كل وحدة تقول نصيحة مفيدة وحلوة حق اللي قربت تدش القفص الذهبي : )

السلام عليكم ورحمة الله وبركاته
شلونكم حبيباتي الحسناوات

وعسا الله يتقبل مننا الباقي من الشهر
ويبارك لنا في وقتنا

حبيباتي الحسناوات الحياة فيها مراحل متغيرة
يعني في يوم من الايام كنتي طفلة بيبي عنونة صغيرونة
وبعدين كبرتي وصرتي صغيرة ولكن تسوين نفسج كبيرة
وكبرتي وصرتي بنية حلوة
وكبرتي وصرتي ناضجة

وفجأة

تلقين نفسج مملوجة وعرسج قرب وما بقاله شي

صحيح ان الحياة الزوجية كلها اسرار ولازم هالاسرار تكون بين الزوجين وبسسسسسسسسسسسسسسس
وطريقة التعامل على قولت امي تقول كوني مثل ما انتي على طول , كوني طبيعية

ولكن

الحياة هذه راح تصير جديدة علي

و اكيد في اسرار في فن التعامل مع الزوج ومع هالحياة الجديدة

وانا ودي ااني افتح هالموضوع عشان الكل يستفيد

شنو اهم الخطوات والتصرفات اللي لا زم نسويها عشان نعيش احلى عيشة مع الزوج ونعيش احلى ايام واحلى اوقات وعلى طول
وشلون اخلي السعادة تعيش معانا على طووووووووووووووووووول

والله يخليكم
لا تقولولي نصايح مو حلوة وتعور القلب وتكسرون مجاديفي

لا

قولولي نصايح حلوة سمعتوها من حريم كبااااااااار
امثال
قصص
حكمة
حديث
آية

اي شي حلو
ورجاءا ابتعدو عن النكد والحنة والاحباط

قولولي شي يشرح الصدر

ويعطيكم العافية حبيباتي الحسناوات
واتمنى انني اقرا اكبر عدد من الردود

اختكم

ام الخدود النظيفة

نصيحتي يا ام خدود ورديه

انج اتكبرين مخج
واللي تسمعينه طوفيه

نصيحتي حق اللي بتدش الفقص الذهبي

لاتدشيييييييييييينه
تلاحقي عمرج

اهم شي الاحترام وبعدين مو كل وحدة تسترسل بالكلام وتخر اللي اكو و اللي ما كو يعني بالعربي مو كل شي ينقال وعدم افشاء ما يدور بين الزوجين يعني مو كل صغيرة و كبيرة اروح اقول حق اهلي خليهم ذخر لج حق المصايب العودة لا قدر الله بعدين الريال ما يحب المرة الزعولة يحب الوحدة تكون شقردية

لووووووووووول حده احبااااااط

شلون يعني ماا نتزوج ؟؟

الله يوفقج ان شاءالله

عجبتني نصيحة امج (( كوني على طبيعتج ))

وحطي في بالج مو تسوين مثل بعض البنات من أول ما يتزوجون يبون يعودون رياييلهم على كيت وكيت وكيت

يعني مثل ما انتي لج شخصيتج وما ترضين احد يتحكم فيج أخو ريال وعنده شخصيته وكيانه فلازم يكون تعاملج وياه على هالأساس

ونصيييييييييييييييييييحه أسرار أهلج لا تييبين طاريهم عند ريلج
يعني لي سأل شلون أهلج قولي الحمدلله بخير وبس لا تقولين له والله اليوم صارت المشكله الفلانيه ببيت أهلي ولا صار وصار خلي سوالفج عن بيت أهلج كلها بحدووووود ودايما خليهم كبار بعين ريلج

ولا تسولفين عن رفيجاتج جدام ريلج بتات

وبس أترك المجال حق نصايح خواتنا ما يقصرون أن شاءالله

ام بدوووووووووور
لووووووووووووووول
بدعتي
قمة الاحباط

الله يبارك لكل من بتدش ها القفص

اول نصيحه مجربه الاستخااااره طبعا.

و ثاني شي الدعاء بالتوفيق…

لرميتي حمولج على الله ترضين بالي تلاقينه و ربي يقر عينج

مع الريل …شوفي ،كل واحد سواء انتي او هو داش و هو خايف من طبع معين سامع عنه او شايفه ببيت اهله….القرب منه يعتبر نقطة نظااااام.و توتر اعصاااااب

اذا كنتي ذكيه…بسرعه تلقطين هو شنو خايف منه و ما تسوينه …
عالاقل في البدايه لين يرتاح لج و يعرف اولج و تاليج…عقب عادي

اذا ماشاف فيج مخاوفه مثل ما تقولين تقر عينه فيج و يحس انه واااايد توفق معاج…

و عقب خلاص ها المخاوف مالها قيمه لو تسوين ها الشي ما يعترض.

مثلا اهو بادي حياته معاج و بباله انا الريال ما تروح و لا تجي الا بأمري.>>>و على فكره هذا حقه شرعا

تجي المره السنعه ببالها بعلمه على ان طلعاتي بكيفي…و تشتعل الحرووووب.

لكن الذكيه توافقه على الي يبيه مع الوقت راح ترتاح و هو يعطيها صلاحيات اكثر اذا الوضع ماصار فيه شد اعصاب…

و مثل ماقالت سبائك اسرار اهلج ببيت اهلج…و ازيد عليها اسرار بيتج ببيتج…..

و آخر و احلى نصيحه الابتساااامه…..

شراحه النفس مفعولها مثل السحر سواء مع الزوج و الا غيره لكن مع الزوج اولى….
((اذا نظر اليها سرته:….و اذا امرها اطاعته …و اذا غاب عنها حفظته في نفسها و ماله)

على فكره لا تخلين تقرين وايد عن حقوقه عليج….اذا حرصتي توفينه حقوقه اوتوماتيك راح يحرص على حقوقج و زياده….لكن اذا صارت لغة الحوار حقي و عطني تصير الحياة ثقيلة طينه.

و اقري وايد وايد عن التعامل بين الزوجين في فتره الخطبه لأن بعد الزواج يصير التطبيق عملي فتمر عليج مواقف اذا ماعندج خلفيه للتعامل السليم معاها ممكن رده فعلج التلقائيه تخرب من باب تظنين انها صح.

و المراجع مشالله متوفره…أول و أهم شي الاحاديث و التوجيهات النبويه.

و الحقوق الشرعيه

و اصدارات جاسم المطوع>>>>>>روووووعه اقولج عن تجربه

و في اشرطه حق مشايخ وايد عن الحياة الزوجيه سمعي كثر ما تقدرين و خلج مثل النحله تاخذين الزين من الكلام

وي كنت بمشي بس ذكرت جم نصيحه نفعوني وايد…..في البدايه خل انقلها لج

لا تنامين و انتو متزااااعلين ابدا ابدا…

مو شرط تعتذرين….
في طرق وايد تخلينه يكلمج و اهو البادي بدون اعتذارات يطيح الحطب.

بنظره بابتسامه بسؤال الخ الخ الخ.

و استانسي معاه….استاااانسي قد ماتقدرين في البدايه
باجر اذا وصلوا الواع و الويع بيربطونكم

و عسى الله يوفق الكل للسعاده بالدنيا و الآخره.

لا تصيرين حنه ورنه
واذا طلبتي شي منه طلبي مره وحده وبس
ترى الحنه والقرقه اتطفش الريال

البنات الحسناوات ما قصروا بالكلام الحلو
اهم شي حبيبتي لازم تعرفين ان البنت مو كل يوم لها ريل ,,,,, يعني لازم تتحملين ريلج
وما تزعلين على ادنات الدون
يعني دلع بيت الاهل ودلالهم خليه على كتر شوي
نرى ما اخرعكم بس الحياة يبيلها طولة بال
ولازم بعد تعرفين انج تتعاملين مع طفل كبير ! لا تستغربين لان الريال اخس من الياهل
الله يهنيكم كلكم

1- عوديه على طبعج.
2- طوفي اللي يقوله ولا اتدققين على كل شي ترا عقب الزواج بتكتشفين اشياء وايد بشخصيته .
3- مو كل شي ينقاله.
4- الله يوفقج

اهم نصيحه ..

اذا زعل او زعلتي غلط او غلطتي .. لا تحطين راسج عالمخده الا متصافين حتى لو انتي بادرتي واهوا الغلطاااان ……….. اهم شي … والبنات كفو ووفو

اهم نصيحه ..

اذا زعل او زعلتي غلط او غلطتي .. لا تحطين راسج عالمخده الا متصافين حتى لو انتي بادرتي واهوا الغلطاااان ……….. اهم شي … والبنات كفو ووفو

الله يوفقج

up

up

up