رساله لمن يهمة الامر ()

انت سني ولا شيعي
انت قبلي ولا حضري
انت لبرالي ولا سلفي

كنا ولا زلنا نجلس و نخالط البدوي و الحضري و السني و الشيعي و اللبرالي و السلفي كلنا بقلب واحد و ننجز عمل واحد بالمدرسة ، بالكلية ، بالدوام ، بالديوانية ، بالجيره ، بالافراح و الأحزان

وان بننشد عن أحد قلنا بنت منو و ولد منو !

والحين تغيرنا باسم العنصرية !

يوم ٢-٨-٩٠ كلنا وقفنا بيد وحده استشهد الشيعي والسني ، الحضري والبدوي ، اللبرالي والسلفي وكلهم من أجل تراب الكويت

ورجعنا أيد وحده متماسكة يوم تهديدات بالغزو على الكويت للمره الثانية والصواريخ اللي انرسلت علينا وأكبرهم اللي ضرب جسر سوق شرق
وقتها حماة الكويت صفوا صفة وحده بأيد متماسكة مترابطة كانوا سور الكويت حاميها وما سألوا انت من و من ! وقفوا وقفة رجاجيل وقالوا اعمارنا فدى الكويت

وبوقت حزنا ،، بوفاة أبونا جابر وأبونا سعد وقفنا كلنا بصفة وحده نعزي برحيل أبوهاتنا

ومو بس بوقت شدتنا وأحزانا تماسكنا حتى بوقت فرحتنا ما تخلينا ظلينا بقلوب وحده تحمل فرحتنا

لكن للأسف في من قاعد يفرقنا
من قاعد يغرس فينا الكره
يغرس روح العنصرية اللي أبد ما كان عندنا ياه
والمشكلة ان يحذرونا من اخوانا وأهلنا !! من متى تحذر الأخ من أخته و الاخت من اخوها !

أبد والله شاهد علي ما عندنا تفرقة

أنا سنية و مناسبين شيعه
انا حضرية وعيال خالتي بدو
أنا لا لبرالية ولا سلفية
أنا مسلمة كويتية

أنا درست و خالطت كل الناس ( كويتيين و غير كويتيين )

حتى لما خالطت المسيح مافرقت اني مسلمة وإهي مسيحية دام ما تعدت على ديني ولا أنا تعديت على دينها

فهموها يا ناس احنا مسلمين و الاسلام يسر دين تسامح ماهو دين الارهاب !

رسالتي هذي للشباب

يوم كنا صغار علمونا ان نسمع كلام الكبار لأنهم يعرفون مصلحتنا
واليوم أقولها باعلى صوت
أكبر غلط ان علمتونا هالشي
لأن هالشي خلانا نتعلم منهم الكره نتعلم منهم التفرقة العنصرية
أي هذا اللي علمونا ياه اليوم
علمونا الطائفية علمونا القبلية !

كل شيء غلط علمونا ياه

و الشئ الوحيد اللي ما علمونا ياه وهو الصح

ان ما في تفرقة دامنا بشر

فكبروا عقولكم يا عالم