ماعندي اسلوب مع زوجي

السلام عليكم

مثل مالعنوان موضح لكم
للاسف انا ماعندي اسلوب ولا اعرف الحركات والدلع اللي اشوفكم توصون فيه البنات هنا
اسلووووووبي دفش
اذا بغيت اطلب شي اقوله على طول مباشره واذا رفض ولا قال بعدين مديت البوز وزعلت
يايصير اللي ابيه ولا كشرت وزعلت واحيانا اقوله ودني لاهلي مابيك خلاص والسبب تااااافه
ماانكر انه بالاول من يشوفني ازعل على طول يراضيني ومايخليني الا لما اضحك
بس الحين حسيته بدا يمل ومو على طول يراضيني
والله يا بنات الكلمه الحلوه عمرها ماطلعت مني وكل ماافكر اقوله حبيبي ولا حياتي احس الكلمه ثقييييييييله واهون
مع اني احبه والله بس مااتعودت اقول هالكلام
قبل احسه طاااااااير فيني وملهوف علي
صدق الحين اسلوبه زين بس مو مثل قبل صرت اذا زعلت وهو مو مقتنع عادي يخليني لين ارضى بكيفي
والله خاااااايفه يابنات
ماعاد صار يدلعني ولا شي
معناته ماصار يحبني اول مل مني انا كل خوفي يجي اليوم اللي يمل فيه مني

اتمنى نصايح منكم

يحبج يوخيتي يحبج بس يعاملج بمثل اسلوبج حاولي مره مرتين تقولين حجي حلو تستحين شوي منه تتغلين عليه من غير مده بوز وربي يتمم عليكم يارب

يا بعد عمري انتي هذا ريلج انتي اذا مو انتي يلي تدلعيه وتسمعيه الحجي الحلو من وين راح يسمع… لا تفتحين لروحكم باب الله لا يوريج إياه شنو إنتي ماخذته غصب ولا براضج؟؟؟ عزيزتي الحياة الزوجية تنازلات يعني لازم تدوسين شوي على روحج وتعطي الكثير لريلج هذا اذا مو حابة تخسرينه… وخذيها مني نصيحة اخت مو في كل كبيرة وصغيرة يالله بروح بيت اهلي يالله وديني بيت اهلي ترى اذا قرر راح يوديك ولو اذا انتي مو قاصدة…
راجعي حركاتج وافكارج يا قلبي قبل عن يصيرلج شيء بسبب العناد
والله يديم يلي بينكم على الف الف خير

حبيبتي هو الحين مستحملك لانه يحبك
وصدقيني اذا ما ضبطتي وضعك وصرتي لطيفه وحبوبه ونعومه راح يمل ولا سمح الله يتركك

بس سؤال هل انتي تحبينه ؟
انا اعرف الي تحب زوجها تحاول ترضيه وتكسبه وتسمعه احلى اكلام وكلمه حبيبي تكون دايم على لسانها

حبيبتي لازم لازم لازم تصير كيوت لانو شوفي نص الرجال يموتون بالدلع وانتي شوفي المقدمات الناعمات والمتصنعات يموتون عليها

نصيحتي لك تعدلي وعدلي وضعك وعوديه يسمع منك احلى الكلام ويشوف احلى اسلوب
صدقيني مشكله اذا حس اسلوبك وطريقتك مثل اصحابه

ماشالله البنات مو مقصرين في المواضيع كيف تدلعين على زوجك وكيف تدلعينه وكيف تغرينه ……. الخ
والله يهدي سرك ويسعدك

يعني انتي فاهمة مشكلتك بالضبط ،، مفروض تكونين عارفة حلها لأنه واضح وضوح الشمس !!
شوراك لا تدلعتي وتنيعمتي عند زوجك وماتنادينه الا باسامي الدلع واذا جاب شي لو كيس خبز تعطينه من المدح اللي يحبه قلبك !!
شوراك ؟؟
توك عروس بعد !!

أنا مع كلام البنات

لازم تسمعينه كلام حلو وموكل شيء الواحد يزعل عليه خلي زعلك يكون بوقت يستاهل انج تزعلين عليه

عشان يصير زعلك له قيمه عنده ويحسب له ألف حسساب ؟

واذا على الكلام الحلو بسيطه حاولي تقولين مثلا كلمة حبيبي مية مره باليوم جدام المرايه .. وغيرها من الكلمااات لين تحسين نفسج تعودتي ع الكلمه

سهله صدقيني راح تتعودين ع الكلام أمرره هين ..

جنج انا استحي اقول ل حبيبي عمري قلبي..الخ

ولازعلت حطيت الحره بروحه لهلي

الله يعين فطنتيني بغير طبعي والله مع اني بسرعه اتنرفز واحتر ويتعكر مزاجي خلاص انا وانتي من اليوم ورايح بذن الله تغير اسلوبنا واهل مافيه الا زواره مو تزعل وتصدقين لارحت لهلي وانا زعلانه اتحسف اني جيتهم واحط الحره فيهم ونفسيه عليهم

دام ماتقولينله كلام حلووو اكيد ما راح يقولج كلام حلووو

اي والله

معقوله ! مو حرام! مو قمة الأنانيه! أدري بضايج فيج بس صج هالشي أنانيه!
حبيبتي إنتي عارفه مشكلتج عدل! يعني إنتي تبين الدلع والدلال والمراضى والكلام الحلو وأهو له الحقران والكلام الجاف!

يا حياتي إنتي الحين دلوعته وإذا ما عاملتيه بالمثل (رح يطير طيرج) الله لا قال.
بس هذا واقع شحقه تمدين البوز على أتفه شي ! رح يتعود طبيعي ورح يطنشج مع الوقت…ومو حرام تحرمينه الكلام الحلو؟ هم أهو ريال وإنسان له إحساس ويبيج تدلعينه! !

يا عمري الله يهديج ويسعدج راجعي نفسج وعودي لسانج وقلبج على الكلمه الحلوه…ترا إنتي حبيبته وأهو حبيبج إذا ما دلعتي حبيبج منو رح تدلعين!!

لا تمدين بوزج باجر لا سوه شي ماشيات وقلتي له ليش قال عفيه مره بوزها ممدوووووود اشبااااار

ادش البوز ممدود اطلع البوز ممدود ترى الي اتسوينه مو حل ولا تصيرين انانيه تبين الشي لج ماتبينه لغيرج

نصييييحه ترى وخاصه الريال ان راح مايرجع نفس قبل ولا تكرهين نفسج عنده نصيحه

حبيبتي انتي شكلج صغيره شوفي انا كنت مثلج استحي بس اول شي دزيها مسج بعدين اتصلي عليه وقوليله بقولك شي وبسكره قوليله احبك وسكريه بسرعه حسسيه انج مستحيه يمكن اهوه يفهمها شي ثاني وبعدين ترى شي سهل اذا تبين شي مثلا حبيبي بعد عمري ترى الريال بسرعه يخق اذا احنا نخق بسرعه فمابالج اهم واذا بيطلع قوليله حبيبي مابي اقعد بروحي اخاف ولامتملله خلني اروح استانس

واي نسيت لاتكثرين زعل انا كنت مثلج كله ازعل ويراضيني الحين ماقام يراضيني يقول مليت من كثر ماتزعلين واراضيج انتي ابيج تراضيني

حبيبتي أبدي بالمسجات … دزي له مسج فيه كلمة حبيبي … عمري … قلبي … حتى لو أنتوا قاعدين يم بعض يمكن تستحين تقولينها بلسانج بس كتبيها بمسج ودزيها وأنتوا يم بعض راح يطير فيج ويستانس لأن كلمة حلوة طلعت منج .. وشوي شوي ليما تكسرين الحاجز …

جربي وقولي لي عن طريقة المسجات ..

وشي ثاني لا تزعلين على كل شي وخليج طبيعية :> لأن الريال يمل من الزعوووليات

.

يا حياتي .. تقدرين تغيرين .. انت بأول الطريق ,, توج عروس ..