نهاية الكورس و سوالف أخرى

نهاية الكورس قربت. حدي راح اشتاق حق طالباتي مادري شسوي. اليوم وديت وياي كاميرا وصورت كل طالبة بروحها بعدها قلتلهم يوقفون بآخر الصف اصورهم صورة جماعية ونفس الشي سويته مع الصف الثاني قلتلهم بحتفظ بصوركم للذكرى. جان يقولون لي ابلة بتدرسينا لحد التاسع؟ لوول تصدقون معلمات رجعت البيت وقمت اشوف صورهم واي يتني بجية حسيت ان ودي اكون وياهم بهالصورة كطالبة، حسيت ان ابي ارجع بالمتوسط مرة ثاني واعيش لحظة الازعاج داخل الصف ياربي وين صديقات الطفولة

@

الظاهر مدرستي بتسوي كل خميس يوم " الهواش العالمي" في ابلة مسكرة بسيارتها على ابلة ثانية والابلة الثانية كانت مستئذنة وشافت سيارة مسكرة عليها، رجعت المدرسة وصوتها واصل لحد آخر ركن بالمدرسة وبعدين مادري شصار بس بعدين عرفت انه صار مشادات كلامية بين الابلتين

@

معلمات هل هذا شي طبيعي لما يكونون فيه أبلات يتكلمون داخل أقسامهم عن سوالف من السرة وتحت!! يعني سوالفهم كلها 18+ !!! انتو بمدارسكم أو أقسامكم فيه جذي!! ولا انا قسمي الي عوي!! يعني الوحدة ويييها يصير احمر واحراج من هالسوالف، ما يقولون هذي مو متزوجة وعيب تسمع جذي… امبي والله فشلة!

@

أحمد المليفي الظاهر راح يكون وزيرنا اليديد مبروك على انه راح يكون ريال في وزارتنا مع اني مو بالعته ك شكل لول ، لكن من تأكد اسمه والتربويين متضاربين بالأقوال ناس تقول زين وناس تقول مو زين وانه وراح يمشي ويكمل مسيرة نورية وموضي، أنا أقول خل ننطر ونشوف، بس انا من داخلي احسني متفائلة وخاصة بإلغاء النشاط كل ثلاثاء+ ورجوع الدوام الصيفي والشتوي + زيادة مجزية للمعلمين والمعلمات..

@

اجازة المعلمات راح تصادف 6/30/2011 وفي ناس تقول 6/28 على أساس هاليومين راح يفرقون الحين!! بس انا حاسة ان خلال هالـ 20 يوم الي بنداومهم والي ما راح يكون عندنا شي غير القعدة ورا المكاتب ونكون مخلصين تصحيح وموزعين شهايد، وخاصة معلمات الابتدائي والمتوسط راح تيي نشرة نطلع الساعة 10 بسبب الأحمال الكهربائية، تذكرون السنة الي طافت صار جذي وكان نداوم 7:30 ونطلع 10 وناسة.

@

معلمات مو ملاحظين اجازتنا كل مالها وتقل!! هالسنة راح تكون شهرين بالضبط عكس السنة الي طافت!! انا خايفة العطلة الصيفية حق سنة 2024 تكون شهر ونص!! شنو هذا ظلم وين العطلة الي كانت 3 شهور

@

جمعة مباركة
وهذي لكم..