انا دلوعة بنتي من تجمع اكتوبر وهذي قصة ولادتي بتاريخ 9-10

طبعا مثل مانتو عارفين انا مو بجر وهذي ثاني ولادة لي .. في حملي الاول على بنتي خلصت التاسع كله وخذيت من العاشر

10 ايام وماكان فيني ولادة ودكتورتي قررتلي دخول بطلق صناعي لان كنت ادرس وكان عندي امتحانات وماكنت اقدر

انطر اكثر .. وولدت بنتي بطلق صناعي لمدة 7 ساعات تقريبا .. وشفت الموووت والعوار كان مو طبيعي خلاني اشيل

فكرة الحمل من بالي نهائيا وماحملت الا بعد مرور 3 سنوات تقريبا..

في هالحمل كنت ادعي ربي كل يوم ان الله يسهل علي واولد بالتاسع وبطلق طبيعي.. ومرت شهوور الحمل وكان حملي

غير هالمرة .. اول 3 شهوور النساة ذبحتني وكان ضغطي ينزل واطيح غشيانة من اقل مجهود ابذلة .. يعني لي درجة

طحت غشيانة وانا اتمشى بالجمعية.. او وانا رايحة الصالون .. لكن الحمدلله عدت الشهوور وبالشهر الخامس قالولي

المشيمة نازلة عندج ولازم راحة تامة وطعتهم وتميت تقريبا لي بداية السابع وانا مرتاحة وما اروح مكان وكل طلعاتي

زيارات عائلية وبس .. وبنص السابع صارلي نزيف ونوموني بالمستشفى وقالوا في انفصال بسيط بالمشيمة والحمدلله طلعت

من المستشفى وتميت مرتاحة لين نص الشهر التاسع .. وطبعا بكل زيارة كانت تحرص علي دكتورتي ناهدة العلي ممنوع

المشي وممنوع الجماع وممنوع بذل اي مجهود.. لين الاسبوع 38 هني قالتلي خلاص الحمدلله مشيمتج ارتفعت ونقدر نولدج

طبيعي وتقدرين الحين تمارسين حياتج الطبيعية واي الحمدلله مابغيت .. طرت يومها من الوناسة وقررت ابلش العمليات

الانتحارية بس طبعا تحت مشورة دكتورتي وبديت بالمشي يوميا واشرب منقوع الزعفران والدارسين كل يوم ..وكل يوم

ادعي انشالله اليوم يكون يوم ولادتي لان تعبت وايد من الثقل لي درجة ماقدر انام الليل وكل ساعتين اقوم من عز نومي على

عوار بس مو طلق لا عوار عادي من الثقل.. المهم وصلت الاسبوع 39 ومع كل الانتحاريات ماكو اي بوادر ولادة ..

المهم كان عندي موعد عند دكتورتي بتاريخ 8-10 وكنت تقريبا بنص الاسبوع 39 وموعد ولادتي كان 13-10 شرحت

حق الدكتورة وضعي لان زوجي يدرس برا الكويت وبيسافر تاريخ 16-10 وماقدر انطر اكثر وابيه يكون موجود وقت

ولادتي .. قالت خلاص اليوم بفحصج وبحاول اوسعج بس لازم تتحملين .. عاد انا قلت يادلوعة تحملتي عذاب التسع شهوور

تحملي هاليومين وخلج شجاعة .. فحصتني وكنت مفتوحة بس سانتي ووسعتني لين 2 ونص سانتي ..طبعا العوار مال

التوسعة لايوصف بس تحملت لاني كنت موصلة حدي وبولد بس خلاص باي طريقة..

بعد الفحص قالتلي عنق الرحم عندج لين وانشالله راح تولدين اليوم او باجر .. انا هني بققت عيوني قلتلها اليوم قالت انشالله

ادعي .. قلتلها لا مابي اليوم قص مهر حماي ولازم اكون موجودة قالت خلاص حبيبتي انا وسعتج واحتمال اييج عوار وينزل

دم انتي هالليلة بعد العزيمة شربي بطل خروع مع عصير مانجا وامشي عالبحر ساعة وعقبها ردي البيت راح اييج اسهال

قوي وعقبها طلق ولما يزيد عليج العوار توكلي على الله وروحي المستشفى وانا بييج هناك ..

المهم طلعت من عندها وكانت الساعة 10 الصبح يوم الخميس وقلت حق ريلي اول شي يوديني الجمعية وشريت اناناس

فرش واكلت بعدين قلتله خنروح البيت بنام لان وراي سهرة الليلة .. ردينا البيت شربت منقوع الزعفران وكف مريم وحطيت

راسي بنام قلتلهم مابي غدا بس خلوني انام على راحتي.. طبعا ماقدرت انام وتميت بالفراش افكر بالولادة وشغلتلي سورة

مريم بجهازي وقعدت اسمع .. صار المغرب ورحت تبخرت بقشوور بصل لاني سامعة انها تفتح الرحم وخذيتلي دش

عالسريع وبدلت ورحنا قص المهر وانا هناك كان اييلي عوار خفيف بس كنت متحملته عادي .. واهل زوجي كانوا يقولولي

شكلج موصلة وخلاص بتولدين وانا بس ابتسم وقالتلي عمة زوجي تبين ادهنج .. طبعا انا ماصدقت قالتلي ادهنج لان سامعة

ان ايدينها خفيفة ومن تدهن الوحدة على طول تولد عاد قلتلها اوكي وطلعنا ورحت معاها بيتهم ودهنتني وقرت ايات واهي

تدهن وقالت ردي البيت تسبحي.. رديت البيت واول ماوصلت عالحمام ولا نازل علي دم .. انا طبعا تشققت من الوناسة

وركضت حق ريلي اقوله ان خلاص راح اولد .. وخذيت دش وبعدها نزل علي دم وافرازات مرة ثانية وانا متشققة من

الوناسة وعالساعة 11 شربت بطل الخروع استغفر الله مع عصير المانجا .. ومايحتاج اوصفلكم الطعم .. وعالساعة 2 بدا

معاي المغص ورايحة رادة عالحمام تكرمون .. وتقريبا عالساعة 3 ونص بدا يزيد معاي العوار اكثر ويروح ويرجع وكنت

شابكة واسولف مع البنات ودقيت على اختي عروس الدنيا وقلتلها اني بروح المستشفى وخليت بنتي تنام عندهم لاني كنت

ناوية ما اعلم احد الا عقب ما اولد حتى امي وخالتي لان ادري نوعهم يحاتون .. فاتفقت مع ريلي مانعلم احد