|
|
[COLOR="Purple"][/COLOR]السلام عليكم
شلونكم كويتيات
بصراحه هالموضوع حيل حيوي واتمنى الكل يتفاعل معانا
عشان نفيد ونستفيد
بقول تجربتي واترك لكم المجال
انا متزوجه من سنتين ونص وعندي ولد واحد
حياتي الزوجيه كأي حياة زوجية فيها صعدات وفيها نزلات
وعلى فكرة زواجي كان زواج حب
والحمدالله الحب صار اكبر بعد الزواج بس المشكله ان زوجي انسان عصبي ويستخدم ايده باقل مشكله
اول طراق خذيته كنت عروس توني بشهر العسل
والثاني كان وانا حامل
ومن بعدها قام يزيد الجرعه والى الان ماوقفت
وللامانه ماافكر بالطلاق
اولا لانه مو زوج سيء بالعكس له حسنات وايد تذكر ويحبني ويبي رضاي
ثانيا لان ولدي مابيه يضيع
ثالثا لاني جربت اني الجأ حق أهلي ومااستفدت غير اني بهدلت نفسي واهلي خذوا موقف من ريلي
المصيبه ان ريلي ما يتاسف
وهالشي يذبح
فيدوني لو انتو مكاني شتسوون؟؟
مع العلم ان الطلاق واللجوء للاهل مو حل
ومع العلم ان انسان طيب وحبيب وحنووووووون حيل ويقصر على نفسه بس مايقصر علي انا وولده
ابي حل اححسسه بغلطه بذكاااااااء
ابي اكسر قلبه بهدوء
بدون مااهد البيت وابهدل نفسي
وسووووري طولت عليكم[/center]
المفروض من اول طراق توقفينه عند حده علشان ما يتمرد عليج
ليش تذلين نفسج له !!
والله امركم عجيب
يالله فيدونا يا بنات
ذكرينه بالشرع عالاقل ..
مجرد رفعة الايد تفتح له بيبان جهنم فما بالج اذا الواحد تعود على هالشي ..
كل شي له حدوده وانتي تبين نصايحنا ..
نصيحتي لج تقعدين معاه تتناقشين بكل هدوء وتبينين له انه راح ينعكس بشكل سلبي عاليهال باجر ..
مع الايام الحب راح يموت اذا تعود على هالشغله ..
الله يهديه ويسهل امورج قلبي ^_^ ..
وهذا انتي قلتي انه انسان طيب وحنون ويبي رضاج تحملي اجلي
ادعي تالي الليل انه الله يسخره لج ويهديه مادام انج تبينه
وانا مع ام حيدور بالكلام
هل تكونين انتي السبب؟؟؟ او يكون من روحه مضايق ويحط الحره فيج ؟؟؟
مفروض من اول طراق توقفينه عند حده
عروس وطاقج
حامل وطاقج
ياختي الله يهديه شتسوين بعد
ادعي ربج يهديه وكلميه وقولي له مايجوز اللي تسويه
والطق هذا بيزيد اذا ماحطيتي له حد
الله يسخره لج ويهديه ياعمري
شنو يطق وحنون
انا اقوول هدديه قوليله خلاص كل شي وله حد قوليله المره اليايه منت شايفني قبالك وعطيه ظهرج ومهما ناداج لا تردين عليه علشان يعرف شكثر انتي معصبه وطفح الكييل قوليله انا عند اهلي ما فكروو يلمسوون شعره مني هالمره اطلع منهم علشان اتبهذل
هي الي عطته الفر سه لتمادي بالطق
و اللي قاعد يسويه باجر عيالكم يكبرون و يفهمون و راح يتعقدون هل يقبل ان عياله يكرهونه؟
هل يقبل ان عياله يشوفون امهم ما لها كرامة؟ البنات راح يكرهون الرياييل و اولادكم راح يذلون خواتهم يعني راح يسبب خلل في العائلة بسبب تصرفاته .. قوليله ياما في رياييل طقوا حريمهم طراق طاحت المره على الارض عباله تمثل او تتدلع طلعت ما فيها حياه و من قوة ايده سبب لها ارتجاج بالمخ و ماتت في مكانها اسم الله عليج ان شاء الله … ايد الريال ثقيله قوليله اهوا عباله عادي بس قوليله ان راسج يدور و نظرج يتزغلل بسبب طقته و ان ممكن يسبب لج عاهة هل يطاوعه قلبه على هالشي؟؟؟؟ الزوج سكن و راحة و حمايه اما الزوج اللي يطق فمع الوقت راح تكره زوجته و يصير ما له قيمة في قلبها
بعدين انتي مو ياهل عشان يطقج و اهوا مو بالروضة عشان كل شي عنده بالايد فيه شي اسمه تفاهم بين الكبار فيه شي مضايقة ينثبر و يقول و ما بصير خاطره الا طيب بصراحة و من غير زعل بط جبدي ريلج و مو هاين علي انج تنطقين الرسول صلى الله عليه و على اله و صحبه و سلم قال بما معناه ان النساء مثل الزجاج رقيقين و لازم الرجل يعاملها بالرفق
الله يهديه و يصلحه يا رب