|
|
راح اكتب لكم قصتي من ملكتي ليـــــــــــنـ … بالتفصيل
تزوجت من العائله قريب من عمري فا كنت كثير مبسوطه لانه اكيد راح نكون متفاهمين
الخطوبه كانت ببيتنا وكانت روعه بكل مافيها بدون مبالغة الله سبحانه باركلي فيها هاليله
وبعدها بيومين راح الخوف وتشجعت وكان هو طالب مني اتصل عليه وفعلا كان اول اتصال
اتصله وكان توه واصل للمدينه الي يشتغل فيها ,, وبعدها بدات الاتصالات والرسايل تصير
امر ضروري هو يحاتي مسجاتي الصباحيه وانا انطر اتصاله على احر من الجمر واعد الدقايق
لمن يجي وقت الاتصال ويتعدى ازعل واعصب بس ماابين له
كلامه على صغر سنه الا انه تبين لي شقد هو حبوب ومتفهم ومثقف وطيب ورومنسي لابعد
درجه ,وهيك لين عدت الايام والاشهر وانا اجهز للبيتي الي بنتقل له وهو يرتب للحياتنا سوا
كنا الاثنين طايرين في بعض وحامدين ربنا ليل ونهار على هالنعمه وراحة البال والوفاق الي بينا
وعدني بنروح ايطاليا شهر العسل , مع اني ماكنت اتخيل اكثر من تركيا , وكانت قريبتي واخوه
الي اصغر منه يتزوجون الي صار انو احنا وهم صرنا بليله وحده مع انه ماكان راضي يقولي هذي حفلتك لازم تستانسين بهذي اليله .. قلت له انا ابدا عادي المهم اكون يمكـ مايهم الحفل .
وفعلا صار الزفاف وبعده انتقلت معاه لبيتنا الي بالمدينه الي يشتغل فيها ايطاليا ماقدرنا نروحها
لضروف .. اهلي واهله زعلو كثير خصوصا انو اخوه سافر اسبوع ورجع واحنا لا . فاوقفت معاه
وفهمته انو ابد لا يحط في باله والايام قدامنا فقررنا الفلوس نرتب فيها بيتنا نعيد فرشه ونصبغ
حيطانه .وفعلا صارت احلا من شهر العسل كله برا مشاوير وضحك وطلعات وطايرن فرحه
وفي يوم جات زوجة اخوه الجديده الي تصيرلي اصلا وزارتني في بيتي كان صراحه باين عليها
انها انقهرت .. لاشياء كثيره ..
وبعد بكم يوم صار مناسبه لاخته انها بتتزوج فاالي صار انو جات اخواته وامه وسكنو عندي
وكنا نسهر ونطلع وحتى الطبخ والصحون نطبخ ونغسل كلنا سواء الله الشاهد انو طيبات معي
ولاحمد لله كانو يحبوني لدرجة يوصون زوجي علي .
سافرنا معهم نحضر الزواج وبعدها بيومين ردينا ومعنا اخته الصغيره الي تدرس 3 جامعه
انا هذي البنت ماكنت اعرف طبعها ابد فالمن وصلنا هناك لبيتنا كنت ما ارضى اخليها تشتغل ابد ولا تساعدني بشي وكنت احظر لها الاكل واقدمه لها بفكري هذي اخت الغالي وبعدين هي كبر اختي الصغيره وكن ارحمها لاني احسها مو مرتاحه بينا
تخيلو بنات هي اكبر مني حجم انا جسمي اصغر منها مع انو اكبر منها بالسن ولله انها حتى الشاي والقهوة ماتعرف تسوي ولا عمرها دشت المطبخ الا عشان تسوي ساندوتش تاكل اصلا انا مارضى
اشغلها ..
في مره تركت شغلي وسويت قهوه وجلست انتضرها تخيلو طلعت من غرفتها للمطبخ اخذت بارد وراحت لمجلس الرجال وانا احقرتني ,, قلت بكيفها انا بقوم اكمل شغلي والي علي سويتها
مره ثانيه جات من الجامعه بدون سلام ولا شي وعلى غرفتها ولمن جاء زوجي من لدوام طلعت تجلس معاه ,, بالعربي البنت ماتواطني بس اكتشفت هالشي متاخر
صارت لمن نطلع مشاوير تقعد ورانا وتنافخ انو طفشانه يعني
لمن نجي نروح مكان زوجي يقولي يالله بعد ل3 وانتي جاهزه واحد … ويصير يعد هي تنقهر وتبطل تروح تخيلو لين خلته ابد مايسالني يقولي بروح مع فلانه شوي وراجعين .. ولله يابنات ابلع ريقي
وانا منقهره اكون خلاص حدي زهقانه بس شغل البيت وزوجي لاهي عني واهلي بعيدين . ..
كان بجد حالي يبكي المصيبه انو هو شايف بس ساكت
بنات طبيعي احنا تو متزوجين كان بالي مشغول بشي خاص ودي اروح للدكتورة بس لازم معاه
يعني تعرفون حياة جديده لازم احد يساعدنا بالبدايه ويرشدنا ولله والله ماخلتلي فرصه ###
مره جلست معاه وصارحته بانو الوضع ما اقدر اتحمله وصارت اعصابي تتعب .. بس يعترف بالخطا
ولا يحاول يصلحه ابد …..
زوجي يابنات يروح للدوام من ال7 لين 7 المغرب يجي مهدود حيله يبي لقمه ويبي ينام زين اذا
عطاني من وقته نص ساعه
تخيلو من يجي لابسه العبايه ويالله .. عندها مشوار
ماتعرف تفكر بناس غيرها ابد ولا حتى عامله لي اي اعتبار انو مرته ولي حق فيه ..
ولله لمن يكون السالفه يوم يومين بالاسبوع اهضمها واقسم بالله كل ايام السبوع شاغلته ولا هي حاسه بالتعب عليه ابد .. وانا انقهر لانه ساكت
اعرف بتقولون اخته تخسى هي والله لو اخته صدق كان جمعت طلباتها في يوم واحد وتسويهم
تتشرط بنات بشكل مو طبيعي وربي شاهد على كلامي هذا وبيحاسبن ربي عليه يوم القيامه
البنت ماكانت طبيعيه بتصرفاته ابد تبيه يبعد عني تموت لمن نقعد ونسولف ولا لمن نقعد نتعشى ونتغشمر ونضحك مع انو متحفضين عندها بس مايهمها
لين توصلت انا لقناعه وهي انو اشغل حالي بحالي خلاص قلت له الي عندي وهو شايف وعارف
التصرف بيده الحين لازم يحط حد هلاموضوع ,, فا صرت ادور على وضيفه س عشان اشغل وقتي
وبديت اندمج مع بنات صديقاتي وفي مره صديقتي سوت عزيمه كبيره عشاني لانهم ماشافوني من زواجي فاكانت عازمه ناس ولان المسكينه بشقه فاظطرت تطلع زوجها برا لمن اعزمت الحريم المهم كلمته وقلته فلانه عازمتني وشرحتله السالفه وافق على طول وبديت بيوم العزيمه اتحظر والبس
حتى عشان ما احد يمسك على شي شغل البيت كنت مخلصته من بدري كان خميس ولمن جاء اليل وتجهزت ولا اشوف اخته لابسه العبايه وهو وراها وطالعه ويقولي مابنطول شوي وراجعين
وفعلا الي توقعته صار لمن جاء قالي مانتي برايحه ..!!!! طبعا زعلت وتنرفزت ومت من القهر
ليش يعني اهي مشاويرها ضروري وانا كلام اطفال … ليش هالاستهتار طيب ليش من الاول وافق
ليش يخليني اعشم صديقتي ووتتكلف المسكينه ولله بنات كانت بطنها طولها مرتين المره حامل وتعبانه وموجبتني يعرف هذا الشي ولا قدره ؟؟ المهم تهاوشنا وقلت له ابي اروح عند اهلي
بريحك مني وانا ابي اريح اعصابي .. بعد اسبوع وافق ووداني بنفسه للمطار كان باين عليه الزعل
بس بكيفه ليش يسوي فيني هيك .. المهم وصلت عند اهلي وارتحت الحمد لله
وهو لاكلم ولا اتصل ولا سال وبعد 3 شهور ارسل شناطي وطلـــــــــــــقني بنات ؟!!! تخيلو
بعد هالحب والشوق والوعود الي وعدنياها عند اول مطب قرر يتركني عشان سبب تافه .. بعد 5 شهور زواج بس مافكر بنفسيتي ولا بكلام الناس ولا بحالي بعده ..
لا تقولون انتي تركتيه اول هو الي وصلني لهلحل ماكان فيني اقعد اقولكم كنت منهاره اعصابي
اشياء كثيره تجمعت علي فوق ما اتحمل بعدين طلي كان واضح كنت بعطيه فرصه يهدي اعصابه
وانا بعد بحاجه لها ..
تخيلو …. كان لمن يكلم احس انه يبي يستفزني عشان اغلط ويمسكها علي يصير مبرر للطلاق
وصلت فيه ان يقول لامي لمن اتصلت عليه تقوله تعوذو من بليس وروحو مكه غيرو جو . وحلو مشاكلكم يقول لا فلانه مو البنت الي في بالي؟؟!!!!! تخيلو ولا امه ولا خواته اتصلو ولا احد برر
عن الي صار مع انهم يصيرون لي من قريب بعد . بس ابوه يقول ماعليكم منه هذا سفيه انا اادبه
طبعا كرامتي ماتسمح لي ارجع لواحد مغصوب علي .. بنات انهارت اعصابي وتعبت نفسيا لما ربي العالمين ثم الناس الي يحبوني ووقفو جنبي كان الحين بمستشفى المجانين ..
ولله من واحد حتى الورد كان يخشه في الثلاجه مفاجئه لي من واحد يجي من الدوام ويقليوانزلي لي بنتعشى برا .. وهو هلكان تعب بس عشاني يتحمل .. من واحد ماينام الا ايدي بيده.. من واحد يتصل فيني من الدوام بس عشان يسمع صوتي .. من واحد حتى باصعب مراحل حياته الي ماقط مره حكى فيها لاحد الا ليـ انا … الى واحد كرهني بيوم وليله وبسبة اخته الله لا يسامحها ياربي ان شاء الله نشوفها بدنيا وبالاخره ..
تخيلو كنت كل عيد اقول لا مستحيل اكيد بيجي يراضيني ..
كل مناسبه اقول اكيد خالتي فلانه مابتسكت اكيد بتجي تراضينا على بعض
والحين صارلي 2 سنتين الحمد لله على كل حال افضل بكثير من اول بس ادعي ربي ليل ونهار
انو يطلعه من قلبي مثل ماطلعني اهو من حياته بهسهوله وبدون لايفكر بنفسيتي وسمعتي
بنات هو اخذني عن حب انا ماكنت اذكره من اول بس لمن تزوجنا خواته قالولي انه كان بيروح فيها
لمن عرف انو فلان خطبني قبله ,, وصارت قصص كثيره تبين ولله اعلم انو منصابين بالعين
خاصه مااقدر اذكرها .. الحين هو باقي ماتزوج وطلاقنا مره وحده بس اسالكم
تعتقدون ليش للحين ماتزوج ؟ ومعقول الرجال اذا طلق مايحزن مثل الحرمه ؟
اخيرا اسفه اذا كدرتكم وزعلتكم وطولت عليكم ,, وربي الشاهد هذا المكتوب حقيقه ويسالني ربي عنه يوم القيامه .. هدفي العضه والعبره وبعد كنت حابه اسمع رايكم خواتي ..
ان شاء الله رربي بيعوض صبرج وقهرج
دعوه المظلوم مابينها وبين الله حجاب
وان شاء الله ترجعون حق بعض ،ما تدرين شنو راح يصير بالمستقبل ، في وحده اعرفها اتطلقت وبعد 6 سنوات سبحانه الله ريلها ردها والحين اهي حامل ، الله لا يغير عليهم والفال لج واتبشرينه ان شاء الله.
حبيبتي قصتج بهالايام واايد قاعده تصير
الشباب هالايام للأسف مو قد مسئوليه
يعني يتزوجون بعدين يتحسفون
ونسبة الطلاق زادت
انتي مالج الا الصبر والدعاء والاستغفار وتأكدي ان فيها خيره …… تأكدي
انتي سؤالج هو ليش ماتزوج للحين
انا اقولج
الريال مو نفس المره
المره اذا مرت بنجربه فاشله بسرعه ودها تجرب حظها مره ثانيه وتعوض اللي صارلها وتنسى
اما الرياااال لأأأأأ اذا مر بتجربة فاشله وانتهت خلااااص يبي يرتاح سنه سنتين ثلاث ،، هوما صدق يفتك من المسئوليه ماوده يرد يرتبط بعد
عشان جذي حاولي تنسينه وشيليه من بالج وانشالله خيره لج
والله يعوضج يااارب
ياربي ان شاء الله يعوضك ربي خير عنه ,, حاسين فيك واكيد صعب كثير الي مريتي فيه خصوصا لمن يكون من قريــــــــب يعني تقولين
من عايلتكم … الله يرزقك ويفرج كربتك ويعوضك خير …
وبنات كويتيات ماقصرو على ردورهم ال تثلج الصدر الله يوفقكم بنات ويرزقكم ويحميكم
يولون زين واخته هذي بييها الدور وبتشوف بعينها ان الله حق
لاتتعبين وتتضايقين استانسي بحياتج والله يخليلج اهلج
وربج كريم رحيم علي عبده ومايرده ولو بعد حين ادعيه واطلبيه يعوضج ويوفقج ياااارب
واذا لج نصيب ابتاخذينه
بعض هالشباب مستهتر يتزوجون بنات الناس ويطلقونهم بدون اسباب بنات الناس لعبه عندهم؟؟
قولي حسبي الله ونعم والوكيل
لو عنده احساس مايطلق انسانه طيبه وتحبه بس زين بان على حقيقته من البداايه واحمدي ربج مافي شئ يربط بينك وبينه ولا اطفال..
الله يرزقج ويوفقج وترا الحياه ماتوقف علشان رجال …
تحياتي
حسبي الله ونعم الوكيل
انا بعرف بعض خوات هالزوج شيبون؟؟؟؟؟؟؟؟؟؟؟؟؟؟
يتمنون لنفسهم ولخواتهم احسن الازواج
ويناشبون الوحده على زوجها اعوذ بالله
الله يكافينا الشر
رفعي ايدج وادعي انتي مظلومه
ودعوة المظلوم ليس بينها وبين الله حجاب
الله يردلج حقج يارب ويعوضج خير منه قولي امين
لو اخته متزوجة هل امها بترضي ان بنتها عروووس لها شهرين
وأهل زوجها يعيشون معاها ف بيت واحد
اللي ما نرضاه علي بناتنا لا نرضاه علي بنات الناس
شسالفه الطلاق صار شيء سهل هالايام !!!
الله يعوضج باللي يحبج ويريحج