أمينة المكتبة المدرسية والعامة تعالي شوية

السلام عليكم ورحمة الله وبركاته

إشلونكم خواتي

حبيت أحط الموضوع هذا لأحصر فيه إحتياجاتج ومتطلباتج لتطوير المهنة والعقبات الي تبين تمحينها من طريجج

1- العقبات والمشاكل في المهنة

2- ماذا تحتاجين لتطوير المهنة

أرجو الإجابة بالتفصيل والدقة لأنها تفيدنا في طرحها في إجتماع جمعية المكتبات الكويتية

وعساكم على القوة

زارا

يعطيج العافية يازارااا على هذه المبادره الحلوة

مشاكلنا كثيرة وهمومنا اكثر خصوصا مع الادارة المدرسية..وادارة المكتبات

احنا بانتظار مشاركات الخوات الحبيبات حتى نستطيع ان نواصل مسيرتنااااا..

والله المستعااان

الله يفرجها لنا

حبيباتي
امينة المكتبة اولا لازم يحدد عملها بشكل اكثر دقة تبي تقولين محدد اقولج ان الناظرات على بالهم ان الامينة ماعندها شي
بعدين هي خريجة التربية الاساسية واخذت ثلاث ارباع المقررات اللي تاخذها المرسة وعينت على الرابعة لييييييش هالفرق الشااااسع في الراتب
لازم يكون لادارة المكتبات دور في حل المشاكل اللي تواجها ويكون فية محاسبة من قبل الادارة للناظرات او الوكيلات اللي اتخذوا من بند التعاون لي ذرااااع
الموجهين لازم تكون لهم كلمه مايكونون كربون لراي الناظرة اللي يمكن تكون غلطانة
لازم يكون فيه تقدير لصاحبات الخبرة ومعاملة خاصة مو ينوقف ضدهم عند اول مشكلة
الشغل بين الامينات لازم يتقسم علشان كل امينة تاخذ حقها بشكل رسمي خاصة اذا كان في المكتبة اكثر من امينة
هذا رأيي ارجو ان يكون فيه فائدة للجميع

اول شي تغير المسمى الوظيفي من امين مكتبه الى اخصائي معلومات

لانها حالها يختلف عن حال امينة المخزن ..

من حيث الشهاده .. والدرجه

والشي الاهم ان يكون التوصيف الوظيفي واضح ومحدد

ويعمم على كافة الناظرااات

وان اخصائي المعلومات ليست من اختصاصه اخذ احتياطات .. او مراقبة الامتحانات

او بيع بمقصف اوووو غيـــــــــــــــره

والاهم من هـــــــــــــــــــذا كله .. وين الكادر اللي يطالبون فيه ومامن مجيب

شهادتنا بكالوريس ودرجه خامسه .. وبينج وبين خريجة الدبلووم 40 ديناار

انا محوله من تجاري ومضيعه كورس ودارسه عقبه 4 سنين .. واخرتها 40 دينار

لو اني داريه كان قعدت بالتجاري .. وتوظفت من زمان .. ما احس باي فرق

الفرق ماهو 40 دينار وبس راتب وحدة صار لها فوق العشر سنوات اقل من راتب مدرسة توها متعينة

مشكوورين عالتواصل وابداء آرائكم وعرض مطالبكم؟؟؟

بس شلون تعينتي عالخامسة وانتي عندج بكالريووس ..مستحيل !!

احنا تعيينا عالرابعه حالنا حال غيرنا عندنا بكالريووس…بس الظلم بالكواادر ماعندنا كوادر ترفع معاشنااا..

ليش محد يشارك وين امينات المكتبة شاركوا بليييز الفايدة لكم

هلا والله ملوووكة

تسلمين على المشاركة الحلوة

زارا

يارب

أختي العزيزة

تسلمين على الرد الحلو

الناظرات يدرون شنو شغلتنا عدل ومدل
وتييهم نشرات من إدارة المكتبات عن :
ممنوع إستخدام المكتبة باجتماعات الإدارة
ممنوع إقفال المكتبة في الفرص
ممنوع إعطاء أمينة المكتبة حصص إحتياط
ممنوع المناوبة
ممنوع البيع بالمقصف

بس الناظرات يخشونها ومايورونها لكم
وإذا عن الموجهات والموجهين فمصالح وعلاقات
الأمينة كديش وفقيرة خن أسوي علاقات مع الناظرات هذي بنت فلان وهذي كشخة وعلاقات عامة خصوصا الحريم
شكو أوقف مع الأمينة شتفيدني الغافلة عن حقوقها خليني أبني علاقاتي مع الناظرات والوكيلات والي أكبر منهم بالوزارة وبس

آنا للأسف مرت علي وحدة جذي
تبي تستغفلني عاد وريتها إني فاهمة دوري
وعارفة إنه الإدارة مانعتني من كل شي وعندي النشرات
ماقدرت تستغفلني

روحوا إخذوا النشرات من الإدارة علشان تحطونها بويه الموجه والناظرة
إذا ماحصلتوهم بمدرستكم

وتسلمين

زارا

هلا والله
مشكورة على الرد الحلو

بالنسبة للمسمى الوظيفي قدمناه في جمعية المكتبات

والتوصيف الوظيفي واضح جدا ويعمم على كل الناظرات بس مثل ما قلت بالرد السابق

الكادر وافقت عليه وزارة التربية بس معلق من ديوان الخدمة المدنية بس عندنا تفاؤل كبييييييييير

وشهادتنا بكالريوس ودرجتنا الرابعة مادري ليش إنتي كاتبة خامسة شنو ماتدرين والا غلطة مطبعية

والصراحة توني أدري منج بينا وبين الدبلوم 40 دينار بس
آنا أتوقع أكثر من جذي

وتسلمين

زارا

الله يعينكم

نفسنا اخصائيات لا كادر ولا عمات عين

الله كريم !!!

بس ما توقع 40
وفعلا رواتبنا حييييل ضعيفة

اختي ز ااراا
لا تتكلمين عن الموجهين انا اكثر ما يبط جبدي لما تكون الوحدة خبرتها فوق العشر سنوات ويجيبون موجه لاواحيانا يكون اقل منها خبرة
الموجهين اكثرهم ماهم الا كربووووووون لرأي الناظرة