أبي رايكم آخذ طلق صناعي ولا ولادة قيصرية ؟؟ عنق الرحم يمكن مايساعدني بالولادة الطبيعي

ياحياتي الله يهون عليج لا اصبري على نفسج طبيعي

شكلج ماتدشين بسالفة الطلق عشان العوار لازم على الاقل فكري بالاجر ويارب ان شاءالله طبيعي اصلا الطبيعي احسن من كل النواحي من القيصريه

وانا جاج الطلق ادعي لنفسج بالطبيعي والله يسر لج ياااارب

وهم استخيري لان ماتدرين شنو اللي فيه خير لج

هلا وغلا كرميلا شخبارج ياقلبي
صراحه قرار وايييييييد صعب بس انا افضل تجربين الصناعي دام راس البيبي تحت وكل شي تمام
لانه عادي ممكن مع الصناعي بسرعه يتبطل الرحم وتولديييييييين طبيعي وتفتكين من عبالت القيصريه

فانا اقترح عليييييييييج لاتجازفين بالقيصريه وابدي بالصناعي والله يهون عليييييييييج يارب

الله يسهل عليج يارب
نطري انشالله هاليومين
وصلي استخارة وتوكلي على الله

حبيبتي أنـا من رايي الطلق الصناعي احسن و اللــــه بيساهلها انا جربته ما بي اقولج ان اسهل من القيصريه بــس كل شي طبيعي احسن… من وجهة نظري لو انا مكانج بتوكل على الله و ان ما كتبلي الولاده الطبيعيه اسوي القيصريه … و كل شي بأجره و صدقيني بعد الولاده بتحسين باحساس بنسيــــج كل الألم ..و ما تدرين بعد التوسعه اللي سوالج اياها بأي لحظه يمكن ينزل الماي او اييج الطلق ..

يقولون ان الكركم يساعد اشربي كركم يمكن يسوي وياج نتيجه يااارب

مشكوورين بنات على ردودكم ماقصرتو

وياريت هم إلي إدش تكتب تجربتها بالطلق الصناعي وعلى فكرة هذي أول ولاده لي

توكلي على الله وجربي الصناعي ابركلج من العمليه واذا على كبر الياهل كاني انا ماايب عيالي الا على اربعه كيلو او اربعه وستمية والحمد الله كلهم طبيعي بس يبيلج صبر واحتسبي الاجر

كرميلا حبيبتي الله يهونها عليج ان شاءالله

الحمدالله على كل حال سواء كانت طبيعي او عمليه,,,, قولي هذي خيره لي والخيره فيما اختاره الله

ترا انا بعد احتمال عمليه واول حمال لي, صج تضايقت بس وكلت امري لله سبحانه

وبعدين قلت كا شكثر ناس ولدوا عمليه وصحتهم من احسن ما يكون,,, حتى اجسامهم اذا تحاتين الربط,,, والله اختي طلعت من الاربعين بعمليه ما شاءالله عليها حدها جسمها حلو

يعني اذا الشي فيه مصلحة البيبي نتحمل شويه حبيبتي شنسوي بعد,,,كافي انه يصير عندج بيبي يهون عليج ضيقة العملية

والله اجذب اذا قلت مو خايفه بس خلاص والله اقنعت روحي سواء كانت الولاده طبيعي او عمليه

وبرايي سوي الطلق الصناعي ممكن الله يسهلها,,,, انا اختي الكبيره دشت المستشفى عشان تولد عمليه ولما عطوها الطلق الصناعي البيبي افتر كان راسه فوق,,, وسبحانك ولدت طبيعي

يعني دام فيه امل جربي,,, وان جربتي والله ما كتب ماكو الا العمليه

وصلي استخاره اكثر من مره

وطمنينا عليج حبيبتي

الله يسهل عليج
انا جربت الصناعي بالولادتين لانه ما ايينى طلق من الله
بس صج عوار يمكن ما تحملينه

الله يقومج بسلامه يارب انتى والبيبي

امبيه انا كنت بمكانكم بالضبط قبل شهر و نص !! واااااي شنو كانت حالتي ما انام بس افكر

انا ضعيفه حيل و قالتلي الدكتورة عنق الرحم وايد وايد ضيق و حتى لو تتوسعين انسي اني اولدج طبيعي راح تتعبين
و انا عاندت وايد و قمت اصيح
بعد فتره كلمت وايد بنات مسوين قيصرية و حطيت ببالي انه موزين اشيل فكرة القيصرية عن بالي لان لو صارت و سوتلي قيصرية عقبها راح اكره نفسي و انخاف وايد و انعب النفاس لاني مو متقبله اني ماولدت طبيعي

المهم اني حطيت ببالي القيصرية ..و هالشي ما فكرت فيه الا بالشهر التاسع

والحمدلله اني سويت جذي و حطيت ببالي امكانية القيصرية لانه الصج صار و قررت الدكتورة قيصري قبل لا اييني الطلق يعني كنت بالاسبوع ال 38

قالت خلاص قيصري ولا تبين تجربين طبيعي و تتعبين و اخرتها نسويلج عمليه! قلت لها لا خلاص انا اصلا متقبله الفكره خصوصا بعد ماكلمت وايد بنات سووها و كلهم مرتاحين منها و سهله وايد

فقررت اروح لها عقب يومين عشان نسوي قيصري و اشوف بيبيتي الي 9 اشهر احلم فيها و ابيها ماهمني شي غيرها

و سوولي قبصريه مع ابرة ظهر و الحمدلله و نفس ماقالوا البنات العوار بس اول اسبوع و اول ماتردين البيت جنج جذابه ماكو شي لايخرعونج
البطن اوكي كبير وايد بس انا الحين صارلي شهر و نص و بطني وااااايد صغر عقب كورسيهات و سوالف

و من قالج ماتربطين؟ انا وصفتلي الدكتوره كورسيه خاص للعمليه و ممتاااااااااااز
و خذيت من خبيرة الاعشاب بالمنتدى شاي الاعشاب نزل الماي كله و ساعد بتصغير بطني

يالله توكلي على الله و حتى لو قررتي صناعي لاتشيلين من بالج فكرة القيصرية ولا ترى بعدين تندمين لانج ماراح اتقبلينها اذا الله كتبها لج و تتعبين نفسيا!!

الله يسهل عليكم يارب

سالفتج نفس سالفتي بالضبط وهذه اللي انا احاتيه بحمالي هذا
بحمالي اللي فات خلصت شهري كله وزياده عشرايام ولا جاني طلق ورحت لهم وعطوني طلق صناعي هو يذبح صح وياليت صار فيه نتيجه تعذبت وتاذيت وبالاخير الصبح سوولي عمليه لانه مافتح الا شوى

والله انا الحين احاتي هالشئ مادري من البدايه عمليه ولا اشوف اذا في طلق او طلق صناعي مادري الله يسر وسهل علي كل حامل

بعد عمري كرميلا
والله ما ادري شقول لج انا بجر وما عندي اي خبره بس هم انا وضعي غريب شويه
انا بنتي صغيره وتتقلب وايد مره راسها فوق وبعدين بعد اسبوع تحت
وعنق الرحم راد ورى
يعني احتمال بعد قيصريه لو صار راسها فوق
شوفي الخيره فيما اختاره الله …
ولا تغامرين وتخاطرين على حساب صحتج وصحة البيبي

شوفي في وحده قالوا لي عنها يت تبي تولد وكان راس البيبي فوق طلع الجسم والراس بقى معلق
وقعدت فتره شوي بعدين طلع النتيجه ان صار عنده نقص في الأكسجين ….
تحسفت قالت ليتني مسويه القيصريه
يعني ما تدرين وين الخيره فيه …
وبعدين شوفي الشي الزين بالقيصريه .. صح ان في خياط بالبطن بس ترى بتصيرين من ناحيه ثانيه عروس
الله يعينج ويقدم اللي فيه الخير

انا في وحده علمتني دعاء والله كل ما ادعيه ارتاح

(يا حي يا قيوم برحمتك استغيث اصلح لي شأني كله و لا تكلني الى نفسي طرفة عين)

هلا وغلا كرميلا اخبارج ان شا الله تتيسر امورج باستخارتج

انا ما جربت اللي انتي قاعدة تمرين فيه الله يعينج حبيبتي ولو كنت بمكانج العقل يقول انج تجربين الطلق الصناعي واذا ما نفع الدكتور يتصرف ويولدج قيصري باسرع وقت ويلحق عالبيبي لا يصير فيه نقص اكسجين ويتسبب بمشاكل له الله لايقوله

يبى حمدي ربج عندج دكتور عالاقل صابر عليج مو مثل بعض الدكاترة الله يهديهم على طول قيصري ما يصبر

انا اقول حطي ببالج الطلق الصناعي وهمن القيصرية لا تضمنين واحد منهم والله يكتبلج اللي في الخير حبيبتي

واستغفري ربج على طول وادعي انه يسخرلج عباده وين ما كنتي

الله يسهل عليج يا ربي وتقر عينج بشوفة البيبي.. وادعيلنا لا تنسينا

مشكوريييييييييين واايد على الردود فيكم الخير والله ينولكم إلي في بالكم

بس هم محتاره لما ألحين وخايفه من التجربة سواء القيصرية ولا الطلق الصناعي

مني لي يوم السبت مادري شنو يصير لأن يوم السبت براجع دكتوري وبشوف شقولي

أمي وزوجي يقولون سوي قيصرية ولاتاخذين طلق صناعي خايفين من التعب إلي بمر فيه وخايفين على البيبي

وأنا بودي الطلق الصناعي أجرب أول شي يمكن الله يسهل وهو على كل شي قدير