|
|
شلونكم بنات
شخباركم
في موضوع شاغل بالي من فترة …وحبيت اناقشكم فيه….
وياريت كل وحده تحط نفسها مكان هالبنت اللي بقولكم سالفتها….
وحده تقدملها واااحد من احسن الرياييل …ولد ناس ومحترم وخلوق … والكل يشهدله بهالشي …
بس في شغله صغيره اللي مخليتها تتردد… انه في اعاقه حركية…يعني الريال حركته طببيعية اميه بالاميه بس ريوله مشلوله نتيجة حادث … يعني الشغله صارت من فترة قريبه…
فحركته كلها على الويلجير … بس شايل نفسه …يعني يشتغل الحمدالله بمكان محترم …ويسوق سيارة ومعتمد على نفسه اعتماد كلي ….
وتقدرون تقولون في معرفه بسيطه بينهم …
لو انحطيتي في هالموقف …شنو راح يكون موقفج؟
عطينا رايج وشاركينا
واعتقد ان فى الكويت الزواج من المعاقين غير مرغوبه مع الاسف … لكن المشكلة ان المجتمع
مايفكر ان هذا الشىء ابتلاء من الله وقد يكون الزوج المعاق افضل الف مره من الطبيعى
تلاتفكرين تكونين انتى العروس لكن تخيلى معاى لو ان لج ولد معاق وتبين تفرحين فيه شنو بيكون موقفج
من مرض او عله او اعاقه يااااا رب
بس بالنسبه للزواج من معاق اقصد طبعاً
اعاقه جسديه فقط ولكن حاله
مثل ما ذكرتي جيده ويشتغل وجذي
يعني الحمدلله انا الحين انسانه متزوجه
بس لو سبق لو انحطيت
بهالموقف وتقدم لي شخص جذي
وارتحت له واخلاقه ممتازه
ما راح ارفض بصراحه
انا شعاري بالزواج
الراحه بين الشخصين والاخلاق والسمعه الطيبه بس
غير جذي ما يهم
لا شكل
ولا شهاده
ولا فلوس
وانا اقول اختي خل البنت هذي تفكر بعقلها
وتشاور نفسها
وبالتالي ما يتم الا اللي تبيه
ومحد راح يغصبها على شي
والله يوفق الجميع بازواج صالحين
ليش لا يمكن هالانسان المعاق يكون احسن من غيره
رايكم تقريبا نفس رايي …بس ما تحسون حياتهم راح تكون مقيده؟
ومو تفهموني غلط
مو قصدي جيكر والا حلو
قصدي مريح والا يقمت القلب
سبحان الله في ويوه من تشوفينها ينقمت قلبج لو كان الشخص اجمل ماخلق ربي
وفي ويوم من تشوفينها تحسين براحه نفسيه لو يكون الشخص جيكر
بس المشكله مو براي البنت نفسها
اهل البنت يوافقون على شخص معاق؟
هني المشكله
لو كان متقدملي شخص معاق وانا موافقه عليه مستحيل اهلي كانوا راح يرضون لأن الأهل دايما يدورون الأفضل لبناتهم مع ان سبحان الله ساعات تلقينهم يزوجون بناتهم ناس صحتهم ماشالله ومافيهم شي وتلقينهم مو مرتاحين معاهم
ولو تفكرين فيها من ناحيه ثانيه
لو ان انتي الله لايقولها المعاقه
هل كان الشخص نفسه بيتقدملج؟
يعني مثل ما قلتي في ناس من تشوفينهم ينقمت قلبج …. مع ان مو ناقصهم جمال والا غيره …بس اهيه راحة نفسيه
وفي ناس يكون جمالهم بسيط … وترتااااااااحين لهم وااايد وينفتح لهم قلبج
ومشكوووووووورة وسامي على المشاركة
واكيييد البنت بتستخير
انا برايي عااااااااااااااااااااااااااااااااااادي اني اتزوج من شخص معاق و احس ان الحياة مع انسان معاق يبعث في الحياة الزوجية شي من الصبر و التحدي والوحدة منا ما تدري ممكن تتزوج من انسان معافى و يصير معاق بيوم و ليلة و يمكن ما تصدقوني اذا قلتلكم طول عمري افكر اخذ شخص معاق لأني احب ابعث السعادة بإنسان قد يكون يأس من الحياة و ترا شعور حلو انج تكونين حنوووووووووووونة عالريال
رايج وتفكيرج مقارب لرايي وتفكيري وايد ..
وصج شعور حلو انج تونسين شخص فقد الامل في الحياه
والله يرزقج على قد نيتج 
يعني اعطيج اقل مثال …
حبو يطلعون مع بعض …. قبل لا يفكرون بالمكان …يفكرون يقدر يمشي بالكرسي بهالمكان …..