ابنتي والإمساك المزمن

عندي مشكلة مع بنتي الصغيرة صار لها فترة ….أشهر…. وانا معاناة معاها ويا الإمساك المزمن …. رحت الطبيب و عطاني شراب وقال استمري عليه 6 أشهر وكل ما خلص بطل رحت الطبيب وخذيت واحد ثاني بس ما فاد معاها يعني مو طبيعي تخرج بس لي لحين بصعوبة …… مسكينة تعور قلبي كل ما اشوفها تقعد يومين تحاول غصب ليما تخرج
فوديتها عند دكتورة عيادة خاصة وهم عطتني دوا شراب(تاخذه لمدة شهرين واراجعها عقب) وقالت لي ان في بعض الأطفال يكون عندهم خمول بالأمعاء فيصير لهم امساك وبعضهم يصير مزمن بعد … انا صار لي شهر على هالحالة وهي يالله مع الدوا ممشيه حالها … يعني لي لحين معاناة ووراي سفره بعد شهر وما ادري شسوي اخاف اتأذى معاها بالسفر ….. يا ليت عندكم حل حق بنتي .

توته جم عمر بنتج ؟؟

محد جرب الامساك المزمن كثري خلج من الادوية والله تخسبقها تصير ماتخرج تكرمين الا بادوية …
اذا كبيرة شوي عطيها خضار على طوووول صحن السلطة الزامي ترسيه خس او تبوله وحطيله ليمون وزيت زيتون وايد زين او تتبيله حلوة علشان اتحبه …
وشربيها اكبر كمية تقدر عليها من الماي على الريج عن تجربة انا قمت اشرب بالبداية 4 قلاصات ماي من الصبح اول شي بعدين شوي شوي قللتهم الحين قلاص ونص او قلاصين والحمدلله ماعندي مشاكل …
والبرتقال خليها تاكله جذي بالالياف يعني لا تعصرينه خليها تاكله افيد ..

عن تجربه
———–

اذا بنتج صغيره (يعني تشرب مميه)

نقعي لها اراصيا مع كشمش او كل واحد بروحه… وحليه بسكر نبات

وايد مفيد وزين حق البطن…… وطبعا لا تنسين عصير البرتقال او الافندي

واذا اهيا اكبر من سنه قفشه على الريج عسل

واذا كبيره… الفواكه المجففه اول باول (تين مجفف او مشمش)

والرقي روعه وتقريبا كل الفواكه ما عدا التفاح يمسك البطن

وطبعا سلطات والماي اهم شي

بنتي عمرها سنتين وبعدي ما قطعتها من المميه وكله بسبب الدوا اللي اعطيها كل يوم لأنها ما ترضى تشربه جذي بروحه فأحطه لها مع الحليب (مع العلم انها الحين تشرب حليب Kdd بالعسل والفانيليا او الحليب نص دسم )
انا جربت معاها الرقي وعصير البرتقال يوميا اعطيها بس ما تحب تشرب ماي وايد يعني الكمية مو كافيه علشان تأثر فيها وبالنسبة للسلطة حتى لو اعطيها ما تاكل وايد لأنها صغيرة ومو متعوده بس شلون طريقة استعمال الأراصيا والكشمش …؟؟

ماشالله البنات كفو ووفو

انا بنتي عمرها 7 سنوات وللحين هالمشكله بس تزيد اذا اقطعت البرتقال والخضرة

شوفي حبوبة

اذا بقت تسوي العودة

عندي لج حل وراح ترتاحين بس تحملي شوي

شوفي اذا حسيتيها بتخرج ومو قادرة حطي لها طشت نصه ماي وقعديها فيه وانتي خليج قريبه منها وصدقيني ما راح تطول 5 دقايق الا وهي مرتاحة

وخلي لها طشت خاص لها بلاستيك

بنتي لما كانت في عمر بنتج صار فيها نقس الشئ سوولها منظار للأمعاء قالو ما فيها شئ الدكتور قالي هذه شغلة وظيفية يعني اهي تشد عضلة الحوض اته بنتي ما تحب وايد الفواكهه بس الحالة هذه ردتلها قبل جم اسبوع لما تكون نفسيتها تعبانه وعلى فكرة الدكتور قالي هذا شئ وراثي بعد انه نصحني ان اعطيها زيت زستون على الريج الين المعده

انا عندي بنتي عمرها سنة و3اشهر ونفس الشي مسكينة تظل تتعصر يومين واذا تكرمون بتخرج لازم ابطل البامبرز وافتح ريولها اساعدها عشان اتطلع ومسكينة احسها تنشق ولازم كل مرة يطلع منها دم فديتها وكل ما اقول حق دكتورها يقولي حطي لها تحاميل جليسرين يساعدها ومايضر وظليت فترة احطلها صارت اوكي بس لما قطعته ردت لها نفس المشكلة ومادري شسوي وعلى فكرة حبيبتي قلبها تعبان واللي قاعد يصيرلها يعور قلبي زيادة

انا بعد وليدي جذي وياخذ دوا لاكسوماج من يوم عمره سنة تقريبا وهو حاليا سنة وثمانية شهور

قال الطبيب عنده خمول بالقولون

حاولت معاه عن طريق الاكل ولا زلت اركز على الخضروات وابعد البطاطس والموز عنه

بس ما يجيب معاه نتيجه

وبعد مع الدوا يعاني اسوي له تمارين ارفع ركبه لين بطنه والاعبه بهذي الطريقة واسوي له مساج يوميا

والله حتى ابوي بس يشوفه يعصر يقوم عنا ما يقدر يشوفه لان يعاني واااااااااايد

الله يشفي عيالنا يا رب

والله عايشه هالتجربه اللحين ان حطيت تحميله جلسرين تبجى وتركض وبطنها يعورها طلعى يا ماما عشان ترتاحين لاء مابى ماا ادرى شسوى احترت فى امرى3سنين عمرها

بنات جنها معاناتي مع بنتي باليالله تخرج واتعصر حييييل وتصير بنفسجيه انا مابيدي شي اطقها بجيه على حالتها عمرها شهرين
استعملت كل شي الينال وماي غريب واعشاب (( يانسون وكراوية وكمون )) وشاي ميلوبا والنقط ديسفلتل ماكو اي نتيجه قامت لما اتعصر احطلها قطن اذون في زيتون من تحت داير مدار المكان واتخرج شوي بس ومع التعصر بعد لو تسمعون صوتها تكسر الخاطر بس الحين خوفتوني بسالفة خمول الامعاء وشد عضلة الحوض شسوي شلوت اعرف بنتي شفيها دكتور مازن العيسى قالي هذا طبيعي مارتكزت وظايفهم لانهم توأم بنت وولد الولد زين لله الحمد لكن البنت بمشكله كبيره

حبيبتي انتي سلامت بنتج .. بس إنتي لا إتعودينها على الأدويه حاولي تعطينها مسهلات طبيعيه .. يعني خلي أكلها يعتمد على الخضار والفواكه وزيت الزيتون بالأكل والشوربات وكثريلها السوائل وخصوصا عصير البرتقال بعد ولاتنسين التمر ثم التمر ثم التمر وايد زيييييييييييييييييين وبروحه علاج طبيعي وحاولي كل يوم الصبح عالريج إتشربينها ماي فاتر لأنها ماراح تقدر عالماي الدافي والخبز حاولي تعطينها الخبر الأسمر لأنه كامل النخاله