موظفات البنك الأهلي المتحد ممكن مساعده

اقتباس:

المشاركة الأصلية كتبت بواسطة JaMoOoNa هلا حبيبتي بجاوبج عن اللي أعرفه بالنسبه للكول سنتر ما عندي فكره عنه أما الأفرع اذا كان بمناطق سكنيه الدوام راح يصير شفت واحد من الساعه 8 لي الساعه 3 و اذا بأماكن تجاريه المجمعات الدوام راح يصير شفتين صبح و عصر بالنسبه للدوره على حسب البنك فيه بنك دورتهم مدتها 3 أشهر و فيه بنك مدة دورتهم 6 أشهر أما اللبس ما عندي فكره والله و الراتب اذا جامعي بحدود الـ 500 و الدبلوم 400 غير دعم العماله و الحمدالله انا توني انقبلت فبنك برقان و انتي الله يوفقج و تتوظفين بالمكان اللي تبينه ان شاء الله أتمنى أكون فدتج

مبروك الوظيفة

شنو تخصصج و من وين؟

شوفي ياطويلة العمر بالنسبة للكول سنتر دوامهم شفتات بس حق البنات حدهم يداومون لي ٩ بليل جن مو متأكدة منه لان مامر علي احد بالكول سنتر
وبالنسبة للأفرع السكنية من ٨-٣ والتجارية ٩-١ والعصر ٥-٧ وطبعا لازم تكونين موجودة قبل هالوقت بنص ساعة وتطلعين بعد نص ساعة وفي عندج فرع المطار ومجمع الوزارات من ٨ -٢ وجيكي بموقع البنك عن اوقات دوام الافرع

والدورة الي يقدمها البنك اهي اسبوع بس بالرئيسي بعد هالاسبوع يوزعونكم بالافرع كمتدربين لمدة ٣ شهور بعدها تتثبتون

واللبس عادي مو ممنوع البناطيل بس ممنوع الجنز والالوان الفسفورية والاوفر فاشن

المعاش ممنوع نقوله بالضبط بس اهو اعلى بيسك بالبنوك يعني ٥٠٠ وزيدي عليها خردة هذا حق الجامعي والدبلوم ٤٠٠ وخردة وفي بدل عصر حق الي يداومون شفتين ١٢ دينار اليومية اذا داومتي ١٢يوم واكثر و٦ دنانير اليومية اذا داومتي اقل من ١٢ يوم

والبونص السنوي على حسب تقديرج يا راتب او راتبين او ٣ وتذاكر حق القاهرة كل سنتين وتأمين صحي

اييي ونسيت اقولج ترى ماله داعي واسطة توكلي على ربج وقدمي انا انقبلت بدون واسطة وشغلهم سريع مشالله ماينقعون

أنا تخصصي اتصالات لووول مال امه داعي بالبنوك بس الحمدالله مشت أموري سهالات معاهم

نصيحه قدمو على كل مكان و اكثر من بنك

ربي يوفقكم ان شاء الله