عملية تجميل أنفي عند د. منذر العجمي

السلااااااااام علييييكم أحلى كويتيات

اليوم يايه أنقل تجربتي بتجميل الأنف لأنه عمليتي كانت أمس (توها حدها فرش)

انشالله بيكون موضوعي متجدد و بخليكم معاي أول بأول وبس خل يعدي شوية وقت بنزل صوري قبل وبعد التجميل حق أي وحده تفكر تسوي وأتمنى تكون نتيجة العمليه مثل ما أتمنى يااااااااااااااااااااااااا رب

بس رجاءا اللي تبي تستفيد حياها الله واللي بتقعد تعلق تعليقات مادري شلون صايره فمن الأول قاعده أقول ترى سائله بالدين واللي عندها أي تعليق من هالنوع ماله داعي تدش على موضوعي وفي أقسام خاصه بهالشي …

هيا بنا وتعالوا قربوا خل أقولكم شصاااااااااااار

أول شي قبل لا أقول شصار شكر خاص جدا لكلا من (ماركيه وكشخيه…حبة شوكولاته…وتفاحه 333) لأنهم صج ماقصروا معاي باستفساراتي قبل العمليه وعسى ربي يوفقهم بكل اللي يتمنونه

نرجع لموضوعنا…انا فكرة تجميل خشمي كانت براسي من دشيت الجامعه بس محد كان مشجعني و أهلي مو راضيين فتأجل الموضوع سنين لي الحين عقب ماتخرجت بسنتين قدرت وسويت اللي براسي أخيييييييييييييييييييرا و أقنعت أهلي

أول شي بحثت واااااايد عن دكتور شاطر ليما طحت بمنتدانا الغالي على تجارب الخوات عند د. منذر العجمي وحتى رفيجة أختي واااااااايد تمدحه وتعالج عنده الجيوب فتوكلت على الله وحجزت موعد ورحتله…

فعلا دكتور محترم وباله طوييييييييييل ويجاوب على كل الأسئله بدون لا يتملل أو يحسسج إنه مستعيل ووراه مواعيد بالعكس عطاني حقي وزياده… بالبدايه انا مشكلة خشمي كان انه كان مدور بالثلث الأخير أحسه كبير خصوصا إنه عظمته من فوق ضعيفه وحلوه فكان الثلث الأخير مخرب شكله وفعلا قالي بنضعف شوي من تحت ونصغر الأرنبه وعندي بروز بسيييييييط من فوق قال راح أبردلج إياه عشان يصير سييده وبيرفعه نتوفه (انا ماكنت راضيه يرفعه) بس أقنعني انه بيكون شي لا يذكر بس خفيييفه بيكون أحلى وقلت أوكي بس أكدت عليه اني أبيه طبيييعيييي مابي أصير مايكل جاكسون !!! قالي انتي أصلا ماراح تحتاجين شغل وايد و أصلا انا بشرتي دهنيه وسميكه فقالي بتكون نسبة التغيير 40-50% وهالنسبه واااايد كافيه حقي …
عاد انا ماصدقت قلتله خلاص بطلع أحدد موعد العمليه (حدي قويه) جان يقولي لأ لاتقررين شي الحين ردي البيت وفكري عدل بعدين قرري واذا نويتي خلاص سوي هالتحاليل وصوري بفوتوكينا قوليلهم حق د. منذر بيعرفون ويبي الصور ويحددونلج موعد العمليه (وبيني وبينكم هالشي طمني منه زياده) ماحسيته من الدكاتره الماديين اللي بس همهم الفلوس ويلا حجزي وكل شي بسرعه بسرعه حسيت من هالموقف الثقه بدت تزيد بهالدكتور وفعلا خذيت وقتي وفكرت واستخرت والحمدلله ارتحت ونوييييييت

وفعلا سويت التحاليل وصورت ورحت للدكتور شفته قبل لا آخذ الموعد وهم ذبحته أسئله وتحدد موعد العمليه الثلاثاء 2710

دفعت 800 دينار بالعياده والسكرتيره عطتني ورقة الدخول للمستشفى (اهو يخير بين الهادي والسلام بس انا اخترت الهادي) وخذيت أصل التحاليل اللي سويتها لأنه ضروريه حق دكتور التخدير.

وفعلا رحت أمس الساعه 12 وانا عمليتي الساعه 1 وسويت الدخول ودفعت 300 دينار للمستفى ردولي منهم وانا طالعه وصعدت الغرفه خذوا وزني وقاسولي الضغط وحرارتي وياني دكتور التخدير قعد يسأل اذا فيني ربو أو آخذ أدويه بصوره منتظمه أو فيني حساسيه من دوا أو أكل وعقب ماجاوبت على أسئلته حط السماعه يجيك على التنفس عندي عشان التخدير ليما اتطمن وقالي ممتاز نشوفج تحت انشالله (انا شفت السالفه صارت صج ومت من الخرعه مابقت آيه ولا دعاء ما قلته ) اختي تقولي دامج مو قد الشي شكو يايه ومسويه شجاعه لووووول

المهم نزلت غرفة العمليات وانا طول الطريج بس أدعي و أقرى قرآن ليما دخلت كنت واااايد متوتره ياني دكتور التخدير قلتله أبي كمام مابي ابره جان يقولي اذا تحملتي ريحته الابره أحسن قلتله لا مابي اذا بتركبونلي ابر بليز تكون عقب ما أتخدر عشان ما أحس بشي، وفعلا لما شاف ايدي قالي الأورده عندج مشكله فعلا الكمام أحسن وياني دكتور منذر وطمني وتشهدت وحطولي الكمام وعقب ماحطوا جان أتذكر و أحرك إيدي دكتور عفيه عزكم الله مابي أرجع عقب العمليه (لووول تعقدت من المنتدى) جان يقولي ماتخافيش بنعطيج أدويه عشان ماترجعين وفعلا نفس ورا الثاني وراه الثالث قامت الأصوات شوي شوي تصير أبعد وجسمي خدر وصار ثقيل ليما وعيت بغرفة الإفاقه والسستر تناديني باسمي انه خلااااص عمليه فنش وانا مو قادره أفتح عيني غصب أشوف الساعه بالطوفه جدامي ولا 2:50 يعني صارلي قريب الساعتين إلا ربع بس من أحاول أفتح عيني أحس بعواااار مكان العمليه اللي تقولي فيه عوار أقولها ايييي جان تحطلي إبرة مسكن بالدرب الدواا كان حار عوار بخشمي وبإيدي وشوي وياني دكتور التخدير يقولي الحمدلله على السلامه وانا أقوله دكتور أحس بعوار جان يقول للمرضه تعطيني مسكن بعد نفس أول إبره وهم عورتني بس ربع ساعه تقريبا وخف العوار ليما اختفى الحمدلله وظليت بالإفاقه ليما تطمنوا علي وصعدوني غرفتي بس كنت وااااااااااااااايد داااااااااااايخه مفعول التخدير ظل مدوخني لي بالليل ويابولي آيس كريم وجلي وروب كليت نتفه بالغصب وبس وخشمي طبعا عليه جبيره ومن تحت صوب الفتحات حاطينلي شاش عشان النزيف لأنه دكتور منذر مايحط فتايل وقعدت لي بالليل ومشيت من المستشفى عقب ما تطمنوا علي على الساعه 11 أو 11:30 تقريبا ورديت البيت حاولت أنام بس مو قادره لأنه خشمي مسكر ورافعه المخدات عشان ترفع جسمي شوي وراسي يكون مرتفع عشان ما أختنق فالنومه حدها مو شي وكله خايفه لا أتقلب واحوش خشمي فكل شوي قاعده والتنفس من حلجي مشكله لأنه أحس شفايفي وبلاعيمي يصيرون ناشفين وبلاعيمي تعورني بس عدت بسلام والشوي اللي كنت أغفيهم الحمدلله هم ريحوني نوعا ما… بس ماشالله الحمدلله عقب العمليه مارجعت والحمدلله ماكو زراق تحت عيني

وأمس واليوم لما شلت الشاش اللي صوب الفتحات عشان أرش بخاخ كتبلي إياه الدكتور مع حبوب مضاد حيوي لمدة 5 أيام و بندول مسكن اذا حسيت بعوار بس لا شلت الشاش شفت خشمي مشدود ومرفوع والمسافه اللي بينه وبين برطمي اللي فوق كبيره شوي ووارمه شكلي صايره جني مخلوق غريب بس اهو قالي هذا شي طبيعي بس ماشالله يبين قصته حلوه ادعوووووولييييييي يطلع حلوووووو

وبس اليوم ثاني يوم والحدلله مافي عوار بس من وقت للثاني شوي الغرز يغزون ماما تقولي هذا معناته انه الجرح قاعد يلتئم وطبعا ممنوع آكل شي يابس أو لحم أو شي يحتاج مضغ بقوه و النزيف واايد خف عن أمس بس ليلحين شوي قاعد ينزل دم..

وانشالله موعدي السبوع الياي حق شيلت الغرز والجبيره والله يستر لأني وااااااااااااايد قاعده أحاتي وخايفه شيلتهم تعورني بس انشالله خير

وهذي تجربتي لي اليوم وانشالله بقولكم كل التطورات ليما خشمي تبين ملامحه و أنزلكم الصور قبل و بعد أتمنى أكون نقلت التفاصيل واضحه واللي عندها أي سؤال حياها الله من عيووووونييييي

وطلب أخير أتمنى اللي تدش موضوعي تدعي لأبوي حبيب قلبي بالرحمه والمغفره وجنات النعيم وتدعيلي ربي يحفظلي أمي الغاليه و أهلي و أطيب بسرعه وتطلع نتيجة عمليتي أحلى من ما أتمنى

يا بعد عمري انشالله يطلع خشمج احلى من خشم اليسا وهيفا قولي امين والحمدلله على سلامتج وما تشوفين شر .
انا بعد حطيت موعد حق العمليه بس ليش يبي ياخذ مني 1100 دك قلت بنفسي جنه وايد ما خذا من البنات هالكثر وانا وين ما راح اعابل بخشمي وايد يعني كلها تعديلات بسيطه بيسويلي ياها وهذا غير فلوس المستشفى يالله بعد شنسوي ..
حبيبتي انتي بأي مستشفى سويتيها ؟
ومشكور
الله يرحم ابوج ويسكنه الجنه يارب ويطول بعمر والدتج انشااااااااااالله يا رب ويخليها لج

الحمدالله على سلاامتج ياقلبي

وان شاءالله يطلع خشمج مثل ماتبين يارب

وتبين نصييحتي حييلج بالمره نقعي المره بماي وبعدها حطي بشاش وشمي راح تلتام العمليه بسرعه وحتى الزراق اللي دار مدار عينج بخف وااااااايد واذا تقدرين شربي شوي من المره نصييييييييييييييييييييييييييحه انا خواتي ثنتين مسوين ورفيجتي

——————————————————————————–

الحمدالله على سلاامتج ياقلبي

والله يرحم ابووج ويغفرله

آآآآآآآآآآآآآآآآآآآآميييييييييييييييييييييييييييين والله يسلمج مشكوووووره حبيبتي على الدعوه الحلوه

عادي تقدرين تسإلينه انه ليش وشنو الشغل اللي بتسويه عشان تعرفين ليش رافع السعر !!! وانا سويت عمليتي بمستشفى هادي…
وتوكلي على الله وانشالله بتطلعين تهبليييين وربي يقومج بالسلامه انشالله طمنينا عليج لي خلصتي عمليتج

الله يسلمج حبيبتي و آآآآآآآميييين ربي يسمع منج ومشكووووره على النصييييحه انا فعلا وايد سمعت عن فوايد المره بس انا الدكتور قالي لاتخلين الماي يحوش خشمج هالفتره فانشالله بس أشيل الغرز بجرب المره وثاااااانكس مره ثانيه

حبيبتي والله مشكوووره وتسلمين على هالدعوه والله يسلمج من كل شر

ياحياتي حمدلله على سلامتج وماتشوفين شر .. وان شاءالله يارب يطلع خشمج حلوو ..

تدرين انا منقهرة من دكتور عبدالمحسن حسبي الله عليه العام سويت خشمي عندة ..

لان فيني انحرااف مسار الحاجز الانفي وفيني ضيق تنفس يعني مااقدر اتنفس عدل وانتفاخ بالغضروف الايمن ..؟؟

تدرين شسواا فيني طبعاا اول الايام كان خشمي حلو وماعلية .. بس بعدهااا اخترب الله وكيلج اخترب ؟؟

صرت ما اتنفس عدل للحين فيني الانحراف والغضروف للحينه منتفخ ماعدلة ؟؟ ولما قلته ليش جذي يادكتور قالي غضروفج جذي ؟؟

وقالي يبيلج عملية مرة ثانية ؟؟ شووفي النصب يبي فلوووس مرة ثانية .. مو اناا قاعدة على بنك وحقل تجارب عندة ..

اي وصح بعد تخيلي الاثااار الي صوب الخشم للحينه ماراح ؟؟ بالذمة مو دكتور فاشل ؟؟

تكفييييييين دكتور منذر شااطر ؟؟ واهو متخصص بالانف والاذن والحنجرة ولا لااا ..؟؟

الحمد لله على السلامة ومبروك عليج الخشششوم اليديد

انا ناوية على خشمي قريبا انشاء الله بس كلامج عن التخدير موتني من الخوف بليز قوليلي تعذبتي في التخدير حسيتي ان روحج بتطلع -بسم الله عليج – بس انا احس ان التخدير يخليج تحسين بهالاحساس

الحمد الله على سلامتج حبيبتي ,, وجدامج مشوااار طويييييييييييييييييييييييييييل

يعني لين فجيتي الجبيره مو تقولين هاذا خشمي,, خشمج مابيبين لي عقب ست اشهر او سنه خصوصا الارنبه وايد اطول.. وباقوولج والله العظيم اللزقات اللي بعد الجبيره وايد مفيده ,,شوفي انا لي تجارب واعرف عدل,, وخصوصا وقت النوم,, تره انا كنت احطهم لمدة شهرين حتى وانا اطلع,, خصوصاا اذا خشمج جلدته متينه ,, مثلي يعني,, تره وااااايد مفييدين واي سؤال انا حاظره,, ولاتحطين بالج وبال خشمج,, من الحين اقولج,, يوم بتشوفينه صغير ويوم منتفخ كانه خشم مهرج,., هاذي عادي وطبيعي حبيبتي ,, لاتقولين خشمج طلعت نتيجته الا بعد سنه من تاريخ العمليه,,(( الله يحينا))

الحمدلله عالسلامه …

ودي اشوف النتيجه

الف الحمدالله على سلامتج يارررب
ويغفر للوالد ويرحمة برحمتة ويحفظلج الوالدة ويخليج لهاا اميييييييين

واافينا بكل مااهو جدييييييييد

الحمد لله على سلااااااااامتج : )

ان شاء الله تشوفين خشمج مثل ماتبين حلو واينن

لوووووووووول الله يسلمج حبيبتي ولاتحاتين يالخواااافه بالعكس مجرد خدار بعدين تفتحين عينج وانتي بالإفاقه وشوية دوخه عقب وبس وتعدي على خير بس لأني أموت خوف من الإبر فاخترت الكمام وحتى الدكتور لما شاف إيدي قال الكمام يصلحلج أكثر لأنه أوردتي ضعيفه وبس نفسين ولا ثلاث وجنج نمتي ساعتين وتقومين سهاااااله لاتحاتين

الله يسلمج حبيبتي مشكوووره و ايييي الكل يقولي جذي بس انا شوي متأزمه من التنفس وشكل خشمي وايد مرفوع ومشدود بس الدكتور قالي هذا طبيعي بعد العمليه وراح ينزل بس ودي أعرف متى بينزل وأقدر أطلع؟؟؟؟
وانا الدكتور قالي الجبيره واللزقه بس اسبوعين بس انا مثلج أحس لو تطول خصوصا وقت النوم أضمن عشان تمسك الخشم ويكون ثابت فانشالله من أروحله الاسبوع الياي حق شيلة الغرز والجبيره بقوله اني أبي اللزقات… وانشالله يا رب يطلع حلو

الله يسلمج وانشالله بخليكم تشوفون النتيجه بس تو الناس خل يبين شكله شوي وبنزل الصور انشالله

الله يسلمج يا قلبي وتسلمين على هالدعوه الحلوه يالغاليه ويحفظلج أهلج يااا رب

وانشالله بنقل التطورات أول باول

مشكووووووره حبيبتي ربي يسمع منج والله يسلمج يالغاليه

آآآآآآآآآآه صدااااع اهئ اهئ بقوم آخذ مسكن وبسكر الكمبيوتر حاسه بصداع شوي واليوم خدي اليسار شوي وارم جني شالعه ضرس بس هم الحمدلله شي بسيط مو وايد…انا بقوم أرتاح شوي وانشالله للحديث بقيه

ياقلبي انتي موو تحطين ماي المره على خشمج لااا حطي شوي بشااش عرفتي وبس قربيه صووب خشمج وشمي يعني ماراح يحووشه مااي وشووفي النتيجه

ويالله نبي نشووف الخشم عاااد ههههههه

اي وترى مايبين عدل الا بعد 6شهوور ان شاءالله ولا تلبسين نظااارة لي مدة 6 شهووور

ومااتشوووفين شر يااقلبي انتي

حياتي والله أم الفهد مشكووره انا مادري عبالي أمسح على خشمي مو بس أقربه
وانشاااااااالله من عنوني الثنتين بتشوفونه بس لما انا أشوفه بالأول هههههههه

تسلمين يا قلبي الشر مااييج انشالله