حبوب الغده الخامله متى تاكلونها اذا صايمين

السلام عليكم ومبارك عليكم الشهر حبيت اسالكم بنات الى عندها غده خامله متى تاكلين الحبوب اهى تنوكل على الريق بعد بربع ساعه نبلش اكل بس بالنسبه للصيام متى ناكلها على الاذان المغرب وبعدين نفطر على طول او تقعدين ربع ساعه بعدين تفطرين انا عن نفسى انحرمت من الفطور الجماعى مع الاهل اهم يفطرون وانا اكل الحبه بعدين اصلى وبعدين افطر بس بروحى قوللى شنو نظامكم وشكرا

سلامتك وانشالله البنات يفيدونك

الله يسلمج وجزاك الله خير

أختي ربع ساعة بين الحبة والأكل فترة قصيرة ومشكلة هالحبة أن كثير من الأطعمة يأثر على امتصاص الجسم لها وحتى مكتوب بالنشرة المرفقة مع الحبوب تاكلينها على الريق وتنتظرين من ساعة إلى ساعة و نصف بعدها تبلشين أكل ، وغالبية الدكاترة ينصحون جم ساعة بينها وبين الأكل أنا آخذها لما أقوم أصلي الفجر ، هذا طبعا فالأحوال العادية .
بالنسبة لرمضان أنا استفسرت من الاستشاري د . عبدالناصر العثمان قال أما تاخذينها حزة الفطور وتنتظرين نصف ساعة أو ساعة إلا ربع وبعدها تاكلين ، أو تتسحرين الساعة 12 وتمتنعين بعدها عن الأكل عشان يمدي المعدة تفضي وتا خذين الحبة حزة الامساك وحسب كلامه يفضل هالتوقيت ، وأنا ماشية على هالنظام ومرتاحة عليه .سلامتج أختي وما تشوفين شر.

انا والله اكلها حزة الاذاااان وبعدها على طول الافطار
هل تعتقدين ان هذا مضر

ام حنون آنا نفس طريقتك آكلها واتفطر على تمرة ولبن وتالي اصلي وبعدين ابلش افطر بس هم باسأل اذا نزلت الدورة شلون طريقتكم يعني تردين تاخذين الحبة الصبح وتاكلين ولي خلصت الدورة ارد آكلها المغرب وآكل يتراوالي يضر بالصحة ويلعب في الغدة والا شرايكم يابنات

انا من رايي تتسحريين مبجر وتاخذين الحبة قبل الامساك مباشره
لان الهرمون الناقص واللي نعوضه بالحبه الطبيعي انه يخمل بالليل وينشط بالنهار سبحان الله عشان يساعد الجسم على النشاط وانه يقوم بوظايفه الطبيعية بالنهار ويرتاح بالليل عشان جذي الحبة تنوخذ الصبح
ونفس ماقالت اختي bibi الحبة لازم تنوخذ على معدة خالية احسن عشان الامتصاص

وان شاءالله اكون فدتكم

أختي اللي أعرفه الكالسيوم يمنع امتصاص الحبة فغلط تاخذين الحبة و مباشرة تشربين اللبن ، بالنسبة للجزء الثاني فمثل ماقلت فمشاركتي السابقة حسب كلام الدكتور تاخذين الحبة حزة الامساك وهالنظام تقدرين تستمرين عليه حتى حزة الدورة وانا متعودة آخذها عالساعة 4 حتى قبل رمضان فالحمدالله ماأحس بلخبطة .

وأشدد على كلام الأخت q8pharmacist بعلاقة الحبة والنشاط ، لماتاخذينها حزة الامساك تعطيج طاقة ونشاط طول النهار عكس مرة نسيتها وأخذتها المغرب كنت طول اليوم خاملة .

مشكورة حبيبتي طريقتك حلوة بطبقها من اليوم انشاالله والله يشفينا ويشفي مرضى المسلمين

تسلمون وماقصرتو والله يشفينا يارب ويشفى كل مريض

قبل الافطار وتتنتظرين نص ساعة وتبداين بالفطور

انا اكلها بعد الفطور باربع ساعات يعني اتفطر واقعد اربع ساعات ما اكل شي بعدين بعدين اكلها وساعه واتسحر جذي اريح …

نفس اللي كنت بقوله

وسلامات حبيبتي

اي والله دوخه هالحبه كل رمضان

هالسنه قمت امسك نفسي عن الاكل جم ساعه واكلها قبل النوم

نفس ما قالو البنات تسحري مبجر واكليها الفجر قبل الاذان ..احسن شي للغده ه النظام سواء رمضان او غيره عشان عمل الغده..والله يشفينا يارب ونفتك من ه الحبه