الوطنيه للإتصالات – انحش! قضبوا ارضكم!

السلام عليكم ورحمة الله وبركاته

شلونكم بنات شخباركم،

انا اكتب هالموضوع وابلغكم انكم اتديرون بالكم!
تحذير تحذير تحذير تحذير

اتبلغون اهلكم اخوانكم خواتكم رفيجاتكم كللللللللهم

بما اني موظفه سابقه بالوطنيه للاتصالات وللاسف حتى ماكملت سنه،
اشهر كان جنها جحيم بالنسبه لي! مسكوا ريولكم ولاتجنون على روحكم
يمكن اول مره احد يكتب عن تجربته بمكان وشركه معروفه والشغل فيهم

"انـــحـــش"

الكويتيين حقهم مهضوم جداً جداً اهناك، نسبه العمل مع الكويتيين ظئيله جداً.
الزلمات والمصاروه اكثر ناس لا ويعلون اصواتهم عالكويتي!
الاداره حشاكم ماتخاف الله ماتاخذ حق اي واحد مظلوم
الكويتيين عندهم ابيزه! جنج بياعه ابقاله والمستوى الشكلي جداً متدني

المدرا والله العظيم يا بنات انتو حسبة خواتي، قاعده اتكلم لكم عن "تجربه" واشياء شفتها بعيوني
الادارات العليا اغلبهم يتحرشون ابنات خلق الله خصوصا الكويتييات لي الراس البنات مشتكيين عليهم
بس لا حياة لمن تنادي .. مثل ما قلت لكم حق الكويتي مهضوم

يحطون اللوم عليج، وهالحجي مو بس صار معاي ..
وقسماً بآيات الله مع كل موظف كويتي وموظفه كويتيه
صرنا غريبيين بديرتنا يا جماعه!

الوطنيه حطت اعلان وظايف مؤخرا بس حق الكويتيين ويترجون انهم ياخذون الكويتيين
بس عشان يعدلون سمعتهم ويزيدون نسبة الكويتيين اللي قاعده تنخفض يوم عن يوم
ولان وزارة الشؤون رافعه عليهم قضيه بس يوظفون وافدين مصاروه وهنادوه اكثر شي
واصلا من بعد هالاعلان ما اقبلوا ولا احد بس صوره انه احنا قاعدين نوظف كويتيين!

والكويتيين وين يقطونهم؟
خدمة العملاء الهاتفيه والأفرع عشان يجابل المراجعين وتصير المشاكل عليه!
اللي تجبره انه يستقيل!
والله حرام عليكم! وايد كويتيين منهم انا من اللي قدمو استقالتهم اظطرو يقطعون رزقهم من نفسهم ومستقبلهم واهما متزوجين والسبه شنو؟ الاداره تعيسه وحقج ماتاخذينه ويدورون الزله عالكويتي ويظغطون عليه ليمن يطلع! ما اقول حسبي الله ونعم الوكيل فيكم حسبي الله ونعم الوكيل فيكم حسبي الله ونعم الوكيل فيكم .. كل مستقبل الكويتيين اللي كانو ومازالو بالوطنيه برقابكم ياللي ماتخافون الله

اتمنى من الخوات المشرفات يخلون الموظوع لمصلحة الجميع،
والله عشانكم ما ابي اي كويتيه تمر مثل ما مرو الكويتيين مع شركة الوطنيه القطريه.
واذا عندكم اي شي تبون تسالوني عنه، انا موجوده
في اكثر من بنت اسالتني عن لوطنيه قبل شلون نتوظف فيها، هذا جوابي قبل لاتقدمون

اللهم اني بلغت فاشهد،
اللهم اني بلغت فاشهد،
اللهم اني بلغت فاشهد،

اتفق معاج ان الوطنية من اكثر الشركات استغلالا للموظفين و متعبة و كرف
لكن ليش أسلوب " زلمات و مصاروة " ؟؟ ترى كلنا خلق الله و كلنا سواسية عند اللي خلقنا
مافي شي اسمه مصري علا صوته على كويتي و هذا ما يصير
فيه شي اسمه موظف علا صوته على موظف و هذا الغلط
أحس أكثر شي مخرب بلادنا العنصرية و التعصب لجنسيتنا للأسف
لو اتعاملنا مع بعض كبشر سواسية كنا ارتحنا وايد
أما عن حقيقة التعب فمعاج حق فيها
و ترى اعلان الوظايف للكويتيين وهمي . أنا قدمت فيه و ظلا يدزولي مسجات مالها معنى
آخر واحدة مقابلتك اليوم و مو حاطين موعد و لا مكان و لا فرع أروحه فما رحت
و بعدين دزولي شكرا لحضورك المقابلة سنرد عليك قريبا
يعني كمبيوتر قاعد يدز المسجات و لا استقبلوا أحد من الأساس

^

اهيا قصدها ان اهما صارو احسن من الكويتيين بديرتنا !!!

تخيلي تروحين هناك بيعاملونج عدل نفس ما يعاملونهم هني طللللللل !!!

المهم

حبيبتي احسن شي دوام الحكومه انا قبل مو مقتنعه فيهم كنت ابي خاص ..بس بعد اللي اوفه واسمعه من اهلي ويع ويع ويع

بس معااش قوي وكله شغل وكراف وفوق هذا ماكو تقدير …

عالاقل بالحكومه محد يقدر يكلمج وحقج تاخذينه غصبا عليهم

انا اشوف كل واحد المفروض نقيمه بأحسن و اسوء بشهادته و اخلاقه مو بجنسيته و انا لما درست بره البكالريوس شفت اهل هالبلاد يعاملون الواحد بذوق و محبة و احترام حرام نتكلم عنهم كأننا احسن منهم
و صاجة زبدة عن شغل الحكومة الواحد يرتاح فيه و ياخذ معاش زين الحمد لله و اذا مرض او صارتله ظروف يعطونه عذره مو يمصون دمه و يذبحونه عشان يداوم

مشكلتنا العنصرية اللي مالها حل

الله يعينج

جد جد كل مجتمع وفيه الإيجابي والسلبي وإنتي نموذج للناس المنصفة واللي تتكلم بحيادية أهنيج على أسلوبج الواعي =) ….
عزيزتي صاحبة الموضوع الزلمات والمصاروة على قولتج وللعلم أنا مو منهم بس هذول قاعدين بالوظيفة حالهم حال الكويتي ويمكن شغلهم أكثر مع ذلك يتقاضون ربع راتب الكويتي ممكن تقولين لي وين يصير هالشي غير هني؟ قولي الحمدالله عندج فرصة تشتغلين بالحكومة ترى الناس حواليج تعبانة إجارات شقق جنها قبر متر بمتر ومدارس خاصة ودوامات تقصر العمر … إلي يشوف مصايب غيره تهون عليه مصيبته :-

تسلمين حبيبتي , و ترى فعلا عندج حق احنا الحمد لله ما ندفع لا صحي و لا تعليم و لا أي شي و رواتبنا على الأقل ضعف راتبهم رغم إن شهادتنا ممكن تكون أقل , الله يرزقهم و يرزقنا يا رب و يرزق كل محتاج

لول امبيه طاع هذيل!

اوكي شتبوني اسميهم يعني؟ بتقنعوني مثلا ماتسمونهم جذي يالمثاليين! اي وانا عنصريه مع عيال ديرتي كيفي !
اصلا هذا اسمهم الدارج عندنا وبالعالم، انا مو قصدي الاستهزاء كافي الاخت ردت وقالت لكم شنو قصدي
انه الكويتي مهضوم حقه! وغير الكويتي يلعبون من تحت لي تحت وعطيتكم امثله عنهم فوق يعني ارجو منكم تقرون الموضوع وتعرفون اللي ابي اوصله، واللي تبي ترد قل خيراً او اصمت .. يعني مو تقعدون تدورون الزله على اي كلمه عشان اتفلسفون

شوفوا شصاير، انا عطيت تحذيري حق الخوات لان اكثر من وحده قبل قالت لي انها بتقدم عالوطنيه
فسويت هالموضوع المختصر لهم عشان يديرون بالهم فعلا.

اعصابج حبيبتي
ما عجبني ردج ،، امبيه طاع هذيل !!!
اسمحيلي

أنا اخالفج الرأي رفيجاتي هناك و مدلعينهم آخر دلع
ما جنه بمكان خاص
و بعدين الله يرزق الزلمات حرام متغربين عن ديرتهم و يركضون ورا الفلس
قولي الحمدلله إحنا بديرتنا و إذا ما عجبنا مكان رحنا مكان ثاني و الخير وايد

لول صدقتج!

صدقي حبيبتي
قطع الأعناق و لا قطع الأرزاق
شدعوه دروا عنج الوطنية ههههه

لول شكو الحين قطع الاعناق ولا قطع الارزاق
شفيج قمتي تخورينه، شكو هذا بموضوعي! امبيه شكو! لول
وشكو الوطنيه عساهم مادرو، لول
انا قاعده اعطي تجربتي فيها حق كل بنت ناويه تدخل اسالوني قبل
امبيه بلاغة شف

اسمهم وافدين و اذا تشوفين احترام الإنسان لأخوه الإنسان مثالية على قولتج فهذا اللي تربينا عليه و هذا اللي رسولنا صلى الله عليه و سلم امرنا فيه في حديثه " يا ايها الناس ألا ان ربكم واحد و ان أباكم واحد لا فضل لعربي على أعجمي و لا لعجمي على عربي و لا احمر على اسود و لا اسود على أحمر إلا بالتقوى "

بنات عندي بكالوريوس انظمة ادارية
و وودي اقدم عندهم
تتوقعون يقبلوني و شلون الطريقة

مصيبة كل مكان يبي واسطه
اشوف الاعلان و مالي خلق اروح
شرايكم اللي تتوسط لي لها معاشي شهرين لوووووووووووول

مادري حياتي يمكن انتي لج تجربة مو زينه معاهم و راح تلقينها حتى باي مكان تشتغلين فيه
و ممكن تروحين وزارة كلها كويتيين و تشوفين هذا الشي
اما بخصوص الجنسيات ماتفرق معاي لان كل واحد و مجهوده و مو معناته انه جنسيتهم غير انهم اقل منا او احنا احسن منهم