البوم كتبت نهاية حياتي الزوجيه!!!

السلام عليكم …
صدري ضايق الله لا يضيق لكم خاطر … لو ما افضفض لكم هني يمكن يصير فيني شي لان البكي ذبحني ..
بقولكم سالفتي وياليت صدركم ووقتكم يتسع للقراءه ..
تزوجت من 5 سنوات .. الله رزقني ببنت في ثاني سنه وماقسم لي بغيرها سبحانه رغم محاولاتي المستميته للحمل بالتنشيط مرااات كثيره وبالتتمرخ عند الحريم …
زوجي من عايلتنا بس مو محتكين فيهم حيل بحكم تباعدالمناطق والروابط بعد ولما خطبني ابوي وافق علي طول لانه يعز ابوه حيل واستانس يوم جا يخطب .. من اول شهراكتشفت عيوبه اللي ما تنبلع بس غصبت نفسي وبلعتها عشان لا ارجع مطلقه لبيت اهلي من اول شهور .. تعرضت للضرب القاسي وسكت وتحملت وماقلت لاهلي لين انفضح مره اكتشفت انه يتعاطي حبوب مخدره وضربني ويومها جاني ابوي وامي واخذوني وبعد شهر رجعت بحكم الواسطات بين العايلتين وعقب شهر حملت في بنتي ومرت شهور الحمل في المستشفي وعند اهلي بسبب النزيف المتواصل بس الايام القليله اللي كنت اروح فيها البيت عنده كنت اشم ريحة كريهه وما دريت انه خمر والعياذ بالله الا بعدين … واستمرت حياتي معه علي هالموال خمر وحبوب وفقدان للوعي تعرضي للضرب حتي بعد ولادة بنتي .. حتي في شهر الفضيله رمضان كان سكران لا صيام ولا قيام هم تحملت وصبرت وقلت عشان بنتي يمكن ينعدل بس للاسف ذيل الكلب اكرمكم الله ما يتعدل …
المهم … من سنه بدت عنده هلاوس من كثر تعاطي الحبوب يتخيل امور ويتصرف علي اساس انها حقيقه ويشك في كل شي ويتهمني في امور عيب علي رجال يقولهاا لمرته … مثل منو رفيجج وحبيبج وزعلت عند اهلي بعد ما فاحت ريحته وكنت يومها زايره اهلي ودق يتهمني عن سوالف ويشكك في اخلاقي وسمع كلامه اخوي وتهاوش معه وقعدت 3 شهور في في بيت اهلي ورجعت بعد ماواعد اهلي انه خلااص تاااااب… وكانك يابو زيد ما غزيت نفس الموال وما طاف 4 شهور الا وانا في بيت اهلي بعد معركه بينه وبين اهلي عشان اطلع من البيت وقعدت هالمره 6 شهور وكنت حالفه ما ارد له بس كسرت ظهري بنتي بحنتها عليه واشتغلت الواسطات وانه خلااااااص تاااب توبه نصوحه ويبجي علي وعلي بنته ليل نهار طبعا اهلي كلهم عارضو رجعتي بس انا ققلت لابرجع عشان بنتي حرام تعيش بدون ابو وهو حي … ومن شهرين رجعت بس وعوود وامنيات انه خلاااااص صار شخص ثاني … بس للاسف مثل ما خليته لقيته والحبوب تلفت عقله لو سياره تمر قال هذا مواعدج … واليوم صار اللي صار طلع له سالفه من عقله التالف من المخدرات والحبوب ورماني بتهمه جديده وصدقها وقعد يزيد واني خاينه ومواعده واحد ومن هالخرابيط نسيت اقولكم انه في كل مره يهددني بالقتل ومره خنقني لين بغيت اختنق …
اليوم طلعت من البيت بمعجزه من رب العالمين كنت ادعي ربي يفكني منه واطلع سالمه انا وبنتي من البيت والحمدلله ربي ماقصر معاي وتحايلت عليه اني انزف وبروح بيت اهلي وجابني بعد مواعيد وحلوف اني ما اقولهم عنه … طلعت من البت وعيوني تبجي دم لاني في داخل نفسي عارفه ومتاكده اني طالعه بدون رجعه لاني خلاااص ما اقدر اتحمل اكثر تعبت وتعبت نفسيتي حتي نوم ما انام من كثر خوفي منه ومن فصلاته ..
يوم وصلت بيت ابوي قلت لهم اني ما ابيه خلاص وعلمتهم عن سوالفه وانه للحين يتعاطي .. وقررت اني اول يوم دوام بعد الاجازه اروح ارفع دعوى طلاق …
كاسره خاطري بنتي ما عاشت جو اسري وكبرت علي هواشه وتشوفه يطقني ,,, الله يعيني علي تربيها ..
عيوني تعورني من كثر ما بجيت .. مو قادره اسكت اختي تقولي علي شنو تبجيين خل يولي ما يستاهل البجي بس انا ابجي علي نصيبي اللي طيحني معاه وسنين عمري اللي قضيتها عذاب وحرمان …
سامحوني اذا ثقلت عليكم .. وادعولي الله يعوضني خير …

لكم ودي