ليش المطلوب من الزوجة تتزين لزوجها / ومو مطلوب منه انه يتزيين لها

السلام عليكم و رحمة الله و بركاته

ودي اعرف ليش دايما الناس و الاهل يطلبون من الزوجة انها تتكشخ و تتزين و تتمكيج حق الزوج
و ما يطلبون من الزوج يتزين و يتكشخ حق الزوجه

فمثلا

دايما اشوف الحريم ينصحون بعض
تكشخي حق زوجج
سوي له ليلة رومانسية
اشتري زيوت مساج و سويله
لبسي له جذيه
سوي له جذيه

وعمري ما شفت نصحوا زوج قالوا له
البس او اتزيين حق زوجج

ليش بس الزوج يبي يتمتع عينه
و احنا الحريم عادي نتقبل اي مظهر يطلع فيه الريال

احنا الحريم مو بشر نحب الجمال
ولا بس الرياييل لهم حق انهم يطالعون الجمال

انا لما تزوجت
قلت حق ريلي مثل ما تبيني دايما متزينه انت بعد تزين نفسي

ضحك و قالي يعني تبيني احط مكياج و البس اكسسوارات :d

قلت له يعني البس اللبس الي احبه
مثلا شورت بالبيت بدل دشاداشة مخططة
البس ساعة كشخة بدل ما تلبسها بس للطلعة

البس ملابس داخلية مزركشة موبس ابيض في ابيض
و علمت له على محلات و وريته صور ملابس من على الانترنت فيها اغراء

(( علشان ما تفهمون غلط))
الملابس اللي اقصدها
مثلا سليبات ملونة او فيها رسومات
سليبات تايغر و زيبرا
و تي شيرتات مخصرة فيها رسمات حلوة و الوانها حلوة
او عليها رسمة أسد ( يعني قوة )
او فيها عبارات حب
او فيها اشياء اللي انا احبها
ز طبعا مو ملابس شبيهه بملابس الحريم

و قلت له كل يوم ابي عطر غير

وتحط جيل و تسرح شعرك حتى حق النوم
و بين كل فترة و فترة تغير تشريحة شعرك و لحيتك
واذا طلع لك كرش او عيب في جسمك تروح تسوي عملية تجميل

مو بس احنا الحريم نذبح روحنا علشانكم

زوجي مسكين من قبل الزواج كان شكلة حلو مرتب و ذويق باللبس بس بعد كلامي له باول زواجنا صار يهتم اكثر من قبل و صرت ادور له و اطلب له ملابس مثل ملابس داخلية و شورتات و تي شيرتات من الانترنت

مشكورة حبيبتي

صح كلامج المفروض يتزينوون ويتكشخون مو بس الحريم مسااكين مايعرفون شنو يسووون بروحهم هههههههههههه

ااي والله ملااحظه هالشي من زمان ان المرا بس اهيا اللي تتزين
مادري احس يمكن بطبيعتها تحب الاهتمام والاغراء
والزوج حلاته برجولته؟؟
وتقبلي مروري

المفروض والصح ان يتزين الرجل حق مرته عشان لا تنفر وخصوصن النظافه الشخصية لانه مثل ما اهو يحب الجمال حتن المره تحب النظافه والعطر ويجذبها هالشي اذا سواه الريال حقها

حلات الرجوله بطبيعتهاا لووول
بصراحه مو حلو ريال يكشخ حق مرته او في بيته
الكشه للمره !
كافي عليه السباحه ..والنظافه وحياتي هالاشياء ما تساومين فيها ريلج يعني انا كاشخه انت بعد تكشخ !
خليه على راحته وكل ريال وطبعه حووبي

عادي بكل سهوله لأنه يقدر يتزوج اربع .. وانتي مجبوره فيه بروحهه

انا اهــــــــــــــــــــــــــــم شي عندي بالزوج النظافه الشخصيه……..والكشخه والاغراء علي….

حتى بالدين ..
المفروض الريال ما يشوف بمرته شي مو حلو .. مو لأنه المرا ما تستاهل !
بس هذا حقه عليها ..
وبنفس الوقت الريال الطبيعي يكون نظيف يعني لبسه مرتب وشكله زين ..
تبينه يتحمر ويتكحل ما يصير

ماكو مقارنة بين الريال والمرا بهالشغلات !!

يعني الريال لي صار اجلح املح يا حلوه
اما مرا جلحه ملحه ودج تسبحينها بفازلين

خلقة الريال وتكوينه وهرموناته غييييير عنا احنا !

عمرج شفتي رياييل بالدوانية يسولفون عن الماركات وفلان شلبس وفلان شحط ؟؟؟

والله انا مو متزوجه بس مع كلامج 1000 % لازم اهو بعد يهتم

وانا اعارض الاخت بتبوتاا .. الموضوع مو مساومة لا الموضوع مثل ماتبيني اتزين واغير لوكي بين ووقت والثاني
انت بعد لازم تغير يعني شنو الوحده مو من حقها تشوف زوجها متزين .. يعني واهو عزوبي اشوف كل شهر لوك يوم سكسوكه ويوم لحية مخنيره ويوم املط والشوارب كل يوم قصة وبدل وحركات وجنزات ومن يتزوج الواحد .. مسك الدشداشة واللحية ماتنحلق الا للديوانية ولا المناسبات …؟؟ ليييييية؟

من حق الزوجه انها تشوف زوجها مرتب ومغير بشكل اللحية بين ووقت ووقت وحلو يهتم بجسمه ورياضتة
واذا طلع معاها يحسسها ان لابس علشانها ..

مادري من وجهة نظري هاالامور الزوجه لها دور كبييييييره فيها .. يعني اهي اللي تقدر تقنعة وتشجعه على هاالامور ..
والزوج بشكل عام يحب يحس ان زوجته تهتم بمظهره وتشريلة وتتحلى علية … من خلال ما اشوف رفيجاتي وخواتي ..

جبتيها عالجرح

مليت كل موضوع شنو اسويله ابي اكشخله ابي خلطه تنعيم تبيض ليزر زيوت وتلطخ للشعر عشانه اوووووف مليت

ميخالف يتسنع ويرتب عمره

بس يلبس ملابس داخليه ملونه ومغريه لوعه ماظنتي اتقبله من الرجال

بتوتا الرجال حلو برجولته صح

بس ما قلنا يقلد الحريم باللبس ما قلناله حط مكياج
بس المطلوب انه يتزين و يتكشخ اكثر لما يكون مع زوجته

انا مثلا احب لما وقت الاوقات الحب يلبس دبلة زواجنا هالشي يريحني و يرفع من معنواتي

و احب يلبس ساعة لون معين

و احب يحط ديودرن معطر

فهالشي ما ينقص من رجولته شي

بالعكس الزوجة جذيه ترتفع معنواتها

مو زوج اجلح اماح يطلب من زوجته تتنظف و تتزين هني المسألة تصير مسخرة

لأ مو قصدي سراويل دانتيل و سوالف حريم :d

اقصد اشياء تغريني مثل سروال تايغر او زيبرا
و سراويل احمر او ازرق ملينا من اللون الابيض

مافي مانع يسوي حواجبه تاتو جاينيز

اتغشمر لا تصدقون :d

وضحت بالاول مو قصدي انه يتمكيج
قصدي يلبس و و يقص شعرة و يسوي لحيته مثل ما احب

صح مثل ماقلتي ان يلبس الاشياء الي احس انها حلوة وارتاح لما اشوفها

مو بس دشداشة بيت ولا مكسر وفنيلة

يعني انا احب اشوف ريلي لابس شورت رمادي ولا اسود .. احسه حلو..

واحب لما يروح السوق يشنري ملابس حق البيت .. عشان يلبسها لما نكون مع بعض

مو الدشداشة الي ينزل فيها عند اهله اهي نفسها الي يقعد فيها عندي ..

وطبعا النظافة الشخصية والسباحة والريحة الحلوة .. هذي تكون بالمرتبة الاولى

حلات الرجوله على طبيعتها

واصلن الكشخه والحلاة والزينه لنا مو لهم ياقلبي