|
|
السام عليكم شلونكم شخباركم ؟؟
انا ودي افضفض لكم عن اللي بقلبي لان الصراحة هذا المنتدى امسليني امخليني اضيغ وقتي معاكم انا توني متزوجة صار لي سنة انا و زوجي كبر بعض لمن تزوجنا 22 اهو ولد وحيد عايش بين 4 بنات خواته 3 اكبر منه متزوجات عنده اللي اصغر منه مو متزوجة طبعا لمن تقدم لي حطيت شروط حالي حال اي بنت وشرطي ان يكون لي سكن خاص فيني طبعا هذا انكتب بالعقد بس انا سكنت مع امه واخته نظرا لظروفهم قلت حرام بروحهم بالبيت ماعندهم ريال طبعا فترة الملجة كانت تصير بينا خلافات عادية وكانت تعدي على خير بس تخيلو شهرين بعد الزواج صارت مشكلة واهو اللي كبرها وراح قال حق امه وامه قالت حق اهلي يعني صارت سالفة وامه تهدد بعد مع ويها تقول هذي اخر مرة اخذ بنتج جذي نقول حق امي وزوجي الله يهديه ولد امه على قولتهم كل شي يقول لها وجم مرة كنت اقول له مايصير تقول عيب هذي اسرار زوجية يقول امي كل شي اقول لها تخيلوو بنات ثاني يوم العرس كنا بالفندق الصبح دق على امه قال لها كل شي صار بينا انا انصدمت قلت انا بنت ما قلت حق امي المهم رديت له وانا وياه متفقين اول سنة زواج مانبي يهال حتى اهو يقول ما ابي يهال الحين وطبعا امه ماتدري كل شهر لمن تدري ان علي الدروة تقول لي بس تغتلسين روحي الطبيب مع امج شوفي ليش انتي مو حامل كنت اقول انشاءالله لمن اهي ترست راسه وقالي سمعتي امي شنو تقول تبي تشوف عيالي قلت له انشاءالله بعدها قالي لج ملهة شهرين تحملين اذا ما حملتي شوفي لج حل بنات يعني شنو اشتري من الجمعية فوق كل هذا اهو كل ويك اند كان يروح البحرين مع ربعه وامه تقول ولدي يخاف الله اهو حتى صلاة ما يصلي ولا كان يصوم وفوق هذا كان يتعرف لي بخرابيطه وصار فيني التهابات والسبب اهو وخرابيطه ما كان يطلعني ولا يصرف علي وما خلاني اكمل تعليمي ولا شي امقعدني بالبيت لان اخته قالت له نبي نشوف عيالك بعدين خلها تكمل وكل وحده من خواته تشتغل وعندها سيارة وايد كانو يغارون مني اهمه بطات وانا ضعيفة دايما كان يقول لي انا اموت بجسمج جذي حلو لا تمتنين اسمع كلامه شي وافعاله شي ثاني الحين انا من شهر 2 عند اهلي اهو يابني وقال حق اهلي ما ابيها عشان يبي يراضي امه وانا والله ماسويت لها شي كنت اخدمها اكثر من امي بعد هذي جزاتي ولمن اهلي راحو اييبون اغراضي ولا امه حاطه كل اغراضي بجيس تكرمون زبالة ويابقين اغراضي جوازي وذهبي وملابسي وااايد شغلات حسبي الله عليهم طبعا الحين انا وياه بينا قضايا ومحاكم بنات ادعووو لي اطلق باسرع وقت لان مليت زهقت الحمدالله على كل حال ان ما حملت هذي خيرة ولا جان توهقت ولدها طلع راعي خرابيط وعديم المسؤولية اي شي امه تقول يقول لها انشاءالله تخيلو لمن نصعد فوق ادق عليه تقول له نايم يقول لا تقول له لا تسهر نام ومرات كان يقول لها ظهري يعورني الوقحة تدرون شنو كانت تقول لي تقول انتي نشفتي ظهر ولدي بسج كله يقول ظهري يعورني واهو اصلا ما يفرب صوبي يطلع مع ربعه بس يرد البيت ينام جنه فندق والله كل شي كنت البس له اسوي له بس كان يقول تعبان ابي انام اقول ميخالف كنت اقعد بروحي ابجي لمن انام واهلي ما كانو يدرون بشي عبالهم انا مستانسة حتى اهلي مو كل اسبوع كان يوديني لهم يعني على مزاجه فوق كل هذا كنت اسكت ولا يصرف وجم مرة طحت عليه عنده بنات وخرابيط بنات الله يخليكم ادعو لي اطلللللق باسرع وقت ادري طولت عليكم وعورت راسكم بالقرقة بس شنو اسوي من القهر ابي افضفض
انا قريت اول شي كنت بقولج تطلقي ويع شل عيشه !!
احسن الشي الطلاق والله
اكره ما عندي يكون الريال ولد امم
الله يعوضج حبيبتي
و نشالله تطلقين بسعره
زين سويتي ما حملتي
لانه اللي مايخاف من ربه راح يخاف من بشر !!!! اكيد لا
وقولي الحمدلله على كل حال … وان شاء الله ربي بيعوضج بلي احسن منه وان شاء الله بتطلقين وانسيه من حياتج
ولا تكدرين نفسج عليه لانه لو كنتي يبتي منه ياهل راح يذكرج بريلج كل يوم
وصبري ان الله مع الصابرين وعسى الله يسهل امورج
انشالله تطلقييين وتفتكين
والله يعوضج بواحد زين
افتكي
الخلاصة لا احد يخطب لولده واهو صغيروطايش ومو مال مصرف وبيت ومسوؤلية ولا فوق هذا لا يصلي ولا عنده وازع ديني
وانتي كان لازم تلاحظين صلاته واخلاقه من الملجة جان تحريتوا وسالتوا جيرانه ومعارفه قبل لا تتوهقون بهالعايلة العجيبة بعد عيب الام تعرف ش يدور بليلة الدخلة وسوالف الزوجين وخصوصياتهم الاسلام حرم هالشي ما يجوز بس اكيد معارفهم ملاحظين تصرفات الام بس انتوا ما لاحظتوا دشوا عليكم بنفس حلوة واستعجلتوا الزواج
خيرة رب العالمين ولازم تحمدين ربج علي كل حال
انشالله يطلقج ويجيج واحد يعرف قيمتج ولا شالعايله بس مااقول الا حسبي الله ونعم الوكيل على كل ضالم
وليش موراضي يطلق حضرته ؟؟؟ خلي احد من اهلج يدق عليه ويواعده بالمحكمه ويهدده اذا ماجا يويله
الله يعوضج عنه يارب بالزوج الصالح ويعطيج ع قد نيتج
باجر يكبر يعرف غلطته
ان شالله تتزوجين احسن منه ولا تكرين تردين له مدام امه هذي