لكل متزوجة: حقيقة ريلج لازم تعرفينها ( مهم لجميع المتزوجات + المقبلات على الزواج )

السلام عليكم ورحمة الله وبركاته
صباح الخير بنات

انا بعدي انسة وعمري 23 لكن الحمدلله عندي اطلاع كبير بشأن علاقة الرجل بالمرأة وخاصة المتزوجين
يعني تقدرون تقولون اول شي كان فضول لكن بعدين صار اهتمام علشان جذي وبما اني تشبعت بالقراءة
في المجال هذا حبيت أفيد كل متزوج وكل وحدة مقبلة على الارتباط

انا مابي من هالموضوع دعوة ولا ابي هدية >> منو قال بيعطونج الحين؟
انا كل الي ابي واصله ان كل وحدة لازم تعرف طبيعة ريلها حتى تقدر تعيش معاه بدون مشاكل
واتمنى موضوعي هذا يخفف يقدر لو يخفف المشاكل بينت المتزوجة وريلها حتى لو 1%

راح أحط كل المعلومات الي عندي بنقاط حتى تكون واضح وتوصل أسرع..

_____________________________________________

1- الريال مثل الولد الصغير انتي بنفسج تقدرين تكسبينه، صدقيني كل الرياييل جذي مهما كان عسر أو مغرور او شايف
نفسه أو عصبي أو عادي او فكاهي فهو بالنهاية مثل الطفل الي يحتاج رعاية واهتمام من أمه

2- لما تكونين قاعدة معاه سوي حركات عفوية لا ارادية منج مثلا انتوا قاعدين تتغدون وكل واحد لاهي بصحنه
بنص الاكل تقولين له: امس ترا حلمت فيك ان رايحين مكان ظلمة وكنت انادي وانادي ولا اشوفك ماسك ايدي وتقولي لا تخافين انا معاج ( الرياييل يحبون ان الوحدة تقولهم اشياء تحسسهم انهم الظهر والحصن المنيع )

3- اذا كنتي من النوع الحياوية أو الجافة مع ريلج من ناحية كلام الحب جربي دزيله مسج بعد المسجات من شنو
تشكي؟ يعني هالحركة لا تسوينها وايد علشان لا تصير روتينية خليها " كل شهر مرة " يكون قاعد بالداوم دزيله
مسج… " واحشني " أو " مشتاقتلك "
حتى لو ما رد عليج يكفي ان المسج وصله وقراه وحس انج تحبينه

4- انا من خلال قراءة بعلاقة الرجل بالمرأة عرفت ان 90 % الرجل محتاج اهتمام من شريكة حياته قبل أي شي ثاني وتدرين شنو اهم شي؟ اي عدل عدل نفس ما خمنتوا ( بطنه ) ترسي بطنه واهتمي فيه عاطفيا راح يحبج ويحط على راسه وخاصة رياييل الخليج همهم بطنهم حلو انج مرة تفنتقين بطبخة صغيرة، مو شرط تسوين مجابيس وتقعدين 4 ساعات بالمطبخ.. سوي شي حلو وبسيط واكلة يديدة واتصلي عليه: حبيبي متى بترجع مسوية شي حلو بذوقك ياه
صدقيني هالشي راح يخليج تكبرين بعيونه

5- الريال يطلع من بيته وهو علاقته بأمه وخواته محددة فلما يتزوج اكيد بيكون هناك تضارب بمفهوم المرأة عنده
لأن هذي راح يسوي معاها اشياء مايقدر يسويها مع امه وخواته

6- وايد بنات يقولون ريلي ما يعطيني ويه ، ريلي ما يقولي كلام حلو بس اول شهرين بعدين حسيت انه بعيد، واللي تقول ريلي عصبي ويزف على اشياء تافهة

7- حبيبتي انتي المفروض تراعين هالشعور قولي ليش؟ الولد قبل الزواج طبيعي يطلع مع ربعه وعنده حياة العزوبية فيها حرية فلما يتزوج وكل ريال يتزوج يحس انه مقيد فتلقينه يتمرد على هالشي ويقول شنو يعني تزوجت خير ان شالله بظل على حالي، علشان جذي تصير مشاكل بينه وبين مرته

8- الحل انج لازم شوي تدارين ادري بتقولين اخاف يتمادى، لأ انتي حسسيه ان هالشي عادي وسولفي معاه ها شسويت مع ربعك اليوم وناقشيه واخذي وعطي معاه لكن بعدين عاد انتي تبلشين معاه بالرومانسيات خليه يحس ان فعلا حياته كمتزوج غير لما كان عزابي

9- اذا كان رايح مع ربعه سينما/ بر/ مطعم لا تتصلين عليه الا اذا كان فيه شي ضروري او دزي مسج الرياييل ما يحبون مرته أو حتى امه واخته يدقدقون عليهم لما يطلعون مع ربعهم، تدرون ليش؟ عندهم الي جذي كأنه دياية امه او يسمع كلام امه وقاعد تحت الحريم مو بس مع الزوجات حتى مع الام والاخت، يفكرون ان اذا اتصلوا عليهم جدام ربعهم انه ربعهم عبالهم ان هذا بعده ياهل او صغير يسألون عنه بالتلفون وينك وليش تأخرت

10 – بعض الرياييل دفاشة وخاصة عندنا بالخليج يعني لا تتوقعين مثلا بيعيشج بقصور من الرومانسية وبيسدحج كلام حلو " من طق الباب سمع الجواب " انتي بادري وانتي سوي وقولي ولا تقولين مليت وماكو فايدة جني اكلم طوفة صدقيني سوي هالحركات وقطعي بعدين اهو راح يستغرب ويجييج ويقولج شفيج متغيرة؟ يحس ان فيه شي مو مثل قبل

11- لما تتناجرون مع بعض على اشياء تافهة أو قوية الحل " بالتكشخ " وهذا الحل اعتقد وايد بنات يعرفونه بس انا كتبته حق الي تقراه اول مرة.. تبين ريلج يراضيج؟ تبينه ينقد على نفسه ليش تزاعلتوا؟ لبسي عدل ورشي هالعطر وحطيله احلى ميكب وقعدي سولفي مع عيالج او اتصلي على وحدة او شوفي تلفزيون او قلبي بالمجلة وكأن مافي شي صاير.. الريال يحب جذي كأنج مو مهتمة وهو بيقرب صوبج ويتناقش معاج

12- لما تنامون على السرير جربيها مرة وسويها وقولي له على يوم فلان بيقولج شنو؟
قوليله؟ عادي تقرب مني شوي ابي احط راسي على صدرك مادري احس خايفة >> انتي قوليها بطريقة ادب يعني كثري من " لو سحمت " "ممكن " ريلج بيستغرب ويقول شفيها نزل عليها الادب مرة وحدة؟ كلمية بنبرة انج محتاجته
وشوي وتبيجين واكيد اكيييييييييييييييييييييييد راح يقولج تعالي وحطي راسج على صدره ونامي وقولي بصوت حيل واطي:

مادري ليش لما اكون قريبة منك احس اني بأمان

13- بوسيه على " جبهته " لانها عين الرجل " الثالثة " وهالشي واي بنات ما يدرون عنه، خاصة لما يتعرض حق نكسة او مشاكل وبعز المشكلة توجهي صوبه وبوسي الجبهة مالته صدقيني بتشوفين العجب العجاب

14- مرات لما رايحين مشوار او رادين البيت من مشوار.. مطعم، مطار ، داوم قوليله: فلان بقولك شي بس مستحية وقعدي جذي 5 دقايق قولي مقدمات انج مو عارفة شلون تقولينله وخلج مرحة اهو اكيد ميت ويعرف شصاير
قوليله: اوكي بقولك بس بأذنك لان جذي احسن ويقولج يله قولي

قربي صوب اذنه وهو يسوق وقوليله: " ترا أنا أحبك "

وردي مكانج وعدلي قعدتج وشوف الدريشة برا وبعدين نزلي راسج كأنج مستحية…

15- الخلاصة الي ودي اوصلها لكل متزوجة ولكل مقبلة على الزواج انج لازم تخلين ريلج مثل " رفيجج "
مو احنا عندنا الرفيج حرام بالاسلام؟ انزين ليش ما تسوين هالشي بالحلال؟ لا تخلين علاقتج بزوجج على انه زوجج لما تخلينها على انه رفيج بتشوفين حلاوة لا صارت ولا استوت وريلج من نفسه راح يحبج ولا بيشوف وحدة ثانية
غيرج.. لا تقولين خلاص كبرنا وصارلي سنتين او 5 سنين واعدل شنو لا اسوي شنو وراحت علي
لا حبيبتي سويها وغيري حياتج من الحين..