استفتاء vs الإجهاضات والولادة

السلام عليكم حبيباتي

من زمان قلت مشاركاتي و دخولي للمنتدى نظرا لظروفي النفسية ( الإجهاضات) والاجتماعية ( الزواج)

محتارة في موضوع من بداية ومن قبل الحمل وقلت مالي الا خبرة خواتي كويتيات دايم نصوحات ويحبون الخير والفايده

للي ماتعرف وضعي انا حملت وأجهضت مرتين وبدون اي سبب

لكن في كل حمل يحوشني انفصال جزئي في المشيمه وهم ما يعرفون السبب لان فحص الأجسام المضادة طلع سلبي ف مو اهي السبب

وجميع التحاليل سليمه ولله الحمد وأهني بدت حيرتي

لان فجأة يحوشني طلق جم يوم بعدين ولادة عادية بدون تنظيفات

الحمدلله رب العالمين من علي بالحمل بعد سنه من اخر إجهاض وكان طبيعي الحمدلله بدون علاجات بس خذيت فوليك أسيد ومارست الرياضه وتم الحمل والفال لكل محرومه

بالبداية راجعت عند دكتورتي من الحمل الاول روبينا علي بعدين راجعت عند ناهض حماديه من المدح والسمعه اللي سمعتها

بس الحين الوضع بالنسبه لي أبد مو مريح .. الدكتور ونعم فيه جدا ممتاز بس المشكله اني ما أراجع عنده انا فقط بالاسم مريضته لكن كله يحولني على مساعدينه .. وهالشي مو مريحني أبدا

والشب الثاني اللي ماريحني اني ما اقدر أتواصل معاهم لا اهو ولا مساعدينه وقت الضروره .. كله يقولون لي روحي الطوارئ وهالشي ضايقني اكثر وخلاني افكر بالموضوع لان لحالتي مهم ان يكون تواصلي جيد مع طبيبي وخصوصا اني الحين وصلت للمرحلة اللي دايم أجهض فيها ( بين الرابع والخامس)

الادويه اللي عطاني إياها :

– ميدرول 3حبات ( نوع من الكورتيزون- واهي السبب اني مو قادره اكشت واروح لدكتور ثاني لان موزين أوقف الكورتيزون فجأة )

– بريجنا بلان حبه

– بيبي أسبرين حبه

– إبر كلاكسين يوميا تحت الجلد

– تحاميل سايكلوجيست مثبته يوميا

– والسستر مالته وصفتلي من عندها حبوب التوت للالتهابات مرتين يوميا

راح استخير باذن الله بس حبيت أستشيركم بعد

قريت وايد عن دكتور حيان الاحمد وانه شاطر ويصبر عالولادة مايستعجل ويسوي قيصري علشان الوقت ويتواصل مع المريضه ويعطيها حقها

ف الله يرضى عليكم فيدوني بحالتي هاذي اكمل عند ناهض ومعاناتي مع مراجعاته وسوء التواصل ولا اكمل عند الاحمد؟

علما بأني جربت وايد دكاترة منهم ناهده وروبينا وعاليه غير الحكومه بعد

واللي ماتعرف ميخالف خل ترفع الموضوع بدعوه وتستفيد باذن الله

الله يثبت حملج ان شاءالله

عن تجربه دكتور ناهض للعلاج فقط وبعد ما اتحملين مايستقبلج كله المساعدين اللي عنده
واهو دكتور ممتاز بس عيبه الزحمه وانج ماتدخلين عنده

و دكتور حيان ماعليه ككلام الكل يمدحه ماشاءالله وانا ان شاءالله ناويه اولد عنده

انا مع الاخت ساره اوافقها الرأي و عندج بعد بكري شاطر
الله يثبت حملج و يقر عينج بشوفة البيبي سليم معافى يا رب

ياحلوه دكتوري حيان الاحمد
اناكنت مجهضه قبل هالحمل وكنت اراجع عنده عارف حالتي وشاطر حيل حيل حيل حيل حيل
والحين الحمدلله حامل بالسادس اينن طيب وحبوب
ويعطيج حقج بالاساله وكل شي ولما يسوي سونار
يقولج كل شي سونار تفصيلي كامل وماهمه الفلوس والله
ويعطيج رقم موبايله ويقولج اذا في اي شي دقي علي
لو بنص الليل يرد انا جم مره ادق ومايقصر وياي
لوشنو مااراح اختار غيره وفي تجمع له بالمنتدى دشي
وشوفي التجمع واذا راجعتي عنده ١٠٠٪ بترتاحيله

مشكوره حبيبتي اي انا كتبت هالمواضيع علشان اشوف اللي جربوه وجربوا ناهض علشان يقدرون يقارنون ويقيمون

ماتقصرين

امين يارب ولج مثلها

توني قريت عن بكري بس كله يتكلمون عن خياطه وولادته مالقيت عن متابعة صعوبات الحمل

ماتقصرين حبيبتي

بعد قلبي كفيتي ووفيتي بشوف التجمعات

عاد صج مسألة التواصل تأثر معاي ريلي يقول لا عادي قتله لا ما ارتاح نفسيا وكله قلقه

واليوم تخيلي من الصبح اتصل على دكتورتي ولا ردت علي وبالاخير السستر خذت رقمي علشان تخليها تكلمني ولي يومج

اي والله وترا مايحقر والله
حتى بوقت الي يكون فيه مشغول بالعياده
يخلي تلفونه عند السستر واهي ترد
مره بالثاني حسيت بمغص وجذي جان
يرد اهو يدق علي ماخلا السستر اهي تكلمني
حيل مهم وحريص على مرضاه
وصدقيني فاهم وعارف وشاطر حيييل حيييل حيييل
كل شي يعرفه وكل شي فاهمه وانا قلت حق وحده ويانا
بالمنتدى عنه وراحت راجعت عنده وارتاحتله وايد حييل

حبيبتي انا ماره ب6 اجهاضات من قبل وادويتج حلوه ليش بتغييرين الدكتور خليج عنده احس عباله بتفتحين ملف ويطلب منج تحاليل من الأول

اهم شي تقرين سوره البقره بنيه التثبيت والله يثبته لج حبيبتي وتقر عينج بشوفته

يمال العافيه والله

تسلمين حياتي

مشكلتي مو بالدكتور .. انا كنسلت روبينا لان ارتحتله وادويته حسيته فاهم

مشكلتي اهي اني مو حاسه بالأمان

يعني لما تواجهني مشكله او آلام ماقدر أتواصل معاهم واضطر أدور واحوس بالنت لان ماقدر أتواصل معاه

ولما اتصل يكشتون ويخلون السسترات يكلموني تخيلي طالعتلي حبوب تعور وماقدر انام وشكلها غريب

ولما ادخل النت تطلعلي أشكال وأمراض غريبه تخرع.. والصبح اتصل واتصل وعمك اصمخ ولما كلمتني السستر خذت رقمي وقالت بقول للدكتوره .. بس انتي فيج شي؟ قتلها بسألها عن حبوب طالعتلي.. اهي الظاهر توقعت اني نزفت ولا الربط صارله شي !!! يعني لازم مصيبه علشان اقدر أكلمها؟ لا والدكتوره مو مشهوره عيل لو بكلم ناهض بنفسه شبيسوون؟

ما احس بالعنايه حاله حال مراجعات الحكومه بالضبط

وانا كل مره أجهض بهالفتره من الحمل وحدي قلقه وبعد بسبب الحبوب والحكه وماكو مناعه بسبة الكورتيزون

باستمر على ادويته وأخذ نسخه من ملفي واروح لدكتور زين بعد الاستخاره والاستشاره

مبروووك ياقلبي .. ربي يثبت حملج ويقر عينج بشوفه ضناج بصحه و عافيه .. اقري سوره البقره يوميا" و ادعي دعاء حفظ الجنين و توكلي على الله ..

ناهض رفيجتي تمدحه حيل ﻻنها هم نفس الشي اجهاضات و تالي سوت تلقيح بتوأم عنده بس ماجربته للامانه

وحيان اﻻحمد الكل يمدح فيه ويشهد له باﻻمانه والطيبه و انا اول مره اجربه وإن شاءالله اتوفق ﻻنه بحملاتي السابقه اجهاض منذر و ابر تثبيت الله المستعان ..

الف مبروك و الله يثبت حملج

اختي سويتي فحص لعنق الرحم؟؟يمكن اهو اللي مسببلج ولادات مبكره

اغلب اللي يولدون ولاده مبكره يفحصون عنق الرحم.. لو قصير يربطونه و يتم حملهم لي التاسع

حبيت انبهج على هالشي عشان تديرين بالج منه

و ان شاءالله ماكو الا العافيه

و بالنسبه للدكتور الاشطر اكيد ناهض اشطر بوايددد

انصحج فيه حيل فاهم

و الله يتمم حملج على خير

روحي حق حيان الاحمد مواعيده مضبوطه ويرد عليج بكل وقت حتى لو بالليل

انا من شهر ١٢ اراجع عنده ويعطيج حقج وزياده وحتى يتابع حالتج اول باول

انصحج روحي له واذا تقدرين اخذي كل تقاريرج معاج حتى لو كوبي علشان يعرف حالتج عدل

ومو مادي كلش

ودايما يطمن

روحي له حتى لو كتجربه وشوفي الفرق

حبيبتي والله تسلمين

ربي يثبت حملج ويقر عينج بمولودج سليم معافى

اهو ناهض يهتم اكثر باللي مسويلهم تلقيح وأنابيب علشان جذي انا حاسه بالاهمال