أعراض حملي قبل 10 أيام من موعد الدوره

السلام عليكم
الحمدلله رب العالمين على نعمة الحمل والله يتمم علي وعلى كل حامل حملها و يرزقنا بالعيال الأصحاء خَلقاً و خُلقاً
بدش بالموضوع .. في حملتي هالمره حاولت إني أكون دقيقة ملاحظة من بداية الموضوع ولاحظت وايد أعراض صارتلي

وعقبها لما حللت طلعت حامل فحبيت إني أذكر الأعراض اللي صارتلي بالضبط وبالتفصيل عشان اللي تصير لها مثل أعراضي تستفيد
هالأعراض كلها صارت بين آخر أيام التبويض يعني قبل موعد الدوره بعشر أيام تقريبا و قبل موعد الدوره

1- في آخر آيام التبويض حسيت فجأة بدوخة مو طبيعية و راسي يدور ويفتر مثل دوخة الهبوط بالبدايه عبالي هبوط فأخذت ملح بس ما فاد لما نمت وبعد ما قعدت من النوم رد الوضع طبيعي (حسب تحليلي إن بهالوقت تزلت البويضه من قناة فالوب لي الرحم)
2- اليوم اللي بعد الدوخه نزل علي دم قليل جدا تقريبا نقطتين واليوم اللي بعده نفس الشي ولما بحثت اكتشفت إن بسبب التصاق البويضة بجدار الرحم ممكن تكون سببت نزيف خفيف .. لاحظو إن هالدم بعد أيام التبويض يعني قبل الدوره بعشر أيام تقريبا
3- بعد هالشي قمت لما أنام أقوم عرقانه بشكل خيالي ملابسي كلها ماي مع إن زوجي يقول مو حر
4- ألم قوي مثل ألم الدوره استغربته لأن وايد مبجر العاده ايني الألم قبل موعد الدوره بيوم أو أثنين مو 10 أيام واستمر الألم يروح و يرد و شوي شوي خف لما صار موعد الدوره
5- ألم في المبيض اليمين ألم قوي حسيت فيه و أحس إنه شاد ماقدر أتمغط حيل أو أفز من مكاني بسرعه وماقدر أنام على جنبي اليمين أحس في شي يضايقني
6- تعب وإرهاق إذا سويت أي مجهود مثلا شلت ولدي أو صعدت درج أحس بالتعب أكثر من كل مره
7- ويهي فجأه صار أصفر .. أنا مو عادتي ألاحظ و أنا لوني أصلا أصفر بس زاد اللون يعني لاحظته وايد مصوفر
8- لما قرب موعد الدوره حسيت ان لون البول وانتو بكرامه صار غامج وصار فيه ريحه
9- امساك و اسهال وانتو بكرامه مره جذي و مره جذي حسيت المعده متلخبطه
10- جفاف بالمهبل
11- انسداد خفيف بأذوني مثل لما تنسد من الطياره بس أخف وايد
12- قبل موعد الدوره بشوي بدا يحوشني صداع و ماراح إلا لما خلصت 5 أسابيع من الحمل الحمدلله افتكيت منه كان متعب

المهم أنا من اللقافه كل جم يوم أجرب التحليل المنزلي .. جربت قبل موعد الدوره بثمان أيام طلع سالب بعدين جربت قبل خمس أيام هم طلع سالب بعدين جربت قبل ثلاث أيام و بين معاي موجب
عاد بيوم الدوره رحت الدكتوره أراجع قتلها أنا حامل فسوتلي تحليل بول عزكم الله جان يطلع سالب .. قالتلي مافي حمل .. أنا ويهي قتلها لا أنا متأكده إني حامل وسويت تحليل الدم طلع إن الحمل ضعيف جان أسوي التحليل الهرموني طلع موجب بعدين قالتلي الدكتوره إن احتمال الحمل صار متأخر وانتي سويتي التحليل بيوم الدوره يعني مبجر نسبيا فعشان جذي ماكان امبين عدل
طبعا أعراض الحمل اللي بعد التحليل عاديه والكل يعرفها مثل اللوعه و هالسوالف فماراح أذكرها

المهم أنا نطرت لما تأكدت من الحمل و تطمنت عالجنين وإن الوضع طبيعي وقلت خل أكتب لكم تجربتي

ألف مبروك اختي والله يرزقك بطفل معافى تام الخلقه يارب العالمين وعقبال عندي يارب

الف مبروك

حبيبتي الله يتمم عليج يارب

الله يتمم عليج يا الغالية
ويثبته
جزاج الله خير على المعلومات
و بخصوص الصداع انا يالي قبل الدورة بعشر ايام و الم قوي مدة يومين وراح

ودي اجرب هالشعور

ربي يتمم لك ع خير ويرزقك ولد سليم معافى مثل القمممر

ألف مبروك ؤربي يتتم عليج يأرب

قُلْ هُوَاللَّهُ أَحَدٌ * اللَّهُ الصَّمَدُ * لَمْ يَلِدْ وَلَمْ يُولَدْ * وَلَمْ يَكُنْلَهُ كُفُواً أَحَدٌ }

قُلْ أَعُوذُ بِرَبِّ الْفَلَقِ * مِنْ شَرِّ مَاخَلَقَ * وَمِنْ شَرِّ غَاسِقٍ إِذَا وَقَبَ * وَمِنْشَرِّ النَّفَّاثَاتِ فِيالْعُقَدِ * وَمِنْ شَرِّ حَاسِدٍ إِذَا حَسَدَ }

قُلْ أَعُوذُ بِرَبِّالنَّاسِ * مَلِكِ النَّاسِ * إِلَهِ النَّاسِ * مِنْ شَرِّ الْوَسْوَاسِالْخَنَّاسِ * الَّذِي يُوَسْوِسُ فِي صُدُورِ النَّاسِ * مِنْ الْجِنَّةِوَالنَّاسِ }

مبروووووك حبيبتي

مبروك و الله يرزق الجميع

الف مبروك حبيبتي وعسى ربي يتمم عليج على خير ان شاءالله

الله يتمم عليج

والله تلخبطنا
تجينا اعراض حمل
اخر شي تطلع دوره
هم انا نفس اعراضج
طلعت دوره
لاعت جبدي