية ما عطوه علاج بالخارج… وراح معاه ..6 اشهر بره الكويت..
وخلال هالمده يابني عنده مرتين…. اول مره يابني شهر ونص.. والثانيه.. بعدها باسبوعين.. يابني هم اسبوعين.. يقولي انا الحين ضعيف وحالتي تعبانه وما ابي اسوي الحرام.. الشيطان قوي والديره اللي انا فيها ما يعرفون حلال وحرام…
لو ادفع كل اللي عندي بس اشوفج بالشهر تقعدين عندي اسبوعين اهني.. واسبوعين اهناك…
ولما رديت الكويت ثاني مره… صارت مصيبتي في شهر رمضان…
( الله يخليكم اقروا قصتي ليه النهايه.. الحين يمكن تشمئزون مني وتصك فيكم الدنيا من اللي بقوله )
اهوه راح العلاج شهر 4
وانا من شهر 5 رديت حق اللي كنت اكلمه قبل الزواج…
اول شي بديت معاه نت….. وبعدين تلفون.. وبعدين قمت ادش مواقع واضيف شباب وايد…
وقمت اكلم واحد ثاني..بس نت… قلتله كل شي عني… كل شي بمعنى الكلمه… بس باقي رقمي … حتى اني واعدته بمكان بس كان عن طريق النت…ويقول انه شافني من بعيد… لاني وصفتله ملابسي…
المهم المصيبه العظمى اللي راح تنصدمون منها والله…
انه مرت اللي انا اكلمه دشت علي نت.. وقامت تهددني بانها راح تقول حق ريلي كل شي.. وانه انا خربت بيتها..
وقمت اترجاها… وقالت لازم.. وعلى مدى شهر رمضان كله وانا احاول اقنعها ماكو فايده…
قلت انا لازم اعترف حق ريلي قبل لا اهي تقوله عشان عالاقل اطلع بصوره شوي زينه لاني اعترفت…
وكلمت ريلي بالنت وقلتله كل شي
…تدرون المصيبه الاعظم شنو…
المصيبه انه ريلي كان يعرف من زمان.. وساكت…
ريلي كان مسوي هاكينج حق ايميلي يعني داش عليه وعرف الرقم السري.. وكلم كل اللي عندي بالمسنجر كانه انا.. وعرف كل شي منهم حتى صورهم خذاها..
وعرف منهم انا شنو قايلتلهم… وسكت… وحط كل هذا بقلبه…
وبعدين مسح كل الشباب اللي بايميلي.. وسوه ايميلات نفس ايميلاتهم… وقام اهوه اللي يكلمني… باسمهم… تصدقون هالقصه..ومشى علي هالسالفه شهر… عشان يبي يعرف كل شي.. وعلى قولته ابي اعرفج من داخل انتي شنو؟؟
وابي اعرف انتي جم ويه عندج؟؟ وقاللي للاسف الحلف اللي عالقران قبل 6 سنوات طلع حرام وانتي تكلمين نفس الشخص
يعني انتي مستغفلتني 6 سنين..
انا ليه الحين مصدومه منه…
وقالي انا كنت كل اللي انتي عرفتيهم بس من شهر..
وانا مرت رفيجج..
قمت اعتذرله واتسامح منه.. واحلفه.. اني تبت.. وابي اروح الحج.. واسوي كل شي يبيه….
دوامي اطلع منه واجابل بيتي..
تلفون مابي.. لابتوب اللي شرالي ايه اهوه.. مابيه.. طلعه مابي اطلع .. احبسني.. خلني خدامه عندك..
ما راح اخلي عليك قاصر.. بييب منك عيال وايد.. بطبخلك…(الخدامه اهيه اللي تطبخ ) بسويلك ملابسك وفراشك
بخليك ما تحتاج حق شي كلش..
تدرون شقالي.. قالي انا عايش من 6 سنين وراضي بانج مقصره وساكت … تبين الحين وانتي خاينتني وتسوين واجبج ما يبتي شي يديد اردج؟؟؟ انا اصلا اكل من ايد الخدامه من زمان والفضل لج .. للاسف .. كل اللي قلتيه اشياء ماديه.. وانا اللي فقدته شي معنوي.. فقدت كرامتي .. فقدت رجولتي..
ماي ويهي جدام الناس.. نزلتي راسي بالارض.. فقدت الثقه بالناس كلها…
وهالاشياء ما تنرد لو تخدميني 100 سنه…
قلتله ميخالف والله اردلك كل اللي طاف وراح اعيشك ملك تكفه لا تطلقني عشان عيالنا… قالي حتى لو رضيت
عشان عيالنا… شلون بطل بويهج.. شلون بنام معاج وانا مرتاح وشلون اقعد الصبح واشوفج يمي… اللي سويتيه ما ينسي..
صكها ويهي..الحين يقولي انا عرفتج بالمعروف وراح اخليج بالمعروف.. انا طول عمري ريال وراح اعيش ريال..
انا ما ارضى على نفسي اخلي وحده نفسج على ذمتي.. انتي للاسف ما تشرفيني…
والله انه حتى قالي انا ما راح افضحج وراح استر عليج … وما راح اقصر معاج حتى بعد الطلاق… وخلينا نعطي الاهل عذر بانه احنا مو متفقين وتطلقنا عشان هالشي…
بس لا يعرفون اللي صاير لانه راح تنزلين راسي وتهينيني جدام ناس وايد.. شوفوا شلون يفكر؟؟؟
قمت اترجاه.. والله كل يوم .. مسجات.. ايميلات… اخلي عياله يدقون عليه..بحنن قلبه.. ماكو فايده.. يقولي لازم اطلقج..
انسيني..
الحين بعد كل هذا شوروا علي.. شسوي.. شلون ارد ريلي.. بيتي هدمته بنفسي.. ضيعت على نفسي احلى عيشه.. اغلى زواج..للاسف ما ادري ليش سويت جذيه…انا سجلت بحمله للحج هالسنه انشالله بتوب لربي..
وقلتله الله بيغفرلي انشالله وايك تسامحني.. قالي روحي انتي محلله.. انا مسامحج..انا اصلا مابي شي من الدنيا..
انا ابي الباقيات الصالحات عند رب العالمين.. بس انسي تبقين على ذمتي..لازم اطلقج .. ابي اتزوج وابني حياتي من يديد
مع وحده تعرف قدري..
قولولي شسوي.. ابي ارده.. ابي يحس فيني.. ادري ما استاهله.. بس الله يخليكم عندي يهال.. واحبه وايد.. توني احس بقدره..
ناطره ردودكم..
اختكم دموع الخطيئه…
اللهم اني قد ظلمت نفسي فاغفر لي فانه لا يغفر الذنوب الا انت.[B]
مادري شقولج
الله يسهل دروبج
تكفون لا تدعونلي بس
ابي حل حق مشكلتي
بس أبي أعلق على >>>افكر بالانتحار
حبيبتي هذا قله إيمان
وأحب أنبهج لأن أخاف ما تدرين أن اللي ينتحر يدخل النار
لومهما كانت المشاكل اللي عندج لازم ما تفكرين بالإنتحار تعوذي من بليس والله يسهل أمورج
بس ابي حلول شلون ارده شلون اقنعه اني ما راح اجذب عليه بعد هالمره..
shroooq و قلبي ابيض ودلوعة روحي مشكورين
بس تكفون ابي الحل ؟؟
caty-al
بصراحه ومن غير زعل
انتي انسانه ناكره للجميل
ودي اطب فيج
لاني اكره النوعيه الي انتي منهم
الله يحفظج مشكوره
ادري والله اني مو كفو وما فيني خير
انا اللي يبته حق نفسي
وفعلا جرحته جرح كبير
واهو سكت لانه ما يقدر يرجع الديره ويخلي ابوه هناك وصبر علي عشان يشوفني ليه وين بوصل
انا اسفه والله متحسفه وابيه… مابي يروح مني.. احبه
انا اصلا ابي احد يلومني لانه حتى ما رضى يلومني وقالي مابي اضيع وقتي معاج
الله يخليكم ابي حل
|
المشاركة الأصلية كتبت بواسطة دموع الخطيئه
 باونتي
الله يحفظج مشكوره ادري والله اني مو كفو وما فيني خير انا اللي يبته حق نفسي وفعلا جرحته جرح كبير واهو سكت لانه ما يقدر يرجع الديره ويخلي ابوه هناك وصبر علي عشان يشوفني ليه وين بوصل انا اسفه والله متحسفه وابيه… مابي يروح مني.. احبه |
الي يحب عمره ما يخون
وانتي ما حبيتي زوجج حبيتي الكماليات
وخايفه الناس تنقدج لي فقدتي هالشي
والله قاهرتني من صج