الامريكيه ثنائية اللغه

السلام عليكم يااحلى امهات

انا بصراحه حابه اسمع رايكم وتجاربكم في المدرسه الامريكيه ثنائية اللغه بخيطان اهيا احسن ولا الخليج الدوليه ولا اجيال اتمنى القى الجواب عندكم وكلي امل فييكن:

افا والله ماحد رد علي عموما انا كلي امل فيكم

الأمريكية ثنائية اللغه بصراحه مع انها يديده بس بدت بدايه قويه
وبصراحه ماتقارنينها بأجيال ولا الخليج ,,, ليش؟
كادر تدريس امريكي قوي
مبنى المدرسه وصفوفها اتينن ومختبرات على مستوى

انا مفكرة ادخل ولدي فيها ان شاالله
وصاحبتها د.فايزة الخرافي وتحت اشرافها

موفقه

مشكوره جيسيكا البا كويتيه والله يحفظلج وليدج ماقصرتي بس وين البنات اللي عندهم معلومات عن هالمدرسه انا ناطره

اى والله بنات نبى مقارنه اكثر ومعلومات … حتى انا محتاره بين الثلاث مدارس

بالنسبة لي آن تجولت فيها العام وشفت الفصول و المسبح وتعرف على نظامهم بس سبحان الله مارتحت من الله قلبي انقبض منها بس بنت عمتي ولدها فيها تمدحها تقول يدرسونهم تجويد زينه بس ولدها متأسس مدارس بالإمارات يعني دخل هذي المدرسة وهو تقريبا الحين بالثانوي العام دخل فيها. أو هالسنة

ياهلا فيج ام ضاري وانشالله نرسي انا وياج على بر وماقصرتي مدرسه مكروفه بس ناطره اراء اكثر

شوفى اوتار حساسه … ترا انا ماقصرت لانى من النوع اللى وسواسيه على عيالى

ورحت اجيال مرتين لفيت فيها وسجلت بنتى فيها حق السنه اليايه ان شاء الله ثانيه روضه

المدرسه يمدحونها بس بينى وبينج مادرى ليش عقبمادفعت وخلصت تحسفت … موحاسه مستواها نفس اللى ابيه

وللاسف سمعت من ناس وايد ان اغلب اليهال اللى فيها شياطين ويطقون باجى اليهال

وخبرج عيالى ينطقون مايطقون فا حاطه ايدى على قلبى على بنتى… والظاهر انى بقعدها بس السنه اليايه لانهم مارضوا يردولى فلوسى

وحق الابتدائى يابدخلها الامريكيه يا الخليج

بالنسبه للخليج انا مريتها المدرسه زينه ونظامها كندى يعنى يجمع بين النظام البريطانى والامريكى وتوها فاتحه يعنى مافيها يهال وايد

والامريكيه صراحه مارحتلها اخذت موعد علشان اشوفها من داخل ومارحت صار عندى ظروف

بس بااسعار طبعا اجيال ارخصهم والخليج والامريكيه تقريبا نفس السعر متقاربين

بس انا مابى كلام المدرسه نفسها ابى تجارب الناس اللى حاطين عيالهم فيها

يعنى انا بعد مادخلت بنتى باجيال بعدها الناس قاموا يقولولى تجاربهم !!! اشعقبه !!!

فا هالمره ابى ادور واسأل من الحين وخصوصا ان المدرستين تقريبا يم بعض

والله كريم

انا نفسج ام ضاري حاسه اجيال مو بالمستوى اللي ابيه فيا ريت نسمع تجارب الامهات في اجيال والامريكيه والخليج وناطرين

ليش مادخلون عيالكم مدرسة الحياة العالمية الي مأسسها الدكتور إبراهيم الخليفي آن سجلت ولدي فيها صراحه عندهم أفكار وايد حلوة و المدرسة بعد ماصليت استخارة آن وايد مرتاحة منها الحمدالله.

بعيده علينا … حرام هذوله يهال كل يوم انعنيهم هالمشوار… بعدين مدرسة فايزه الخرافى ممتازه وقويه حتى رسومها مو شويه بس انا مابى اسجل عيالى على كلام المدرسه ابى اسمع تجارب الناس احسن

اي والله صاجه ام ضاري بعد عمري حرام انعنيهم حبيبتي مدرسه مكروفه الله يباركلج في ولدج واتشوفينه باعلى مكانه

مشكورة بعد عمري والله يوفق كل عيالنا و عيال المسلمين يارب وترى على فكرة حتى آن المدرسة بعيدة علي بس صراحة يكفي إن مدرسة الحياة مافيها حصص موسيقى وايد عندهم أفكار حلوة للأطفال حتى الرياضيات في له مختبر خاص مجهز بكل الأدوات الرياضيات الي يحتاجونها الأطفال .

مدرسة مكروفة

ماشالله شكلها خوش مدرسه…. الله يهنيج ويوفق عيالج يارب

بينى وبينج انا مدحولى وايد مدارس بس كل ماتذكر ان عيالى صغار وباجر زحمة الشوارع ومطر وغبار ورطوبه يكسرون خاطرى واهون

الله كريم ويجدم اللى فيه الخير ان شاء الله

آنا بعد والله ودي أسمع عن الدرسه الأمريكيه ثنائية اللغه اللي بخيطان قريبه يمي آنا ساكنه بجنوب السره سجلت ولدي حق السنه اليايه pre-k وقاعده أحاتييييي ودي أسمع عنها تجارب ناس مهتمه ومتبحثه في المدرسه ما ودي آخذ آراء أولياء أمور ما يدرون عن الياهل كلش المهم قطيناه مدرسه خاصه وخلاص السايق والخدامه يتعاملون مع المدرسه وادارتها في كل أمر يتعلق بالطالب
آنا صراحه كنت محتارة بينها وبين الأمريكية العالميه اللي بحولي المبنى الأزرق الكبيررر اللي قبال القادسيه الكل يمدح مستواها بس ما عجبتني إن لي الثانوي مختلط آنا ودي بنظام الفصل بين الجنسين بعد الإبتدائييي
وهم قاعده أحاتي الطريج لي حولي